“Pommade ti Lê ti Zia na Lê ti Mo”

JÉSUS CHRIST amu wango so na akozo Chrétien ti kongregation ti Laodicée, na Asie Mineure.

Jésus atene: “Vo pommade ti lê ti zia na lê ti mo, si mo lingbi ba ndo.” A duti, pepe tâ kobela ti lê, me ziba na lege ti yingo so a hunda ti sava ni. A-Chrétien na Laodicée azia si yingo ti gbata so ala lango dä so amaï na lege ti mosoro asala ngangu na ndo ala na ala bi bê mbilimbili pepe na atâ ye ti yingo so atia ala.

Na salango tene na ndo ni tongana ye so ayeke na gunda ti bubango ti lê ti ala, Jésus atene: “Mo tene, Mbi yeke na mosoro, mosoro ti mbi awu mingi, na ye amanke mbi pepe; na mo hinga pepe mo yeke zo ti vundu, mo yeke zo ti pono, mo yeke wanzinga, mo yeke waziba, mo yeke zo so tele ti mo ayeke senge.” Atä so ala hinga ni pepe, azo ti kongregation ni ayeke na bezoin ti “pommade ti lê” so ayeke na ngangu ti sava zo na so ala lingbi ti wara ni gi tongana ala yeda na fango ye nga na sengo ndo ti Jésus Christ. Jésus atene: “Vo na tïtî mbi.”​—Apocalypse 3:17, 18.

Tongana ti so a yeke giriri tâ tene na aChrétien ti Laodicée, a lingbi atâ Chrétien laso asala hange si akodoro so ala lango dä so aluti mingi na ndo salango ngia nga na gingo kungba asala ngangu mingi na ndo ti ala pepe, na lege so peut-être ala hinga ni pepe. A wara wango ti bata mbeni nzoni bango ndo na lege ti yingo na yâ gbotongo mê so: “Vo na tïtî [Jésus] . . . pommade ti lê ti zia na lê ti mo, si mo lingbi ba ndo.”

A lingbi e ba nzoni so a tene a lingbi a vo “pommade ti lê” so. Ngele ni ayeke dä. A lingbi e mu ngoi ti manda na ti gbu li na ndo Tene ti Nzapa. Wasungo psaume adë bê ti e so Tene so “ayeke na sioni oko pepe, a sala si lê aza.”​—Psaume 19:8, NW (19:9, Bible ti Sango)