Henry VIII na Bible
NA YÂ buku ti lo History of English-Speaking Peoples (Mbage 2), Winston Churchill asû na mbeti: “Na ndo atënë ti mabe ti lege ti vorongo, Kota Gbiango Ye ti Lege ti Vorongo ti aProtestant asala si aye agbian ngangu mingi. Bible aga mbeni fini lingu so a yeda na ni ti mungo awango ti nzoni ahon, so ayeke na ngangu na ndo aye mingi. Wagame ti giriri abi bê lani so Bible ayeke ga na ye ti sioni mingi tongana lo yeke na tïtî azo so ahinga mbeti pëpe, na a lingbi a zia lege gi na aprêtre ti diko ni.”
Tondo ni angbâ ti tene: “A yeke gi na hunzingo ti automne ti ngu 1535 si a sigigi ti fani oko na aBible na ngbongboro ni kue so Tyndale na Coverdale akiri pekoni na yanga ti anglais, na a yeke sigigi fadeso na ambeni mingi. Ngorogbia amû yanga na bungbi ti amokonzi ti lege ti vorongo ti wa azo ti diko Bible.” Na peko ti asiècle mingi ti hingango ye oko pëpe na ndo Bible nga na ndo tënë ti yâ ni, Angleterre ayeke gue ti hinga ye na ndo Bible ndali ti ngorogbia ti Henry VIII, pëpe ndali ti Église.a
“Tongana mbeni kota kpale nde teti ala so angbâ ti bata angbele bango ndo na mbage ti Bible, Ngorogbia ni amû yanga ti tene a pete na Paris gbâ ti aBible ti Anglais, so pendere ni ahon angbele Bible kue, nga, na nze ti septembre ngu 1538, ngorogbia ni amû yanga na a-paroisse kue ti kodoro ni ti vo mbeni Bible ti Anglais so akono ahon atanga ni kue, na ti zia ni na mbeni ndo so ayeke ngangu pëpe teti azo ti paroisse ni ti sala na kusala na ti diko ni. A zia ambeni omene na yâ Cathédrale ti Saint Paul na gbata ti Londres, na azo mingi mingi ayeke ga na cathédrale ni na ndapelele juska na lakui ti diko ni, na tongana ti so a tene na e, ala yeke ga mbilimbili na ngoi so ala lingbi ti wara mbeni zo so go ti lo akono alingbi na ni ti diko ni na kota go.”
Mawa ni ayeke so, na yâ ambeni kodoro mingi, azo mingi ayeke gi pëpe ti wara nzoni na lege ti matabisi so ala yeke na ni ti diko Bible lakue. Ye so ayeke mbeni kota tënë ti bi bê dä, teti so gi Bible oko si “alondo na yanga ti Nzapa, na a yeke nzoni ti fa nda ti ye, ti zingo na azo, ti leke ye na lege ni, na ti mû wango-tene na azo na yâ ye so ayeke na lege ni.”—2 Timothée 3:16, NW.
[Kete Tene na Gbe Ni]
a Gbia Henry VIII alë gbia na Angleterre ti londo na ngu 1509 ti si na ngu 1547.
[Lingu ti foto na lembeti 32]
Henry VIII: dessin so ayeke na yâ ti Royal Gallery na Kensington, so a gboto ni na yâ buku The History of Protestantism (Mbage I)