“Lango ti Mä Tene ti Alege ti Vorongo”

TETI so mbeni lisoro so lo sala na aTémoin ti Jéhovah agbu bê ti lo mingi, wayinda ti mbeni ekole na Pologne azia nde teti ekole ti lo mbeni “Lango ti Mä Tene ti Alege ti Vorongo.” Lo hunda ti tene azo so aye na popo ti awamandango mbeti, aCatholique, aBouddhiste, na aTémoin ti Jéhovah, aleke andulu fango ye ti mu lege na ambeni wamandango mbeti ni ti hinga ye na ndo ti atene ti mabe nga na asalango ye ti ala. Hio, aTémoin ti Jéhovah ota so ade pendere amu tele ti ala na bê kue ti leke mbeni tene.

Tongana lango ni asï, kozo zo ti sala tene ayeke Malwina so ayeke na ngu 15. Lo tene: “Mingi na popo ti i ahinga e kozoni si e to nda ti ga na ekole so teti so e yeke ga na ayanga-da ti i. Peut-être i yeke hunda tele ti i ngbanga ti nyen e yeke ngbâ ti sala ye so. A yeke ngbanga ti so e mu peko ti tapande ti Jésus Christ, Lo so azia na sese gere ti Lege ti vorongo ti aChrétien. Giriri lo fa nzo tene ti Royaume na ndo kue so lo lingbi wara azo dä. Abazengele na ambeni kozo Chrétien asala tongaso nga. Na ando mingi, aTémoin ti Jéhovah aluti na gbele angangu tara ti mabe, me e yeke na ngia so e yeke na siriri na yâ ekole ti e, siriri so i mu mbage ti i kue dä. E kiri singila na i teti ye so!”

Na hunzingo ti fango ye ti lo, Malwina atene: “Mbeni nda ti tene nde ayeke dä so afa ngbanga ti nyen e yeke ga na da ti i. E bi bê ti e na ndo i. Bible atene so na yâ ngoi kete azo ayeke ba ande ambeni ye so ayeke yengi sese kue. Tongaso, tongana e ga ti peko na yanga-da ti i, pardon, i mu ngoi ti mä i. E ye biani ti tene na i tongana nyen e lingbi ti duti e kue legeoko teti lakue lakue na yâ sese so ayeke ga ande paradis.”

Zo so asala tene na pekoni ayeke Mateusz, so ayeke nga na ngu 15. Mateusz atene na azo so adengi mê ti mä lo so na yâ angu so ahon, aTémoin ti Jéhovah asala kusala na akode nde nde ti kangbi nzo tene. Na tapande, na ngu 1914, na ngoi so a yeke sala alimon so go ni ayeke dä pepe, aTémoin ayeke fa la ni “Photo-Drame de la Création,” mbeni limon so a fa na lege ti afoto na so go ni atoto na tele ni.

Mateusz asala tene na ndo kusala so fonono asala na yâ kangbingo tene ti Royaume nga na pekoni lo fa peko ti mbeni programme so ayeke nde ti ordinateur so aleke ambeti na ayanga ti kodoro nde nde (MEPS), so aTémoin ti Jéhovah asigigi na ni. Lo fa nga tongana nyen aTémoin ti Jéhovah amu maboko ti mu asango na awanganga na ndo akode ti kaïngo kobela na mênë pepe. Lo tene: “Fadeso, akota wanganga ti Pologne asala anzoni tene na ndo ti bango ndo ti e nga ala gboto lê so ngu oko oko a yeke suru azo mingi mingi so ayeke pepe aTémoin ti Jéhovah na mênë pepe.”

Mateusz ahunzi tene ti lo na ndo lekengo aDa ti Royaume na lo tene: “I ye ti ba yâ ti Da ti Royaume ti e? Lindango na yâ ni ayeke senge senge, na a ro nginza dä pepe.” Na salango tene na ndo ti kota Da ti Assemblée na Sosnowiec, Mateusz atene: “A lingbi i ba kota da so a leke ni teti akota bungbi ti e. Ngbanga ti nyen ti gue pepe legeoko na e? E yeke na mbeni wango ti mu na i, na kamarade ti e Katarzyna ayeke ga ti sala tene na ndo ni.”

Na pekoni, Katarzyna so ayeke na ngu 15 atene na wâ: “E yeke na ngia ti tisa mo ti ga na Sosnowiec teti kota bungbi ti district ti aTémoin ti Jéhovah. Fade a yeke sala tene na ndo aye so andu apendere.” Katarzyna asala nga tene na ndo ti kota matanga ti aChrétien: Mémorial ti kui ti Jésus Christ. Lo wa azo so amä lo: “Na ngu so ahon, na ndo sese kue azo ahon kutu 14 asala matanga so. Ngbanga ti nyen ti bungbi na e pepe na matanga ti peko?”

Na peko ti afango ye ti ala, Malwina, Mateusz, na Katarzyna afa na awafango mbeti buku Les Témoins de Jéhovah: Prédicateurs du Royaume de Dieu nga na akasete vidéo use so asala tene na ndo ti atene ti mabe nga na akusala ti aTémoin ti Jéhovah.a Awafango mbeti ni amu ni na bê ti singila na ala mu zendo so ala yeke sala kusala na ni na yâ fango mbeti ti ala na ndo Mbaï.

Na nda ti fango ye ni, Martyna so ayeke na ngu 12 apika mozoko so li ti tene ni ayeke “Singila, Jéhovah” teti azo kue so abungbi ti mä ala. Apendere so ‘atomba mbito na lege ti Nzapa ti ala’ na ala mu mbeni nzoni tene ti témoin. (1 aThessalonicien 2:2, NW) So tâ pendere tapande teti aTémoin so ade pendere na ndo kue!

[Kete Tene na Gbe Ni]

[Foto na lembeti 26]

Katarzyna na sorongo aversê teti fango ye ti lo

[Foto na lembeti 26]

Malwina na lekengo fango ye ti lo alango kete kozoni ti fa ni na ekole