“Na Lege ti Lumière so Alondo na Mo, E Lingbi ti Ba Lumière”

LUMIÈRE wala wâ ayeke mbeni ye so fani mingi e ba ni na nene ni pepe juska wâ ti dada afâ na vaka ti e aduti na yâ bingo. Ye ti nzoni ayeke so, e lingbi ti zia bê ti e kue na “wâ ti dada” ti e so ayeke na yayu wala lâ. Nga na lege ti lumière so alondo na lâ, e lingbi ti ba ndo, ti te ye, ti hu pupu, na ti duti na fini.

Teti so lumière ayeke tâ kota ye teti fini, a lingbi bê ti e adö pepe ti diko na yâ Genèse so lumière aba gigi na kozo lango ti lekengo sese. “Nzapa a tene, Zia lumière asi; na lumière asi.” (Genèse 1:3) Akota zo tongana Gbia David ayeda lakue na Jéhovah tongana lingu ti fini na ti lumière. David asû na mbeti: “Lingu ti fini ayeke na mo; na lege ti lumière so alondo na mo, e lingbi ti ba lumière.”​—Psaume 36:9 (36:10, Bible ti Sango).

Atene ti David andu ye so ayeke tâ ye biani nga so ayeke na lege ti fä. Bakari, Encyclopédie Britannique (Angl.), atene: “Biani, lumière ayeke ye so amu lege na lê ti ba ndo.” Na pekoni lo kiri lo tene: “Asango ague na mongoli ti azo na lege ti lê mingi ahon tanga ti angangu ti tele kue.” Teti so mingi ti ye so e manda aluti na ndo ti matabisi ti bango ndo, so a hunda lumière ti tambela nzoni, Mbeti ti Nzapa asala nga tene ti lumière na lege ti fä.

Tongaso, Jésus atene na adisciple ti lo: “Mbi yeke lumière ti sese. Zo so amu peko ti mbi fade lo tambela lâ oko pepe na yâ bingo, me fade lo yeke na lumière ti fini.” (Jean 8:12, NW) Lumière na lege ti fä so Jésus asala tene ni ge ayeke tokua ti tâ tene so lo fa, so alingbi ti mu lumière na abibe na bê ti awamango lo. Na peko ti angu mingi ti bingo na lege ti yingo, adisciple ti Jésus awara lege na nda ni ti mä yâ ti ye so Nzapa aleke ti sala teti azo nga ti beku ti Royaume. Ye so aduti biani “lumière ti fini,” teti so hingango ye so alingbi ti gue na fini ti lakue lakue. Na yâ sambela na Babâ ti lo ti yayu, Jésus atene: “So ayeke fini ti lakue lakue: ti tene ala manda ti hinga mo, oko tâ Nzapa, na lo so mo to lo, Jésus Christ.” (Jean 17:3, NW) Zia e ba lâ oko pepe lumière ti yingo so tongana senge ye!