Mbeni Matanga so Ayeke Nde Fade Mo Duti Dä?

AHON angu 3 500 awe, na mbeni kpengba lango, Jéhovah Nzapa asala si azo ti sewa oko oko ti aIsraélite, so ayeke na ngba na Égypte, afâ mbeni molenge ti ngasangbaga wala mbeni koli-ngasa na akï mênë ni na ayanga ti da ti ala. Tâ na bï ni so, ange ti Nzapa ahon na ndo ti ada so a zia mênë tongaso na tele ni, me a fâ akozo molenge-koli na yâ ada ti azo ti Égypte kue. Na pekoni, a zi azo ti Israël na gbe ti ngba. A si na lango ti dabe na ye so na ngu oko oko, aJuif asala matanga ti Pâque.

Fade fade na peko ti so Jésus Christ ahunzi ti sala matanga ti ndangba Pâque ti lo na abazengele, lo zia na sese mbeni kobe so ayeke dabe na kui ti lo ti sadaka. Lo mu na abazengele ti lo mapa so mama ni ayeke dä pepe na lo tene: “I kamata, i te. So ayeke fä ti tele ti mbi.” Na pekoni lo mu na ala mbeni kopo ti vin na lo tene: “I kue, i nyon ni; teti so ayeke fä ti ‘mênë ti mbi ti mbele’ so fade a sa na sese teti pardon ti siokpari ti azo mingi.” Jésus atene nga: “I ngbâ ti sala ye so ti dabe i na mbi.” (Matthieu 26:26-28, NW; Luc 22:19, 20, NW) Tongaso, Jésus amu yanga na adisciple ti lo ti sala ye so lakue ti dabe na kui ti lo.

Na ngu so, lango ti matanga ti kui ti Jésus ayeke tï na mercredi lango 19 ti avril, na peko ti lindango ti lâ. A-Témoin ti Jéhovah na ndo ti sese kue ayeke bungbi ande na bï so ayeke nde ti sala Matanga ti Dango Bê na lege so Jésus ahunda. E tisa mo na wâ mingi ti bungbi na e ti ba ni. Gi ti ba na aTémoin ti Jéhovah so ayeke ndulu na mo mbilimbili ngoi na ndo ti bungbi ni.