Giriri E Yeke Ambo ti Ngonda, Me Fadeso E Yeke Angasangbaga!
Na ngoi so mbi na Sakina e de akete molenge ti wali, e yeke avoizin. Sakina ayeke la ni kota na lo kpengba, me mbi yeke kete na mbi ngen ngengo. E yeke papa la ni mingi; me mbeni lâ, e tiri ngangu. A to nda ni na lango ni so, e sala tene mbeni pepe na popo ti e, nga e yeke bala tele pepe. Na nda ni, e use kue e gue na ambeni ndo nde, na e wara sango na ndo ti mba oko pepe.
Na ngu 1994, mbi to nda ti manda Bible na aTémoin ti Jéhovah, na yeke yeke salango ye ti mbi ato nda ti gbian. Angu osio na pekoni, tongana mbi yeke gue na kota bungbi ti e ti lango oko na Bujumbura, na Burundi, bê ti mbi adö ti tingbi tele na Sakina. Mbi yeke na ngia so lo ga, me e bala tele gi tongaso. Na pekoni, gi na lango ni so, bê ti mbi apika ti ba lo na popo ti ala so aleke tele ti mu batême! Lo nga kue lo gbian mingi. Lo yeke mbeni pepe zo ti tiri so mbi papa na lo la ni fani mingi. So tâ pendere ye ti ba lo na fango polele na gbele azo mungo tele ti lo na Nzapa na lege ti batême!
Tongana lo sigigi na yâ ngu, mbi mu loro ti gbu lo na yâ maboko ti mbi, na mbi tene yeke na yâ ti mê ti lo: “Mo dabe mo na atiri kue so e sala na popo ti e?” Lo tene: “Biani, mbi dabe mbi na ni, me a yeke ye so ahon awe. Fadeso, mbi yeke mbeni fini zo.”
E use kue e yeke na ngia ti wara tâ tene ti Bible so abungbi azo oko na ti gbian asalango ye ti e so akpa ti mbo ti ngonda, ti mu asalango ye ti angasangbaga so ayeke ti Kota Berger, Jéhovah Nzapa. Biani, tâ tene ti Bible ayeke gbian fini ti azo.