Salango Ye Kue Fini​—Tongana ti So Afa Giriri

“Na Lo so aduti na ndo trône atene: ‘Ba! Mbi yeke sala ye kue fini.’ Nga, lo tene: . . . ‘Atene so ayeke biani na tâ tene.’”​—APOCALYPSE 21:5, NW.

1, 2. Ngbanga ti nyen, na lege ni, bê ti azo mingi ayeke gi ala ti bi bê na ye so kekereke ayeke ga na ni?

MBENI lâ mo tene wala mo bi bê awe na lege so: ‘Ti tâ tene ni, zo wa ahinga ye so ayeke si kekereke?’ Mo lingbi ti hinga ngbanga ti nyen azo ayeke gi bê ti ala ti fa ye so fade kekereke ayeke ga ni wala ti zia bê kue na azo so na mbito pepe atene ala lingbi ti fa ye so ayeke ga ande. Azo ayeke biani na ngangu oko pepe ti fa tâ ye so ayeke si ande na yâ ti anze wala angu so ayeke ga.

² Mbeti-sango Forbes ASAP asigigi na mbeni numéro so asala gi tene ti ngoi. Na yâ ni, Robert Cringely, mbeni kota wagosinga ti Télé, asû na mbeti: “Na nda ni, ngoi abi kamela na lê ti e kue, me azo so aba pasi mingi ahon na yâ maboko ti lo ayeke ala so ayeke fa ye so ayeke si ande. Ti tara ti hinga ye so ayeke si kekereke ayeke mbeni kusala so a lingbi ti tene so, na yâ ni, e yeke tï lakue na ngu. . . . Ye oko, ala so atene ala yeke awakode ni angbâ ti fa tene ti aye so ayeke si ande.”

3, 4. (a) Bibe wa so atene ye ayeke ga ande nzoni ambeni zo ayeke na ni na ndo ti fini ngoi ti ngu saki oko? (b) Mbeni tâ beku wa ambeni zo ayeke na ni na ndo ngoi ti kekereke?

³ Mo ba peut-être awe so azo abi bê mingi na fini ngoi ti ngu saki oko, na tongaso a lingbi ti ba so azo mingi ahon ayeke bi bê na ndo kekereke? Na tongo nda ti ngu so ahon, mbeti-sango Maclean’s atene: “Ti mingi ti azo ti Canada, ngu 2000 ayeke gi mbeni ngu senge na yâ ti calendrier, me a lingbi ti sala si a tingbi na mbeni tâ fini tongo nda ti ye.” Chris Dewdney, wafango mbeti na da senda-gi ti York, afa nda ti ye so asala si azo mingi aku ti tene ye aga nzoni: “Tongo nda ti fini ngoi ti ngu saki oko aye ti tene e lingbi ti glisa mbeni siècle so aduti biani sioni mingi.”

⁴ So akpa gi mbeni beku senge tongaso? Mbeni gingo nda ti ye so a sala na Canada afa so na ndo azo 100 so a hunda ala, gi 22 si “amä na bê so fade ngu 2000 ayeke ga ande na mbeni fini tongo nda ti ye teti sese.” Ti tâ tene ni, ndulu na ndambo ti azo ni “aku ti ba mbeni fini bira,” so amu sese kue, na yâ ti angu 50 so ayeke ga. A yeke polele so mingi ti azo abi bê ti ala so a yeke pepe mbeni fini ngoi ti ngu saki oko si ayeke lungula ande akpale ti e na ayeke sala ye kue fini. Sir Michael Atiyah, ngbele mokonzi ti Société Royale ti Grande-Bretagne, asû na mbeti: “Lege so sese agbian na loro . . . afa so siècle bale use na ndo ni oko ayeke zia ande sese ti e kue na gbele akota kpale. Akpale so aga na lege ti wungo ti azo so ayeke gue na li ni, mosoro so atia azo, bubango pupu, nga na nzinga so amu ndo kue ahon ndo ti e awe, na a lingbi e ba lege ni hio.”

5. Na ndo wa e lingbi ti wara asango so alingbi ti zia bê dä na ndo ye so ayeke ku e?

⁵ Peut-être mo lingbi ti hunda tele ti mo: ‘Teti azo alingbi pepe ti fa ye so kekereke ayeke ga na ni, a yeke nzoni pepe ti gi pepe ti hinga ni?’ Kiringo tene ni ayeke, pepe! Tâ tene, azo alingbi pepe ti fa kozoni ye so ayeke ku e biani, me a lingbi e tene pepe so zo oko pepe alingbi ti hinga ni. Biani, zo wa alingbi ti sala ni, na ngbanga ti nyen a lingbi e duti na nzoni beku na ndo ngoi ti kekereke? Mo lingbi ti wara anzoni kiringo tene na yâ ti aprophétie osio so adiko tene mbilimbili. A sû peko ti ala na yâ ti buku so amu ndo kue na so a diko ni mingi ahon, me so nga a gbu nda ni nzoni pepe wala ake ti mä tene ti yâ ni: Bible. Atä bibe ti mo na ndo ti Bible ayeke tongana nyen, na atä hingango ye ti mo na ndo ni ayeke tongana nyen, a yeke nzoni teti mo ti bi lê na ndo akpengba ndo osio so. Ala fa biani tene ti mbeni ngoi ti kekereke so ayeke pendere mingi. Na ndo ni, akpengba prophétie osio so afa na gigi tongana nyen gigi ti mo ti kekereke na ti azo so mo ndoye ala alingbi ti duti.

6, 7. Lawa Isaïe asû tene ti prophétie, na tongana nyen aye so lo sala tene ni kozoni aga tâ tene na mbeni lege so ayeke pendere?

⁶ A yeke wara kozoni na Esaïe chapitre 65. Kozo ti diko ni, gi ti hinga aye so asi na ngoi ni kâ, so ti tene ngoi so a sû na chapitre so nga na ye so lo sala tene na ndo ni. Isaïe, mbeni prophète ti Nzapa, so asû atene so, ayeke la ni na fini ahon ngu ngbangbo oko kozoni na hunzingo ti royaume ti Juda. Nda ti royaume so asi tongana Jéhovah azia ti bata aJuif so aduti be-ta-zo pepe, na ziango lege na azo ti Babylone ti buba Jérusalem na ti gue na azo ti lo na ngba. Ye so asi ahon ngu ngbangbo oko na pekoni so Isaïe afa tene ni.​—2 Chronique 36:15-21.

⁷ Ti fa aye ti mbaï so asi na ngoi ti gango tâ tene ni so, dabe mo so na gbe ti fango lege ti Nzapa, Isaïe afa kozoni même iri ti zo ti Perse, Cyrus, so ade adü lo pepe, so ayeke kinda ande Babylone. (Esaïe 45:1) Cyrus aleke lege ti tene aJuif akiri na kodoro ti ala na ngu 537 K.N.E. Ye ti dongo bê ayeke so Isaïe afa kozoni tene ti lekengo ye so, tongana ti so e lingbi ti diko ni na chapitre 65. Lo gboto lê na ndo ti mara ti dutingo so azo ti Israël alingbi wara ande tongana ala kiri na kodoro ti ala.

8. Isaïe asala giriri tene ti ngoi wa ti mbeni kekereke ti ngia, na tene wa ayeke kota ye mingi?

⁸ E diko na Esaïe 65:17-19: “Ba, Mbi créé ayayu ti fini na sese ti fini, na fade azo adabe ala na kozo ye pepe, na ala bi bê ti ala dä mbeni pepe. Sala ngia, na i duti na ngia lakue na yâ ye so Mbi créé; ba, Mbi créé Jérusalem si ngia aduti dä, na Mbi créé azo ti lo si ala duti na ngia. Fade Mbi wara ngia na Jérusalem, na tâ ngia na yâ azo ti Mbi; na fade a mä toto na totongo na vundu na yâ Jérusalem mbeni pepe.” Biani, Isaïe ayeke sala tene ti mbeni dutingo so ayeke nzoni mingi ahon so aJuif ayeke na ni la ni na Babylone. Lo fa tene ti ngia na salango ngia. Me luti fadeso na ndo tene “ayayu ti fini na sese ti fini.” So ayeke kozo ti angoi osio ti wara bungbi ti atene so na yâ ti Bible, na ando osio so awara ni dä alingbi biani ti sala ye na ndo ti gigi ti e ti kekereke, ala lingbi même ti fa ye so ayeke si ande dä.

9. Tongana nyen gango tâ tene ti Esaïe 65:17-19 andu aJuif ti giriri?

⁹ Kozo gango tâ tene ti Esaïe 65:17-19 andu aJuif ti giriri so, a lingbi na tene so Isaïe afa mbilimbili kozo, akiri na kodoro ti ala, na ndo so ala kiri aleke lege ti vorongo so ayeke na sioni oko pepe. (Esdras 1:1-4; 3:1-4) Mo hinga biani so ala kiri la ni na yâ ti mbeni kodoro na ndo oko sese so, pepe na mbeni ndo nde na yâ ti ndagigi. Bango ye tongaso alingbi ti mu maboko na e ti ba ye so Isaïe aye ti tene tongana lo sala tene ti ayayu ti fini na mbeni sese ti fini. A hunda e pepe ti gi nda ti atene kirikiri, tongana ti so ambeni zo asala, na ndo aprophétie ti Nostradamus so ayeke gi tongaso wala ti ambeni mara ti awatenengo aprophétie tongaso. Bible mveni afa polele ye so Isaïe aye ti tene.

10. Tongana nyen e lingbi ti gbu nda ti fini “sese” so Isaïe asala tene ni kozo?

¹⁰ Na yâ ti Bible, tene “sese” aye ti tene lakue pepe sese so e tambela na ndo ni. Na tapande, na ambeni Bible Psaume 96:1 atene: ‘I sala fini bia na Jéhovah, sese kue.’ E hinga so sese ti e, so ti tene kuru sese na akota ngu-ingo, alingbi pepe ti he bia. A yeke azo si ayeke he bia. Tongaso, Psaume 96:1 asala tene ti azo na ndo sese.a Me Esaïe 65:17 asala nga tene ti “ayayu ti fini.” Tongana “sese” ni aduti fä ti mbeni fini bungbi ti azo na yâ kodoro ti aJuif, “ayayu ti fini” so ayeke nyen?

11. Tene “ayayu ti fini” afa ye wa?

¹¹ Mbeni bakari (Encyclopédie de littérature biblique, théologique et ecclésiastique) so McClintock na Strong asala ni, atene: “Atä ndo so asala tene ni na yâ mbeni suma ti prophétie, yayu ayeke . . . bungbi ti angangu ti komande kue . . . na lege so ala yeke na ndo ti azo ni na ala komande ala, tongana ti so tâ yayu ayeke biani na ndo ti sese na a fa lege na lo.” Ti bungbi ti tene “yayu na sese,” oko bakari ni afa so, ‘na lege ti salango tene ti prophétie, atene so andu dutingo na lege ti poroso ti azo ti kamba nde nde. Yayu ayeke yanga-ti-komande; sese ayeke azo senge, azo so amokonzi akomande ala.’

12. Tongana nyen aJuif ti giriri aba “ayayu ti fini na sese ti fini”?

¹² Tongana aJuif akiri na kodoro ti ala, ala wara ye so alingbi ti hiri ni fini bungbi ti aye. Ala wara mbeni fini bungbi ti azo so amu li ni. Zorobabel, mbeni hale ti Gbia David, ayeke la ni gouverneur, na Yoshua ayeke kota prêtre. (Aggée 1:1, 12; 2:21; Zacharie 6:11) Akoli so aduti “ayayu ti fini.” Ayayu na ndo ti nyen? “Ayayu ti fini” so ayeke la ni na ndo ti mbeni “sese ti fini,” mbeni bungbi ti azo so asukula ala so akiri na kodoro ti ala ti kiri ti leke Jérusalem nga na temple ti lo ti voro na Jéhovah. Tongaso, a wara giriri biani ayayu ti fini na sese ti fini na yâ gango tâ tene ti prophétie ni so andu aJuif ti ngoi ni kâ.

13, 14. (a) Mbeni tapande nde wa na ndo tene “ayayu ti fini na sese ti fini” a lingbi e bi bê dä? (b) Ngbanga ti nyen prophétie ti Pierre ayeke kpengba ye mingi na ngoi ti laso?

¹³ Bata si mo glisa pepe kota tene so ayeke ge. A yeke gi pepe ti tara ti fa nda ti Bible, wala pepe gi ti ba hio mbaï ti giriri. Mo lingbi ti ba ni na hongo na mbeni ndo nde so awara dä atene ti “ayayu ti fini na sese ti fini.” Na 2 Pierre chapitre 3, mo yeke wara ande bungbi ti atene so, na mo yeke ba tongana nyen a ndu gigi ti e ti kekereke.

¹⁴ Bazengele Pierre asû la ni mbeti ti lo ahon ngu 500 na pekoni so aJuif akiri na kodoro ti ala. Tongana mbeni oko ti abazengele ti Jésus, Pierre asala mbeti na adisciple ti Christ, “Seigneur” so asala tene ni na 2 Pierre 3:2. Na versê 4, Pierre asala tene ti “zendo ti singo” ti Jésus, so a sala si prophétie ni ayeke na nene ni mingi teti ngoi ti laso. Aye mingi afa so ngbele ye na ngoi ti Kozo Bira so Amu Sese Kue, Jésus asi awe na lege so lo yeke na ngangu ti komande tongana Mokonzi ti Royaume ti yayu ti Nzapa. (Apocalypse 6:1-8; 11:15, 18) Ye so akiri aduti kota ye mingi tongana e ba mbeni ye so Pierre asala tene ni na lege ti prophétie na yâ chapitre so.

15. Tongana nyen prophétie ti Pierre na ndo “ayayu ti fini” ayeke ga tâ tene?

¹⁵ E diko na 2 Pierre 3:13: “Na lege ti zendo ti Lo, e yeke ku ayayu ti fini na sese ti fini so mbilimbili aduti na yâ ni.” Peut-être mo manda awe so Jésus, na yayu, ayeke kota Mokonzi na yâ ti “ayayu ti fini.” (Luc 1:32, 33) Ye oko, ambeni versê ti Bible afa so lo komande pepe gi lo oko. Jésus amu giriri zendo so fade abazengele na ambeni zo tongana ala ayeke wara ndo na yayu. Na yâ buku ti aHébreu, bazengele Paul asala tene ti azo so tongana ala so ‘awara ye ti ala na hiringo ti yayu.’ Na Jésus afa so azo ti bungbi so ayeke duti ande legeoko na lo na ndo atrône na yayu. (aHébreu 3:1; Matthieu 19:28; Luc 22:28-30; Jean 14:2, 3) Ye so agbu bê ayeke so ambeni zo ayeke komande legeoko na Jésus na yayu tongana mbage ti ayayu ti fini. Tongaso “fini sese” so Pierre asala tene ni ayeke nyen?

16. “Fini sese” wa aba gigi awe?

¹⁶ Legeoko tongana gango tâ tene ti giriri, kiringo ti aJuif na kodoro ti ala, gango tâ tene ti 2 Pierre 3:13 so angbâ ti tambela na ngoi so andu azo so ayeda na yanga-ti-komande ti ayayu ti fini. Laso mo lingbi ti wara azo kutu mingi so ayeke na ngia ti yeda na yanga-ti-komande tongaso. Ala yeke wara ye ti nzoni na lege ti kapa ti fango ye so lo mu, na ala yeke sala ngangu ti mu peko ti andia ti lo so afa ni na yâ ti Bible. (Esaïe 54:13) Azo so ayeke gunda ti “fini sese” na lege so ala ga mbeni bungbi ti azo na ndo lê sese ti akodoro, ayanga na amara kue so asala kusala maboko na maboko na mango yanga ti Gbia so akomande, Jésus Christ. Mbeni ye so apika bê ayeke so mo lingbi ti duti mbeni oko ti ala!​—Michée 4:1-4.

17, 18. Ngbanga ti nyen atene so ayeke na 2 Pierre 3:13 amu na e nzoni nda ti tene ti bi lê na ndo ngoi ti kekereke?

¹⁷ Bi bê ti mo pepe so tene ni awe tongaso, so e lingbi pepe ti hinga nzoni ahon ye so ayeke si ande. Biani, tongana mo yeke gi nda ti atene so angoro 2 Pierre chapitre 3, mo yeke wara atene so afa so mbeni kota gbiango ye ayeke si ande. Na aversê 5 na 6, Pierre asala tene ti kota Moa na ngoi ti Noé, Moa so akaï sioni sese ti ngoi ni kâ. Na versê 7 (NW), Pierre atene a bata “ayayu na sese ti fadeso,” angorogbia nga na gbâ ti azo, teti “lâ ti fango ngbanga na lâ ti futi azo so ake tene ti Nzapa.” So nga aye ti fa biani so tene “ayayu na sese so ayeke fadeso” ayeke pepe sese ti e so e yeke na ndo ni, me azo na angorogbia ti ala.

¹⁸ Na pekoni Pierre afa so lâ ti Jéhovah so ayeke ga ayeke ga na kota sukulango ndo, so ayeke zi lege na ayayu ti fini na fini sese so asala tene ni na versê 13. Ba hunzingo ti versê so: “So mbilimbili aduti na yâ ni.” Atene so afa pepe so ambeni kota gbiango ye ti nzoni ayeke duti ande dä? A mu pepe beku ti aye so ayeke biani fini, ti mbeni ngoi so azo ayeke wara ande ngia mingi ahon ti laso ti duti na fini? Tongana mo gbu nda ti tene so, mo ba awe nda ti ye so Bible afa tene ni kozo, bango nda ti ye so azo mingi awara pepe.

19. Buku ti Apocalypse afa ye wa na ndo “ayayu ti fini na sese ti fini” so ayeke ga?

¹⁹ Me zia e kiri e gi nda ti tene ni nzoni. E ba awe ngoi so a wara atene “ayayu ti fini na sese ti fini,” na Esaïe chapitre 65, nga mbeni tapande ni na 2 Pierre chapitre 3. Fadeso gue na Apocalypse chapitre 21, so akiri awara na yâ ni mbeni ngoi so atene so asigigi na yâ ti Bible. Na ndo so nga, a yeke nzoni ti gbu nda ti atene so angoro ni. Achapitre use kozoni, na Apocalypse chapitre 19, a sala tene ti mbeni bira na lege ti akpengba fä, me a yeke pepe mbeni bira na popo ti amara so ake tele. Na mbeni mbage, a yeke “Tene ti Nzapa.” Biani, mo hinga iri so tongana mbeni kota iri so amu na Jésus Christ. (Jean 1:1, 14) Lo yeke na yayu, na suma ni afa lo na li ti aturugu ti lo ti yayu. Ala yeke sala bira na zo wa? Chapitre ni asala tene ti “agbia,” “acapitaine,” na azo ti kamba nde nde, “akete zo na akota zo.” Bira so andu lâ ti Jéhovah so ayeke ga, futingo ti aye ti sioni. (2 aThessalonicien 1:6-10) Na guengo na li ni, Apocalypse 20 ato nda ni na fango tongana nyen a yeke lungula ande “ngbo ti giriri, so ayeke Diable na Satan.” Ye so aleke tene mbilimbili ti ba Apocalypse chapitre 21.

20. Apocalypse 21:1 afa kpengba gbiango ye wa so ayeke ga?

²⁰ Bazengele Jean ato nda ni na atene ti dongo bê so: “Mbi ba mbeni fini yayu na mbeni fini sese; teti ngbele yayu na ngbele sese ni ahon awe, na ngu-ingo ayeke mbeni pepe.” Na lege ti ye so e ba awe na Esaïe chapitre 65 nga na 2 Pierre chapitre 3, e lingbi ti hinga so a sala ge pepe tene ti lungula biani atâ yayu nga na sese ti e, na akota ngu-ingo ti lo, na ti zia mbeni nde na place ni. Tongana ti so akozo chapitre afa ni, a yeke azo ti sioni na angorogbia ti ala, nga na mokonzi so lê aba pepe, Satan, si a yeke lungula ala. Tongaso, ye so amu zendo ni ge ayeke mbeni fini bungbi ti aye so andu azo na ndo sese.

21, 22. Jean ade bê ti e teti adeba nzoni wa, na ti mbô ngule kue aye ti tene nyen?

²¹ Tene ti nda ni ti e ayeke ga polele na ngoi so e yeke gue na li ni na yâ ti kpengba prophétie so. Hunzingo ti versê 3 asala tene ti ngoi so Nzapa ayeke duti ande na azo, ngoi so lo yeke bi ande lê ti lo na nzobe na mbage ti azo so asala ye so bê ti lo aye. (Ezéchiel 43:7) Jean angbâ ti tene na yâ ti aversê 4, 5 (NW): “Nga fade lo [Jéhovah a] mbô ngule kue na lê ti ala, na fade kui ayeke mbeni pepe, fade mua wala wuluwulu wala pasi ayeke mbeni pepe. Angbele ye ahon awe. Na Lo so aduti na ndo trône atene: ‘Ba! Mbi yeke sala ye kue fini.’ Nga, lo tene: ‘Sû ni na mbeti, teti atene so ayeke biani na tâ tene.’” So tâ prophétie so amu ngangu!

²² Luti kete ti ba mbilimbili ye so Bible ayeke fa teti ngoi so ayeke ga. ‘Fade Nzapa ayeke mbô ngule kue na lê ti ala.’ So alingbi biani pepe ti sala tene ti atâ ngule so ayeke sigigi na lê ti e tongana mbeni ye aso ala, na a lingbi nga pepe ti sala tene ti angule so aga na lege ti mbeni kota ngia. Nde na so, angule so Nzapa ayeke mbô ande ni ayeke angule so aga na lege ti sana, vundu, bê so anze, asongo bê, nga na suingo bê. E lingbi ti hinga so a yeke ni la tongana nyen? Biani, pendere zendo ti Nzapa so ti mbô angule ague legeoko na hunzingo ti ‘kui, mua, wuluwulu na pasi.’​—Jean 11:35.

23. Hunzingo ti aye wa prophétie ti Jean amu zendo ni?

²³ So aye ti fa pepe so akobela ti cancer, ti tension, ti bê, na même kui ayeke hunzi ande? Zo wa na popo ti e aglisa pepe mbeni zo so lo ndoye lo na lege ti mbeni kobela, ndao, wala ye ti ngangu? Ge, Nzapa amu zendo so fade kui ayeke duti mbeni pepe, zendo ti lo aye ti tene so amolenge so ayeke dü ande ala na ngoi ni so ayeke ba ande gigi pepe ti kono, na pekoni ti ga mbakoro na ti gue gi na kui. Prophétie so aye ti tene nga so ayeke wara mbeni pepe kobela ti Alzheimer, kobela so abuba bio, a-fibrome, akobela ti lê nde nde, aye so ayeke si mingi na akangba.

24. Tongana nyen “ayayu ti fini na sese ti fini” ayeke duti ande mbeni deba nzoni, na e yeke ba nyen ande?

²⁴ Mo yeke yeda biani so vundu na toto ayeke kiri na peko tongana kui, mbakoro na akobela, ahunzi. Ye oko, ti nzinga so asala sana, salango sioni na amolenge, na tene ti kangbi nde nde so gunda ni andu ndo so zo alondo dä wala poro ti tele ti lo, a yeke tongana nyen? Tongana aye tongaso, so amu ndo kue laso, angbâ ti gue na li ni, a lingbi pepe ti zi e na gbe ti mua na wuluwulu. Tongaso, alingu ti vundu so ayeke laso alingbi ande pepe ti buba dutingo na fini na gbe ti “ayayu ti fini na sese ti fini.” So tâ gbiango ye! Ye oko, ti si ge, e ba awe gi ota ti a-osio ngoi so na yâ Bible ayeke wara tene “ayayu ti fini na sese ti fini” dä. Mbeni oko angbâ, so ague legeoko na ye so e ba awe, na so agboto lê na ndo nda ti tene so apusu e ti ku ngoi so fade Nzapa ayeke sala si zendo ti lo ti “sala ye kue fini” ayeke ga tâ tene, nga na lege so lo yeke sala ni. Article so aga na peko andu prophétie so nga ye so a lingbi ti tene teti dutingo na ngia ti e.

[Kete Tene na Gbe Ni]

Mo Dabe Mo na Nyen?

• Ando ota so Bible asala kozoni tene ti “ayayu ti fini na sese ti fini” dä ayeke so wa?

• Tongana nyen gango tâ tene ti “ayayu ti fini na sese ti fini” andu aJuif ti giriri?

• A gbu nda ti agango tâ tene wa na ndo “ayayu ti fini na sese ti fini” tongana ti so Pierre asala tene ni?

• Tongana nyen Apocalypse chapitre 21 agboto lê na ndo mbeni ngoi ti kekereke so ayeke pendere?

[Foto na lembeti 10]

Gi tongana ti so Jéhovah atene kozoni, Cyrus aleke lege ti tene aJuif akiri na kodoro ti ala na ngu 537 K.N.E.