“Fade E Ba Tele na yâ Royaume ti Nzapa”

“Kota ndeko ti mbi! Rupert, laso, a fâ ngbanga ti kuâ na ndo mbi. Mo toto mbi pepe. Mbi tokua ndoye ti mbi na mo nga na azo oko oko kue ti da ni. Fade e ba tele na yâ Royaume ti Nzapa.”

NA LANGO 8 ti nze ti juin, ngu 1942, Franc Drozg asû ambeti so apenze-ngbonga kete kozoni si aturugu ti aNazi afâ lo na ngombe. Ngbanga ti nyen a fâ lo?

Na lege ti atondo so a yeke na Museum of National Liberation na Maribor na Slovénie, Franc Drozg, mbeni wapikango ndao so ayeke na ngu 38, ake ti lï na yâ ti Wehrmannschaft, mbeni bungbi so asala kusala tongana aturugu teti Zamani na yâ kodoro ti Slovénie so azo ti Zamani amu. Lo yeke la ni mbeni Bibelforscher, wala Wamandango Bible, tongana ti so a yeke hiri aTémoin ti Jéhovah na ndo ni so. Na salango ye alingbi na Esaïe 2:4, lo ke ti mu mbage ti aNazi na yâ bira ni, na lo fa so lo yeke sala kusala teti Royaume ti Nzapa.​—Matthieu 6:33.

Na yâ gbata ti Ptuj so a dü Franc dä, a hinga lo tongana mbeni wafango nzo tene ti Royaume ti Nzapa na wâ. (Matthieu 24:14) Atä akpale mingi so asi, lo ngbâ lakue ti fa nzo tene juska na ngoi so a gbu lo na nze ti mai, ngu 1942.

A-Nazi asala ngangu mingi na aTémoin ti Jéhovah na Slovénie. Franc ayeke la ni na popo ti akozo zo so a fâ ala ndali ti atene ti mabe ti ala. Legeoko na aChrétien ti kozo siècle, lo wara ngangu na yâ atene so: “A lingbi e lï na yâ royaume ti Nzapa na lege ti ye ti vundu mingi.” (Kusala 14:22) Mabe ti lo na yâ tâ dutingo ti yanga-ti-komande ti yayu so asigigi polele na yâ andangba tene ti lo: “Fade e ba tele na yâ Royaume ti Nzapa.”

[Lingu ti afoto na lembeti 32]

Franc Drozg: Foto ti Archive-Museum of National Liberation Maribor, Slovénie; mbeti so a sû: A bata kozo mbeti ni na yâ Museum of National Liberation Maribor, Slovénie