Mo Lingbi ti Ga Ndulu na Mbeni Nzapa so Lê Alingbi Ba Pepe?

Peut-être mo lingbi ti hunda: ‘Tongana nyen mbi lingbi ti lë kpengba songo na mbeni zo so mbi lingbi pepe ti ba lo?’ So alingbi ti kpa mbeni hundango tene so ayeke na lege ni. Me ba ye so:

YE SO lê aba ayeke biani kota ye ti maï asongo so ayeke na ndoye na aninga? Aye so lê aba pepe ayeke nga kota mingi, même kota mingi ahon. A yeke tongaso pepe? Biani! Teti tene so, ambeni zo amaï kpengba songo na ambeni na lege ti tokuango lakue mbeti na popo ti ala: a-lettre ti ala afa na lege ni aye so ala ye, aye so ala ke, aye so ala zia na gbele ala ti sala, akpengba-ndia so ala mu pekoni, bibe ti salango ye na ngia ti ala, nga na ambeni lengo nde ti salango ye wala bingo bê ti zo.

Awaziba ayeke fa nga na gigi so ye so lê aba ayeke pepe kota ye so ahunda ti maï kpengba songo na mbeni zo. Ba tapande ti Edward na Gwen, mbeni koli na wali waziba so asala mariage.a Edward atingbi na Gwen na mbeni ekole ti awaziba, na ndo so, Gwen ayeke mbeni fon lo biazo na yâ mandango ye. Edward agonda alengo ti Gwen, mbilimbili salango ye ti lo na lege ni na yâ salango tene nga na tambela, na nzoni bango ndo ti lo na mbage ti kusala. Nga, salango ye ti Edward agboto Gwen na mbage ti lo teti, na yâ atene ti lo, Edward “ayeke fa na gigi alengo kue so afa na mbi ti mä na bê so ala yeke kota mingi.” Edward ato nda ti gue na peko ti Gwen, na ngu ota na pekoni ala mu tele na mariage.

Edward atene: “Tongana i duti oko, ziba akanga lege biani pepe na yâ lekengo songo na mbeni zo. Tâ tene, i lingbi pepe ti ba tele na popo ti i, me abibe ayeke na ziba pepe.” Fadeso, angu 57 na pekoni, ala ngbâ lakue ti ndoye tele mingi na popo ti ala. Ala tene so lingu ti pendere songo ti ala andu mbilimbili aye osio: (1) bango alengo ti mba ti mo ni, (2) gbungo li na ndo ti alengo so na dutingo na nzala ti ala, (3) batango nzoni lisoro na popo ti ala, na (4) salango aye legeoko.

Aye osio so ayeke kota ye mingi na yâ nzoni songo kue, atä na popo ti akamarade, ti akoli na wali na yâ mariage wala, kota ahon so, na popo ti azo na Nzapa.

[Kete Tene na Gbe Ni]