Nda ni so a yeke ngangu ti sala nzoni

TONGANA Saul asala lani ye ti sioni, tele ti zo wa la anzere?— Ti Satan Zabolo. Me tele ti amokonzi ti vorongo ti aJuif nga kue anzere. Tongaso, tongana Saul aga mbeni disciple ti Kota Wafango ye, si a hiri lo Paul, amokonzi so akomanse ti ke lo. Mo bâ awe ngbanga ti nyen a yeke ngangu na mbeni disciple ti Jésus ti sala nzoni?—

Kota Prêtre Ananias atene mbeni lâ na ambeni koli ti pika mê ti Paul. Lo gi même lani ti bi Paul na da ti kanga. Tongana Paul aga disciple ti Jésus, lo bâ pasi mingi. Na tapande, asioni zo apika lo lani na ala ye ti fâ lo na angbongboro tênë.​—Kusala 23:1, 2; 2 aCorinthien 11:24, 25.

Azo mingi ayeke gi ti pusu e ti sala ye so anzere na Nzapa pëpe. Tongaso, gbu li na ndo atënë so: Nzara ti ye ti nzoni na bê ti mo ayeke tongana nyen? Mo ye ni mingi si mo yeke sala ande ye ti nzoni même tongana ambeni zo ake mo ndali ni? A hunda ti duti na mbito pëpe; ni la ape?—

Mo yeke hunda peut-être tele ti mo, ‘Ngbanga ti nyen azo ayeke ke e ndali ti so e sala ye ti nzoni? A lingbi ala duti na ngia ape?’ Ti mo, a lingbi a duti tongaso. Bâ, giriri, azo aye tënë ti Jésus, mingi ni ndali ti aye ti nzoni so lo sala. Mbeni lâ, azo kue ti mbeni kodoro abungbi na yanga ti da ti mbeni zo so Jésus ayeke na yâ ni. Ala ga ngbanga ti so Jésus ayeke zi lani kobela na tele ti azo.​—Marc 1:33.

Me na ambeni ngoi, azo ake aye so Jésus afa. Atâa so lo fa lakue ye so ayeke na lege ni, ambeni ake tâ lo na bê oko ngbanga ti so lo tene tâ tënë. Ye so asi mbeni lâ na Nazareth, kodoro so Jésus akono dä. Lo gue na yâ ti mbeni synagogue, mbeni ndo so aJuif ayeke bungbi dä ti voro Nzapa.

Kâ Jésus amû mbeni pendere diskur na ndo Mbeti ti Nzapa. Kozoni, a nzere na azo mingi. Bê ti ala adö na mango apendere tënë so asigigi na yanga ti lo. A yeke lani ngangu na ala ti yeda so a yeke maseka-koli so akono na kodoro ti ala so la si ayeke fa ye na ala tongaso.

Me kete na pekoni, Jésus atene mbeni tënë. Lo sala tënë ti angoi so Nzapa asala lani nzoni bê na azo so ayeke aJuif pëpe. Tongana Jésus atene tënë so, ngonzo agbu azo ti yâ ti synagogue ni ngangu. Mo hinga ngbanga ti nyen?— Ti ala, ala yeke a-oko zo so Nzapa asala nzoni bê na ala. Ala tene so ala yeke nzoni ahon tanga ti azo kue. Ni la, ndali ti ye so Jésus atene, ala ke lo. Mo hinga ye so ala gi ti sala na lo?—

Bible atene: ‘Ala gbu Jésus, ala sigigi na lo na yâ ti kodoro ni. Ala gue na lo na li ti mbeni hoto, ti fâ lo na bingo lo na gbe ni! Me Jésus asigigi na popo ti ala lo hon.’​—Luc 4:16-30.

Tongana a yeke fade mo la si ye so asi na mo, mo yeke kiri ti fa tënë ti Nzapa na azo so?— A hunda ti duti na mbito pëpe, ni la ape?— Me ngu oko na pekoni, Jésus akiri ague na Nazareth. Bible atene: ‘Lo komanse ti fa ye na ala na yâ ti synagogue.’ Mbito ti azo so aye Nzapa pëpe akanga lege na Jésus pëpe ti fa tâ tënë.​—Matthieu 13:54.

Na mbeni ngoi nde, na lâ ti sabbat, Jésus ayeke na mbeni ndo so mbeni koli so maboko ti lo ahule ayeke nga dä. Jésus ayeke na ngangu so alondo na Nzapa ti sava koli so. Me ambeni koli kâ ayeke gi lege ti ga na kpale na Jésus. Fade Kota Wafango ye ayeke sala nyen?— Lo hunda ala kozoni: ‘Tongana mbeni taba ti i atï na yâ ti mbeni kota dû na lâ ti Sabbat, fade i yeke sigigi na lo?’

Biani, ala yeke sigigi na taba ni, même na lâ ti Sabbat, lango so a lingbi ala hu tele. Tongaso Jésus atene: ‘A yeke même nzoni mingi ti mû maboko na mbeni zo na lâ ti Sabbat, teti zo ayeke kota ahon taba!’ A yeke tâ polele so a yeke nzoni Jésus amû maboko na koli so na savango lo!

Tongaso Jésus atene na koli ni ti gboto yâ ti maboko ti lo. Gi na lê ni lê ni maboko ti lo aga nzoni. So tâ nzerengo tele na koli ni! Ka ti ambeni zo ni so, tele ti ala anzere?— Oko pëpe. Ala kiri ake tâ Jésus na bê oko. Ala sigigi na ala mä tele ti fâ lo!​—Matthieu 12:9-14.

A yeke nga oko tongaso laso. Atâa ye so e sala, e lingbi ti nzere na lê ti azo kue pëpe. Ni la, a lingbi e bâ zo wa si e ye ti nzere na lê ti lo biani. Tongana a yeke ti nzere na lê ti Jéhovah Nzapa na Molenge ti lo, Jésus Christ, a lingbi e sala lakue ye so ala fa. Me tongana e sala ni, zo wa la ayeke ke e? Zo wa la ayeke sala ande si a yeke duti ngangu na e ti sala ye ti nzoni?—

A yeke Satan Zabolo. Me azo wa nga ayeke ke e?— Ala so Zabolo ahanda ala si ala mä na bê na aye so ayeke na lege ni pëpe. Jésus atene lani na amokonzi ti vorongo ti ngoi ti lo: “I yeke ti babâ ti i zabolo, na i ye ti sala ye so babâ ti i aye.”​—Jean 8:44.

Azo so Zabolo aye ala ayeke mingi. Jésus ahiri ala “sese” so. Ti mo, “sese” so Jésus asala tënë ni ayeke nyen?— Zia e zi Bible ti e na Jean chapitre 15, versê 19, na e bâ. E diko atënë ti Jésus so: “Tongana i yeke ti sese so, ka sese ni andoye azo ti lo; me teti i yeke ti sese so pëpe, me Mbi hiri i ti zia lege ti sese so, tongaso sese so ake i.”

Tongaso, sese so ake adisciple ti Jésus ayeke azo kue so ayeke adisciple ti lo pëpe. Ngbanga ti nyen sese ni ake adisciple ti Jésus?— Bâ kete si. Zo wa la ayeke mokonzi ti sese so?— Bible atene: “Sese so kue ayeke na tïtî wato-sioni.” Wato-sioni so ayeke Satan Zabolo.​—1 Jean 5:19.

Mo bâ fadeso awe ngbanga ti nyen a yeke ngangu mingi ti sala nzoni?— A yeke ndali ti Satan na sese ti lo. Me mbeni ye nde ayeke nga dä. Mo dabe ti mo na ni?— Na chapitre 23 ti buku so, e manda so a dü e kue na yâ ti siokpari. Tongana siokpari, Zabolo, na sese ti lo ayeke duti dä mbeni pëpe, aye ayeke duti ande nzoni, ni la ape?—

Bible amû zendo so: “Sese so ayeke hon.” So ti tene azo kue so ayeke pëpe adisciple ti Kota Wafango ye ayeke duti dä mbeni pëpe. A yeke zia ala ti ngbâ lakue lakue pëpe. Azo wa la ayeke ngbâ lakue lakue? Mo hinga ala?— Bible akiri atene: “Zo so asala ye so Nzapa aye, lo duti lakue lakue.” (1 Jean 2:17). Tâ tënë, gi azo so asala nzoni, so “asala ye so Nzapa aye,” si ayeke duti lakue lakue na yâ fini sese ti Nzapa. Tongaso, même tongana a yeke ngangu, e ye ti sala gi nzoni, ni la ape?—