Tiringo Bira na Nzinga A Yeke Gi Senge?

NA NGOI so ambeni touriste ayeke fono ti ba Bendo ti Gigi na Gbata ti New York, ala ba Ndokua ti Bendo ti Gigi so aba lege ti konomi na ti nzoni duti ti azo, so a-tuyau ti akamba ti wâ ni angbâ na gigi na yâ plafond ti ndo so azo ayeke gue dä ti ba aye so a sala na kode. Zo so afa lege na ala afa nda ni: “Mingi ni a ba plafond so ‘ahunzi pepe’ tongana mbeni ye ti dango bê na lege ti fä so kusala ti Bendo ti Gigi na ndo tene ti konomi na ti nzoni duti ti azo ayeke hunzi lâ oko pepe; mbeni ye ayeke duti ande dä lakue so a lingbi ti sala si a maï dutingo ti azo na ndo sese.”

Atä so Ndokua ni ayeke sala kusala ngangu ti maï mbeni nzoni duti ti kota ahon teti azo kue, so ayeke mbeni nzoni ye, a ba so kusala ni ayeke hunzi ka pepe. Mbeni ye so agboto lê ayeke so, na ngoi ti kusala ti Jésus Christ na ndo sese na kozo siècle N.E., lo tene: “Yingo ti Seigneur [“Jéhovah,” NW] ayeke na ndo Mbi, teti Lo sa mafuta na li ti Mbi ti fa Tene-nzoni na awanzinga.” (Luc 4:18) ‘Nzo tene’ so lo fa la ni ayeke nyen? A duti la ni tokua ti Royaume so fade Jéhovah Nzapa, lo so aga “Gbada Ti Bira ti zo so ye atia lo na yâ vundu ti lo,” ayeke leke gere ni na lo zia Jésus Christ tongana Gbia. Fade Royaume so ayeke sala nyen? Isaïe afa tene ti prophétie so: “Fade L’Eternel Ti Sabaoth [“Jéhovah ti aturugu,” NW] asala pumba teti azo kue, pumba ti ye ti mafuta, pumba ti vin so angbâ na yâ ta ni lâ mingi, pumba ti ye ti mafuta so asi na mafuta ti bio, na pumba ti vin ti nzoni mingi so angbâ na yâ ta ni lâ mingi. Lo hunzi kui teti lakue lakue; fade Seigneur L’Eternel ambô ngule na lê ti azo kue.”​—Esaïe 25:4-6, 8.

Mo ye ti hinga ye mingi ahon na ndo lege so fade Royaume ti Nzapa ayeke “sala si a maï dutingo ti azo na ndo sese,” si ye atia azo mbeni pepe? Ba tene na gbe ni ge ti hinga tongana nyen mbeni wafango ye so alingbi kue alingbi ti sala vizite na mo ti fa na mo ye mingi na ndo ye so Bible atene na ndo aye tongaso.