Ala Sala Kusala na Iri ti Nzapa na Bê ti Afrika
AZO mingi na Bê ti Afrika amä na bê na Nzapa. Ala yeke na kite oko pepe so lo yeke Wasalango aye kue. (Apocalypse 4:11) Ye oko, legeoko tongana azo mingi na ambeni ndo nde, mingi ni ala hinga pepe tâ iri ti lo: Jéhovah.
Azo na Bê ti Afrika, nga na ambeni mbage nde ti sese, abi bê na iri ti Nzapa tongana ala tene, “E ye iri ti Mo aga nzoni-kue” na yâ Sambela ti Seigneur. (Matthieu 6:9) Me teti mbeni ngoi so aninga, azo mingi pepe ahinga iri ni. Ye oko, tongana angu ayeke hon, kusala so aTémoin ti Jéhovah asala na wâ agbian bango ndo ti azo na mbage ti kusala so a sala na iri ti Nzapa. Laso, azo mingi ahinga iri ti Nzapa na a wara ni na yâ ti ayanga ti akodoro mingi ti Afrika, tongana Zulu (uJehova), Yoruba (Jehofah), Xhosa (uYehova) na Swahili (Yehova). Ye oko, mingi ti akiringo peko ti Bible na ayanga ti kodoro so akpe lakue ti sala kusala na iri ti Nzapa.
Mbeni nzoni kiringo peko ti Bible so asala biani kusala na iri ti Nzapa ayeke Bible na yanga ti Zande, mbeni yanga ti kodoro so a tene na ambeni mbage ti République Centrafricaine, Soudan, nga na République Démocratique ti Congo. Na mbage ti sese so, azo asala kusala na iri ti Nzapa, so na yanga ti kodoro ti ala a sû ni Yekova. Atä a di iri ti Nzapa tongana nyen na yâ mbeni yanga ti kodoro, a yeke kota ye ti sala kusala na ni. Ngbanga ti nyen? Ngbanga ti so ‘a yeke sö ala oko oko kue so adi iri ti Jéhovah.’—aRomain 10:13, NW.
[Carte/Foto na lembeti 32]
(Ti ba tene ni mbilimbili, ba buku ni)
SOUDAN
RÉPUBLIQUE CENTRAFRICAINE
RÉPUBLIQUE DÉMOCRATIQUE TI CONGO
[Lingu ti foto na lembeti 32]
The Complete Encyclopedia of Illustration/J. G. Heck