Tongana Nyen Mo Lingbi ti Sö Kuâ na Hunzingo ti Sese So?
BIBLE afa hunzingo ti bungbi ti aye ti fadeso tongana mbeni “lâ ti vundu na ye ti ngangu, lâ ti futingo ye, lâ ni so ye aga yangbato, lâ ti bingo, bingo so avuko mingi, lâ ti mbinda na bingo so avuko pitipiti.” (Sophonie 1:15) Biani a yeke pëpe mara ti lango tongaso si mo yeke ku ni kungo! Ye oko, bazengele Pierre agboto mê ti afon lo Chrétien ti ‘ku singo ti lâ ti Jéhovah na ti sala ye si lâ ni aga fade, teti na lâ ni so, fade ayayu agbi na afuti, na fade asungoye aga tongana ngu ngbanga ti wâ so ayeke ngangu mingi. Me na lege ti zendo ti Lo, e yeke ku ayayu ti fini na sese ti fini so mbilimbili aduti na yâ ni.’—2 Pierre 3:12, 13.
Ge Pierre ayeke sala tënë pëpe ti mbeni tâ futingo ti ayayu na sese. “Ayayu” na “sese” so Pierre asala tënë ni ge ayeke fä ti angorogbia ti azo ti laso so abuba na ti bungbi ti azo so ake Nzapa. Fade ‘lâ ti Jéhovah’ ayeke futi tâ sese ni mveni pëpe me ayeke “fâ awasiokpari na yâ ni.” (Esaïe 13:9) Teti ala so ‘abima na atoto teti ye kue ti sioni mingi’ so a yeke sala laso na yâ sioni bungbi ti azo, lâ ti Jéhovah ayeke ga ande mbeni lâ ti salut.—Ezéchiel 9:4.
Tongaso, tongana nyen mbeni zo alingbi ti sö kuâ na “kota lâ ti Jéhovah so amû mbito”? “Tënë ti L’Eternel” so a fa ni na mbeni oko ti aprophète ti lo akiri tënë na hundango tënë so: “Tënë asi tongaso, fade A sö zo so adi iri ti L’Eternel [“Jéhovah,” NW].” (Joël 1:1, NW; 2:31, 32) A-Témoin ti Jéhovah ayeke duti ande na ngia ti mû maboko na mo ti manda ye so ti di iri ti Jéhovah aye ti tene.