Tondo so Alondo na Awafango Tene ti Royaume

Inde: “Beoko na yâ Akangbi Mingi”

“BEOKO na yâ akangbi mingi” ayeke mbeni tene ti sabango so amu ndo kue, so a sala kusala na ni ti fa mango tele so ayeke na popo ti angobo ti salango ye nde nde na kodoro ti Inde. Ti sala si beoko aduti na yâ kota kodoro so kangbi ayeke dä mingi na yâ ngobo ti salango ye, yanga ti kodoro, lege ti vorongo, kete mara so zo alondo dä, yungo bongo, nga na kobe, ayeke mbeni kete ye pepe. Ye oko, a yeke ba mara ti dutingo beoko so na yâ biröo so aba tambelango ti aye ti aTémoin ti Jéhovah na Inde. Atä so azo so amu tele ti ala mveni na nzobe alango nga asala kusala na ndo ni so, ala londo na ambage mingi ti kodoro ni nga na bungbi ti ando so ayeke na gbe ti komandema ti gbia ni na ala yeke tene ayanga ti kodoro nde nde.

• Zia e ba tapande ti Rajrani, mbeni maseka-wali ti kodoro ti Pendjab, na banga-do ti Inde. Tongana Rajrani angbâ la ni ti gue na ekole, mbeni oko ti akamarade ti lo ato nda ti manda Bible na aTémoin ti Jéhovah. Maseka-wali so atara ti zia nzala ti Bible na yâ bê ti Rajrani. Teti so kamarade ti lo ahinga yanga ti Anglais nzoni pepe na Tour ti Ba Ndo ayeke la ni pepe na yanga ti Pendjabi na ngoi ni kâ, lo hunda na Rajrani ti mu maboko ti kiri peko ti atene so ayeke na yâ ti périodique ni na yango ti Pendjabi teti lo. Ye so Rajrani adiko na yâ ti Tour ti Ba Ndo ato nda ti sala ye mingi na ndo ti lo atä kangango lege ti ababâ na mama ti lo, lo gue na li ni juska ti mu fini ti lo kue na Jéhovah Nzapa. Laso, lo yeke sala kusala na Béthel ti Inde, na lo sala gi oko ye so azi lê ti lo ti hinga tâ tene. Lo kiri peko ti ambeti ti aChrétien na yanga ti Pendjabi!

• E ba nga Bijoe, so alondo na mbeni mbage nde ti Inde: kodoro so ayeke na mbongo-do ti Kerala. A tomba la ni Bijoe na da-mbeti teti dutingo ti lo nde na ngoi ti amatanga so andu vorongo kodoro. Na peko ti mbeni fango ngbanga so aninga na so ahunzi na mbeni kota hongo na ngangu ti tâ lege ti vorongo, Bijoe akiri na ekole.a Lo gue na da senda-gi. Ye oko, dutingo ti aye so ayeke kirikiri na ndo ni asala si yingo-ti-hinga ti lo agi lo mingi, tongaso na kozo trimestre ni lo zia ti gue na da-mbeti ni. Fadeso na peko ti angu bale oko na Béthel, lo ba so lo wara aye ti nzoni mingi na dutingo mbeni oko ti sewa ti Béthel so azo ni alondo na ando nde nde me so aduti beoko ahon ti ngbâ ti wara fango ye na kota da-mbeti.

• Norma na Lily use kue ayeke na ngu 70 na ndo ni na ala yeke awomua a sala angu mingi awe. Ala use kue asala angu ahon 40 na yâ kusala ti ngoi kue. Lily ayeke sala kusala na Béthel teti ndulu na angu 20 tongana mbeni wakiringo peko ti ambeti na yanga ti Tamoul. Norma aga na Béthel a sala angu 13 awe na peko ti so lo glisa koli ti lo. Na ndo ti so ala yeke anzoni tapande ti azo so ayeke sala kusala ti ala na wâ nga na bê kue, ala yeke ngangu so abungbi sewa ti Béthel kue oko. Ala ye mingi ti yamba azo so aga, na ala yeke na ngia ti duti na tele ti azo ti sewa ni so ade pendere, na kangbingo ngia so dutingo na fini tongana Chrétien teti angu mingi aga na ni. Nga na mbage, apendere ayeke tisa ala na da ti ala ti duti oko, na ala yeke mu maboko na ala tongana a hunda ni. So atâ pendere tapande!

Teti so ala hon ndo ti akangbi so ayeke na gunda ti bira na ti mango tele pepe na ando mingi, azo so amu tele ti ala mveni na nzobe ayeke na ngia ti sala kusala maboko na maboko teti ambeni zo nde tongana azo ti sewa ti Béthel so aduti beoko na Inde.​—Psaume 133:1.

[Kete Tene na Gbe Ni]

[Lingu ti foto na lembeti 18]

Ye so ayeke na pekoni: Mountain High Maps® Copyright © 1997 Digital Wisdom, Inc.