Atene so Azo Ahunda
Na 1 Pierre 4:3, e diko so ambeni Chrétien amu mbage ti ala giriri na “sambelango ayanda na lege so ake ndia.” Sambelango ayanda kue ayeke pepe ye so ake ndia, na so Nzapa akanga lege na ni na afâ ngbanga na ndo ni?
Biani, na lê ti Nzapa, sambelango ayanda kue ayeke na lege so ake ndia. Ala so agi ti wara yengo dä ti lo alingbi pepe ti mu mbage na sambelango ayanda.—1 aCorinthien 5:11; Apocalypse 21:8.
Ye oko, a lingbi ti ba so bazengele Pierre ayeke sala tene ti vorongo ayanda na mbeni lege nde. Oko nda ti ye ni ayeke so, na popo ti mingi ti amara ti giriri, sambelango ayanda ayeke la ni ye so amu ndo kue na so ayanga-ti-komande amu pepe ndia ti kanga lege na ni. So ti tene, andia ti kodoro ni akanga lege pepe na mara ti sambelango yanda tongaso. Ambeni sambelango ayanda ni ayeke même mbeni mbage ti kode ti salango ye ti mara ni wala ti yanga-ti-komande ni. Na lege so, ambeni zo amu la ni mbage ti ala na ‘sambelango ayanda na mbeni lege so ndia akanga lege na ni pepe’ kozoni si ala ga aChrétien. (New World Translation, so asigigi na 1950) Na tapande, a lingbi ti ba so Gbia ti Babylone Nebuchadnezzar aleke mbeni image ti lor si a voro ni, me awakua ti Jéhovah Shadrak, Méshak, na Abed-Négo ake ti voro ni.—Daniel 3:1-12.
Na mbeni mbage nde, mingi ti amatanga ti vorongo ayanda andu nga akusala so sioni ni ague nde mingi na ndia kue wala nzoni salango ye kue so aga na lege ti yingo-ti-hinga so a dü zo na ni. (aRomain 2:14, 15) Bazengele Paul asû mbeti na ndo asalango ye so yâ ni abuba, so a sala “na mbeni lege nde” na so ayeke “ye ti kamela,” na fani mingi, aye so awara place na yâ amatanga ti lege ti vorongo. (aRomain 1:26, 27) Akoli na awali so amu mbage ti ala na sambelango ayanda na mbeni lege so ake ndia ayeke sala ye pepe alingbi na katikati so bango ndo ti ala ti nzoni na ti sioni azia. A yeke la ni na lege ni biani ti tene ala so aga aChrétien azia lege ti asioni salango ye so.
Na ndo ti sambelango yanda so a fa ni kozoni, Jéhovah Nzapa ake mara ti sambelango ayanda tongaso, so amu ndo mingi na popo ti ala so ayeke aJuif pepe. Na lege so, ndia akanga lege la ni na ala.a—aColossien 3:5-7.
[Kete Tene na Gbe Ni]
a Tene ti yanga ti Grec so a wara na 1 Pierre 4:3 aye ti tene biani “sambelango ayanda so ndia akanga lege na ni.” Na yâ ti aBible ti anglais, a sû peko ti tene ni na ambeni lege nde nde mingi tongana “sambelango yanda so a zi lege pepe na ni,” “vorongo ayanda so a kanga lege na ni,” na “sambelango ayanda so ague nde na ndia.”