Chapitre 31

Afa le ti kobe na la ti sabbat

NGOI KETE na pekoni, Jésus na adisciple ti lo azia Jérusalem ti kiri na Galilée. A yeke ngoi so ngu ti nduzu apika, na akobe ale na yaka. Nzala asala adisciple. Tongaso ala fa le ti kobe na ala te. Ye oko, a yeke la ti sabbat na azo ayeke baa ye so ala sala.

Amokonzi ti vorongo nzapa na Jérusalem agi fade lege ti fa Jésus teti ala tene lo ke ndia ti la ti sabbat. Fadeso aFarizien abi tene na li ti ala: “Baa! Adisciple ti mo asala ye so Ndia amu lege na zo ti sala na la ti sabbat pepee.”

A-Farizien atene ti fa le ti kobe na ti neka ni na maboko ayeke ti fa le kobe na ti pika ni. Me lege so ala fa nda ti ye so ayeke kusala asala si la ti sabbat aga mbeni nenee kungba, me Nzapa aye si a duti ngoi ti ngia, ngoi ti kpengba zo na lege ti yingo. Jésus afa na ala atapande na ya ti Mbeti ti Nzapa ti fa so Jéhovah Nzapa aleke na be ti lo la oko pepee ti fa nda ti Ndia ti la ti sabbat na ngangu tongaso.

Jésus atene so na la ni so nzala asala David na azo so ayeke na lo, ala gue na tabernacle na ala te mapa ti nzoni-kue. A lungula amapa so na gbele Jéhovah awe na azia afini mapa na place ni, na Ndia amu lege gi na aprêtre ti te mapa so. Me, na ngoi so, afa ngbanga na ndo David na azo ti lo pepee teti ala te mapa so.

Ti mu mbeni tapande, Jésus atene: “I diko na Ndia pepee? lege so aprêtre na ya temple asala kusala na la ti sabbat, na tene oko ayeke na li ti ala pepee?” Biani, même na la ti sabbat aprêtre angba ti fa anyama na ti sala ambeni kusala na ya temple ti mu anyama so na sadaka! “Me mbi tene na i”, Jésus atene, “mbeni ye ayeke na ndo so, so ayeke kota ahon temple.”

Ti wa aFarizien, Jésus akiri atene: “Tongana i hinga nda ti tene so, ‘Mbi ye be-nzoni, na mbi ye sadaka pepee’, ka i fa ngbanga pepee na li ti ala so tene ayeke na li ti ala pepee.” Na pekoni lo kondani na tene so: “Teti Molenge ti zo ayeke Seigneur ti la ti sabbat.” Jésus aye ti tene nyen? Lo sala tene ti komandema ti siriri ti Royaume ti lo teti ngu saki oko.

Teti ngu saki omene awe, azo abaa pasi tongana angbaa na gbe ti Satan Diable, na ye ti ngangu na bira ayeke na ndo kue. Nde na so, komandema ti kota la ti sabbat ti Christ ayeke duti ngoi ti wo tele na lege ti aye ti pono na ti ngangu tongaso. Matthieu 12:1-8; Lévitique 24:5-9; 1 Samuel 21:1-6; Nombre 28:9; Osée 6:6.

▪ A diko tene wa na li ti adisciple ti Jésus? Jésus akiri tene da tongana nyen?

▪ Jésus afa so aFarizien asala nyen pepee?

▪ Na lege wa Jésus ayeke “Seigneur ti la ti sabbat”?