Ndara ti Nzapa Tongana Nyen A Fa Ni na Gigi?

“ZO AKE ndara ti wanzinga so na zo amä tene ti lo pepe.” Na lege ti atene so, gbia ti ndara Salomon ako nda ti tene ti lo na ndo mbaï ti mbeni senge zo ti ndara so asö mbeni gbata kue si a wara futingo pepe. Mawa ni ayeke so “zo oko adabe lo na wanzinga so pepe.”​—Zo-ti-fa-tene 9:14-16.

Azo ayeke na bibe ti ba azo ti kete mosoro gi tongana asenge zo, atä azo ti nzinga so asala anzoni kusala mingi. So ayeke la ni tâ tene na yâ ye so asi na Jésus. Isaïe afa prophétie so na ndo Lo: “Azo ake Lo, ala zia lo; Lo yeke zo ti vundu, na Lo hinga pono.” (Esaïe 53:3) Ambeni zo ake Jésus gi teti so lo yeke la ni pepe na dutingo wala na kota ndo ti amokonzi ti kota ahon ti ngoi ti lo. Ye oko, Jésus ayeke lâ ni na mbeni ndara so ayeke kota mingi ahon ndara ti azo ti siokpari kue. Azo so ayeke na yâ gbata so Jésus alondo dä ake la ni ti yeda so “molenge ti charpentier [“zo ti kpaka keke,” NW]” so ayeke fa na gigi mara ti ndara tongaso na ayeke sala mara ti akusala ti ngangu tongaso. Ye oko, ye so ayeke mbeni kota glisango lege, teti mbaï ni angbâ ti tene so Jésus ‘asala miracle mingi na ndo kâ pepe, teti ala mä na bê pepe.’ So tâ glisango ye teti azo so!​—Matthieu 13:54-58.

Zia e glisa lege tongaso pepe. Jésus atene: “Zo ahinga ndara ayeke mbilimbili na lege ti kusala ti lo.” Ala so ayeke sala kusala ti Nzapa na ayeke mu ndara ti yayu na azo ayeke nde, pepe na lege ti kamba ti ala wala dutingo ti ala na gbele azo, me na lege ti “le-keke ti nzoni” so ala yeke lë, so ayeke mabe na akusala ti ala so aluti na ndo Bible.​—Matthieu 7:18-20; 11:19.