Ababâ na Mama I Mu Aye so Alingbi na Amolenge ti I!

AMOLENGE ayeke na bezoin ti wara fango lege nga na sengo ndo na lege ti ndoye, mbilimbili na mbage ti ababâ na mama ti ala. Na ndo tene so, mbeni wafango ye ti Brésil, Tania Zagury, atene: “Bibe ti amolenge kue ayeke ti gi ti sala ngia. A yeke kota ye ti zia akatikati na ni. A yeke na ababâ na mama ti sala ye so. Tongana ala sala ni pepe, a yeke duti ande ngangu ti fa lege na amolenge ni.”

Ye oko, na akodoro mingi ngangu ti mbeni bungbi ti azo so akanga lê na ndo ti asioye na so aba na nene ni mingi liberté ti zo mveni alingbi ti sala si a duti ngangu ti bata wango so ge. Tongaso, na ndo wa ababâ na mama alingbi ti wara mungo maboko? Ababâ na mama so akpe mbito ti Nzapa ahinga so amolenge ayeke “ye ti héritier so L’Eternel [“Jéhovah,” NW] amu” na ala. (Psaume 127:3) Ni la, ala gi na yâ Tene ti Nzapa, Bible, ti wara fango lege ti bata na amolenge ni. Na tapande, aProverbe 13:24 atene: “Zo so ase molenge ti lo na keke pepe, lo ke lo, me zo so andoye molenge ti lo, fade lo se lo na lege ni.”

A lingbi a ba pepe so tene “keke” so Bible asala kusala na ni aye lakue ti tene gi sengo ndo na lege ti mitele; a ye ti tene akode ti mu na awango-tene ti fa lege, atä a duti so wa. Biani, mingi ni atene alingbi ti duti ye kue so a hunda ti se na mbeni molenge so atambela kirikiri. A-Proverbe 29:17 atene: “Mo se molenge ti mo, na fade lo sala si mo wara lege ti hu tele, biani, fade lo mu ngia na bê ti mo.”

Amolenge ayeke na bezoin ti wara sengo ndo na lege ti ndoye ti zi asioni salango ye. Mara ti sengo ndo tongaso na ngangu nga na nzobe afa polele so mbeni babâ wala mama abi bê ti lo na molenge ni. (aProverbe 22:6) Tongaso ababâ na mama, i zia bê ti i anze pepe! Na salango ye alingbi na nzoni wango ti Bible so amu maboko, i yeke zia ande ngia na bê ti Jéhovah Nzapa na amolenge ti i ayeke yekia i.