Siriri na ndo Sese Kue: Tongana Nyen?
SIRIRI na ndo sese kue ayeke ndulu ti si? Kozoni azo mingi abi bê so a yeke ndulu ti si, me fadeso ala yeke na kite. Na lege ti mbeni tondo so asala tene mingi na ndo akpengba tene so andu kekereke ti e, na so a fa ni na yâ mbeti-sango Daily Mail & Guardian ti Afrika ti Mbongo, “afango ye so amu ni a sala gi angu 10 awe na ndo gango ti mbeni fini bungbi ti aye a ba so fadeso a yeke ngangu mingi ti ga tâ ye.”
Awasungo-mbeti ayeke sala tene ti bibe ti beku so amu li ni a sala gi angu 10 awe. Bira ti Mayele ahunzi gi fade fade, na tiri na popo ti akota ngangu ti komande sese ayeke dä mbeni pepe. Na gango ti ye so akpa tongo nda ti mbeni fini ngoi, azo mingi aku ti tene azo ato nda ti gue na li ni na lekengo akpale ti mosoro, ti kobela nga ti atene so andu aye so angoro zo. Me tondo ni atene: “Fadeso, afango ye so akpa gi mbeni bango li senge. Afini bira asungba na ando so kozoni e hinga tene ti ala nzoni pepe; nzinga na ndo sese angbâ ti gue na li ni. Afini kodoro use so ayeke fadeso na angombe ti sioni mingi ahon akiri aba gigi. Kiringo tene nzoni pepe ti Bendo ti Gigi na molongo ti akota kpale so andu nzoni duti ti azo asala si iri ti lo abuba ngangu mingi. Bango ndo na mbage ti ngoi ti pendere mingi ayeke gbian ti ga bango ndo na mbage ti ngoi ti sioni mingi.”
Awamandango Bible ahinga so angangu ti zo, atä a yeke ye so alingbi na gonda, alingbi lâ oko pepe ti ga nzoni kue. Ngbanga ti nyen? Ngbanga ti so, tongana ti so Bible atene, “sese kue ayeke na gbe ti ngangu ti zo ti sioni.” (1 Jean 5:19, NW) A lingbi pepe ti sala si sese akiri na dutingo ti Paradis so Nzapa aleke lo ngbanga ni la ni, tongana lo ngbâ na gbe ti komandema ti Satan.
Na yâ oko ngoi ni so, beku ayeke dä ti ku ye ti nzoni. Jéhovah Nzapa amu zendo ti ga na siriri na ndo sese, pepe na tarango ti leke bungbi ti aye so, me na gango na mbeni “sese ti fini so mbilimbili aduti na yâ ni.” (2 Pierre 3:13) Biani, na lege ti Royaume ti Nzapa, fade a yeke leke sese ti e si a ga mbeni ndo ti siriri na ti tâ ngia, ndo so fini na kusala ayeke duti ande ye ti mungo ngia lakue teti azo kue so amä yanga. Na ndo ni, Nzapa amu zendo ti “mbô ngule kue na lê ti ala, na fade kui ayeke mbeni pepe, fade mua wala wuluwulu wala pasi ayeke mbeni pepe. Angbele ye ahon awe.” Azendo so aluti pepe na ndo afango ye ti azo so gunda ni akpengba pepe. Nde na so, a luti na ndo akpengba Tene ti Wasalango ye so alingbi ti tene mvene pepe.—Apocalypse 21:4; Tite 1:2.