Bango ndo ti Bible na ndö ti divorce nga na kangbingo terê

Jéhovah aku na mbage ti koli na wali ti ngbâ be-ta-zo na zendo so ala mû na lango ti mariage ti ala. Na ngoi so lo bungbi kozo koli na kozo wali na lege ti mariage, Jéhovah atene: “Koli ayeke . . . ngbâ ande na terê ti wali ti lo na ala yeke ga terê oko.” Angu mingi na pekoni, Jésus Christ nga afa peko ti tënë so na lo tene: “Ni la, ye so Nzapa abungbi ni na gbe ti joug oko, zia zo akangbi yâ ni pëpe.” (Genèse 2:24; Matthieu 19:3-6). Tongaso, Jéhovah na Jésus abâ mariage tongana mbeni songo so ayeke ninga na popo ti koli na wali juska kuâ amû mbeni oko (1 aCorinthien 7:39). So mariage ayeke ye so Nzapa la azia ni, a lingbi a bâ divorce tongana senge ye pëpe. Ti tâ tënë ni, Jéhovah ake tënë ti divorce kue so raison ni alondo na yâ ti Bible pëpe.—Malachie 2:15, 16.

Raison wa la Mbeti ti Nzapa afa ti tene zo asara divorce ndali ni? Biani, Jéhovah ake gingo wali wala koli nde nga na lango-sioni (Genèse 39:9; 2 Samuel 11:26, 27; Psaume 51:4). Lo ke lango-sioni na bê oko, ni la si lo mû ni tongana oko raison so ndali ni zo alingbi ti sara divorce. (Ti hinga biani ye so a iri ni lango-sioni, bâ Chapitre 9 ti mbeti so, paragraphe 7). Jéhovah amû lege na wali wala koli so asara ti lo lango-sioni pëpe ti mû desizion ti ngbâ na mba ti lo so asara sioni ni wala ti sara divorce (Matthieu 19:9). Tongaso, tongana lo so asara lango-sioni pëpe amû desizion ti sara divorce, Jéhovah ayeke ke divorce so pëpe. Ye oko, congrégation ayeke wa mbeni zo pëpe ti sara divorce. Biani, ambeni ye alingbi ti pusu wali wala koli ni so asara sioni pëpe ti ngbâ na mba ti lo ni, mbilimbili tongana mba ti lo ni achangé biani bê ti lo. Me a yeke nzoni ala so Bible amû na ala raison ti sara divorce amû desizion ala wani na ala yeda na aye kue so alingbi ti si na pekoni.—aGalate 6:5.

Na yâ ti ambeni ye so ayeke si ka hio hio ape, ambeni Chrétien amû desizion ti kangbi wala ti sara divorce na mba ti ala ni, atâa so lo sara lango-sioni pëpe. Tongana ye tongaso asi, Bible atene so a lingbi zo so amû desizion ni so “[a]mû mbeni koli [wala wali] pëpe wala . . . lo kiri lo leke songo na koli [wala wali] ti lo.” (1 aCorinthien 7:11). Ti ita tongaso, lo yeke na liberté pëpe ti gi ti sara songo na mbeni zo ti tene mbeni lâ ala sara mariage (Matthieu 5:32). Zia e bâ ambeni ye so ayeke si ka hio hio ape so apusu ambeni ita ti bâ so a yeke nzoni ala kangbi.

Tongana koli ni ake na mbana ti bata sewa ti lo. Mbeni sewa alingbi ti tï na yâ ti yere, na azo ni ayeke pëpe na aye so ala bezoin ni ti bata na fini ti ala, ngbanga ti so koli ni ake na mbana ti mû ye na azo ti da ti lo, atâa so lo lingbi ti sara ni. Bible atene so ‘tongana mbeni zo abata azo ti da ti lo pëpe, lo dö lege ti mabe lo zia awe, na sioni ti lo ahon ti zo so amä na bê pëpe.’ (1 Timothée 5:8). Tongana mara ti koli tongaso aye ti changé ape, a yeke na wali ni ti bâ wala lo bezoin ti gue na da-ngbanga ti wara mbeti ti kangbingo terê ti bata nzoni duti ti lo nga na ti amolenge ti lo. Biani, tongana a bi tënë na li ti mbeni ita-koli a tene lo ke na mbana ti bata sewa ti lo, a lingbi a-ancien abâ tënë ni nzoni. A lingbi ti bi na gigi ti bungbi mbeni zo so ake na mbana ti bata sewa ti lo.

Sarango ye ti ngangu mingi na zo. Mbeni koli wala wali alingbi ti sara ye ti ngangu mingi na mba ti lo na mbeni lege so alingbi ti buba seni ti lo wala même ti fâ lo. Tongana zo ti sarango ye ni ayeke ita, a lingbi a-ancien agi ti bâ wala tënë ni ayeke tâ tënë wala pëpe. A lingbi ti bi mbeni zo na gigi ti bungbi tongana lo yeke sara lakue ngonzo sioni mingi nga tongana lo yeke sara ye ti ngangu na zo.—aGalate 5:19-21.

Tongana lo sara si mba ti lo ni alingbi ti voro Jéhovah ape. Mbeni koli wala wali alingbi ti tara lakue ti kanga lege na mba ti lo ti ngbâ ti voro Jéhovah na même ti gbu lo na ngangu ti doro acommandement ti Nzapa. Na yâ ti mara ti aye tongaso, a yeke na lo so si a yeke sara ye ti ngangu ni na lo ti mû desizion ti wara mbeti ti kangbingo terê ti da-ngbanga tongana lo bâ so a yeke gï oko ye so lo lingbi ti sara la ti “mä yanga ti Nzapa, so lo yeke mokonzi, ahon ti mä azo.”—Kusala 5:29.

Na yâ ti aye kue so andu mara ti asarango ye so e londo ti bâ so, a lingbi mbeni zo apusu pëpe wali wala koli so ye ni asi na lo ti kangbi na mba ti lo ni wala ti ngbâ na lo. Atâa so akamarade ti ala so ayeke abiazo wala a-ancien alingbi ti mû maboko nga ti mû wango na ala na lege ti Bible, ala lingbi pëpe ti hinga anzene nzene ye kue so asi na popo ti koli na wali ni. Gï Jéhovah la alingbi ti bâ ni. Biani, mbeni ita-wali (wala ita-koli) ayeke ne Nzapa pëpe wala lo yeke bâ mariage na nene ni pëpe tongana lo yeke kono yâ ti akpale ti sewa ti lo gï ti tene lo wara lege ti kangbi na mba ti lo. Jéhovah ahinga amayele kue so alingbi ti duti na peko ti mbeni kangbingo terê na popo ti koli na wali, atâa zo ni asara tongana nyen ti honde ni. Ti tâ tënë ni, “aye kue ayeke na gigi senge nga aluti dandara na lê ti lo so e yeke na tënë ti kiri na ni na lo.” (aHébreu 4:13). Me tongana mbeni sioni ye so ayeke si ka hio hio ape angbâ gi ngbango si mbeni Chrétien abâ mbeni ye nde ti sara ape me gï ti kangbi na mba ti lo ni, a lingbi zo oko akasa desizion ti lo ni pëpe. Ti hunzi na ni, “zo oko oko na popo ti e ayeke kiri tënë ande na Nzapa ndali ti lo wani.”—aRomain 14:10-12.