Mbeni Ye ti Manda na Lege ti Keke ti Datte

“PENDERE ti tele ti lo ayeke nde mingi.” A yeke tongaso si mbeni bakari ti Bible asala tene ti keke ti datte. Na angoi so a sû na Bible nga laso, akeke ti datte asala si Popo-hoto ti Nil, na Égypte, aga pendere, na ala mu gbede so adë bê so angoro akete gbako na yando ti Négueb.

Tongana mingi ti amara nde nde ti akeke ti mburu, lutingo ti keke ti datte na nduzu mbilimbili apika bê mingi. Ambeni ayo amètre 30 na ala ngbâ ti lë alengo teti angu 150. Biani, keke ti datte ayeke pendere mingi na lê na a lë nga lengo mingi. Ngu oko oko, a lë ali ti datte mingi. A lingbi ti wara gi na yâ li ni oko alê ni ahon 1 000. Na ndo ti adatte, mbeni wandara asû na mbeti: “A lingbi ti duti ngangu na ala so . . . ate gi ahulengo datte ti hinga tongana nyen a nzere mingi tongana a ngbâ fini.”

Na lege ni, Bible ahaka ambeni zo na akeke ti mburu. Ti nzere na lê ti Nzapa, legeoko tongana mbeni keke ti mburu so alë lengo, a lingbi zo asala ye mbilimbili na a lingbi lo ngbâ ti sala anzo kusala. (Matthieu 7:17-20) Teti tene so, a sala dessin ti akeke ti mburu tongana ye ti pendere na tele ti temple ti Salomon nga na tele ti temple so Ézéchiel aba na yâ suma. (1 aGbia 6:29, 32, 35; Ezéchiel 40:14-16, 20, 22) Tongaso, ti tene vorongo ti mbeni zo anzere na Nzapa, a lingbi lo duti na apendere lengo so amu lege ti hinga na mbeni keke ti datte. Mbeti ti Nzapa atene: “Fade zo ti mbilimbili amaï tongana keke ti mburu.”—Psaume 92:13 (92:12, NW).