Tondo so Alondo na Awafango Tene ti Royaume

Warango Azo so A Yeke Ngangu ti Tingbi Ala

ATÉMOIN TI JÉHOVAH ayeke sala ngangu kue ti fa tokua ti Royaume na azo oko oko kue so ala lingbi ti wara. Ngoi na ngoi, a hunda ti sala kota ngangu ti ndu azo so ayeke na yanga-da ti ala mingi pepe. (Marc 13:10) Na ndo tene so, mbeni wakua pionnier spécial na mbeni kodoro ti Amerika ti Mbongo afa ye so asi.

“Mbeni lâ mbi mä so gouverneur ti kodoro ni ayeke sala vizite na territoire so mbi na wali ti mbi e sala kusala dä. Teti a yeke polele so lo yeke mbeni oko ti azo so ayeke na yanga-da ti ala mingi pepe, mbi sû mbeni mbeti na lo na mbi yôro na yâ ni gbâ ti ambeti so aluti na ndo ti Bible, so na popo ni a wara brochure Ye Wa Nzapa Ahunda na E? nga abuku L’humanité à la recherche de Dieu na Hingango Ye So Ague na Fini ti Lakue Lakue. Na yâ mbeti ni mbi fa nda ti ambeti oko oko so.

“Teti so mbi ye ti hinga bibe ti lo na ndo ti ambeti ni, mbi hunda ti tingbi na lo. Ambeni yenga na pekoni lo yeda ti tingbi na mbi, na mbi mu na tele ti mbi kasete-vidéo Les Témoins de Jéhovah—Un nom, une organisation. Bungbi ni aninga ndulu na ngbonga use. Na peko ti so mbi na gouverneur ni e ba kasete ni, mbi hunda na lo bibe ti lo na ndo ni. Lo kiri tene: ‘Mbeni bungbi nde na ti i ayeke pepe na ndo ti sese. Mbi ye ti wara azo tongana ala ti mu maboko na mbi ti sala si aye so ngorogbia ti mbi aleke ti sala aga tâ ye!’ Na pekoni lo hunda wala mbi gue mbeni lâ awe na kota ndokua ti bungbi ti e. Mbi tene na lo so atä a duti la ni ye so mbi ye ti sala ngbele ye na ngoi so mbi de na ngu 14, mbi de mbi wara lege pepe ti gue na kota ndokua ti e na Brooklyn, New York. A duti la ni mbeni oko ti aye so a yeke ngangu na mbi ti wara. Teti mbeni ngoi lo ba mbi kpö. Na pekoni lo tene so lo ye si mbi wara matabisi so. Lo ba lege ti ambeti ti e na lo mu na e a-billet ti lapara senge senge!

“Fadeso gouverneur ni ayeke wara lakue Tour ti Ba Ndo na Réveillez-vous! E yeke na beku so na yâ ngoi kete e yeke to nda ti manda ande Bible na lo.”