Atene so Azo Ahunda
Ti voro Jéhovah “na yingo” aye ti tene nyen?
Na ngoi so lo yeke fa tene na mbeni wali ti Samarie so aga ti gboto ngu na du-ngu ti Jacob ndulu na gbata ti Sychar, Jésus Christ atene: “Nzapa ayeke mbeni Yingo, na a lingbi awavorongo lo avoro lo na yingo na tâ tene.” (Jean 4:24, NW) A lingbi a sala tâ vorongo “na tâ tene” na lege so a lingbi vorongo ni ague legeoko na ye so Jéhovah Nzapa afa na yâ ti Bible na ndo lo mveni nga na ndo aye so lo leke ti sala. A lingbi nga kusala so e sala na Nzapa aduti na lege ti yingo, so ti tene e sala ni na wâ, nga na bê so asi singo na ndoye na mabe. (Tite 2:14) Ye oko, atene so angoro versê ni afa so tene ti Jésus na ndo ‘vorongo Nzapa na yingo’ andu ye mingi ahon gi dutingo ti bibe so e yeke na ni ti sala na Jéhovah.
Lisoro so Jésus asala na wali ni na tele ti du-ngu andu la ni pepe dutingo na wâ wala pepe na yâ vorongo. Teti même zo alingbi ti mu mbage na vorongo ti wataka na wâ nga na bê kue. Nde na so, na peko ti so lo tene fade a yeke voro Babâ pepe na ndo mbeni hoto na Samarie nga pepe na yâ Jérusalem, so ando use so kue ayeke atâ ndo so lê aba, Jésus agboto lê na ndo mbeni fini lege ti vorongo so aluti na ndo tâ ye so Nzapa ayeke. (Jean 4:21) Lo tene: “Nzapa ayeke mbeni Zo ti yingo.” (Jean 4:24, Charles B. Williams) Tâ Nzapa ayeke pepe zo ti mitele na a lingbi pepe ti ba lo wala ti ndu lo. Vorongo lo angoro pepe na tele ti mbeni temple so lê aba wala mbeni hoto. Tongaso, Jésus ayeke sala tene ti mbeni mbage ti vorongo so andu ye mingi ahon gi aye so lê aba.
Nde na salango ni na tâ tene, a lingbi yingo ti nzoni-kue, ngangu ti Nzapa so lê aba pepe, afa nga lege na vorongo so Nzapa ayeda na ni. Bazengele Paul atene: “Yingo [ti nzoni-kue] agi nda ti aye kue, atä akpengba ye ti Nzapa.” Na lo tene na ndo ni: “E wara, pepe yingo ti sese so, me yingo so alondo na Nzapa, si e lingbi hinga aye so Nzapa amu na e na bê ti lo kue.” (1 aCorinthien 2:8-12, NW) Ti voro Nzapa tâ na lege ni, a lingbi e duti na yingo ti lo, na yingo ni afa lege na e. Na ndo ni, a yeke kota ye mingi ti tene a leke yingo ti e, wala lege so e yeke bi bê, si a gue oko na yingo ti Nzapa na lege ti mandango Tene ti lo na salango ye alingbi na ni.
[Foto na lembeti 28]
Voro Nzapa “na yingo na tâ tene”