Chapitre 14

Akozo disciple ti Jésus

NA PEKO ti lango bale osio na yando, Jésus akiri na Jean, so amu na lo batême. Tongana Jésus aga ndulu na lo, Jean atene na azo so ayeke da: “Baa, Molenge ti Ngasangbaga ti Nzapa so alungula siokpari ti sese! A yeke lo si mbi sala tene ti lo tongana mbi tene: Na peko ti mbi, mbeni zo ayeke ga, lo so ague kozo na mbi, ngbanga ti so lo yeke giriri na fini kozoni na mbi.” Ataa so Jean ahon koya ti lo na ngu, lo hinga so Jésus ayeke na fini kozoni na lo tongana zo ti yingo na yayu.

Ye oko, ngoi kete kozoni, tongana Jésus aga ti mu batême, Jean ahinga mbilimbili pepee so Jésus ayeke ga Messie. Jean atene: “Même mbi, mbi hinga lo pepee, me mbi ga ti batisé azo na ngu si lo lingbi si na gbele azo ti Israël.”

Jean angba ti fa na azo so ama tene ti lo ye so asi na la ni so lo batisé Jésus: “Mbi baa yingo ti Nzapa asigigi na yayu, lo zu tongana bungu, na lo duti na ndo lo. Même mbi, mbi hinga lo pepee, me Lo so ato mbi ti batisé na ngu, lo tene na mbi: ‘Zo so fade mo baa yingo ni azu na aduti na ndo lo, lo yeke zo so abatisé na yingo ti nzoni kue.’ Na mbi baa, na mbi sala tene ti témoin, lo so ayeke Molenge ti Nzapa.”

Na peko ti lango oko, Jean aluti na ambeni disciple ti lo use. Tongana lo baa Jésus so ayeke ga, lo kiri lo tene: “Baa, Molenge ti Ngasangbaga ti Nzapa!” Tongana adisciple use ti Jean Wabatizengo zo ama tene so, ala mu peko ti Jésus. Oko ti ala ayeke André, mbeni ayeke lo so asu na mbeti atene so e baa fadeso, lo so iri ti lo ayeke Jean. Na lege ti atene so amu na e, Jean so ayeke nga koya ti Jésus, ngbanga ti so lo yeke molenge ti Salomé, ita wali ti Marie.

Tongana Jésus akiri peko ti lo, lo baa André na Jean so amu peko ti lo, lo hunda: “I gi nyen?”

Ala hunda lo: “Rabbi, mo lango na ndo wa?”

Lo kiri tene na ala: “I ga, na fade i baa.”

A yeke ngbonga osio na bikombite. André na Jean ahunzi tanga ti la ni na tele ti Jésus. Na pekoni, André ague na loro, teti kota ngia asi be ti lo, na ndo ti ita ti lo so ahiri lo Pierre. Lo tene na Pierre: “E wara Messie awe.” Na lo gue na Pierre na Jésus. Gi na ya ti ngoi so, Jean ague ti gi ita ti lo Jacques ti ga na lo na Jésus. Ye oko, a lingbi na ye so lo sala lakue, Jean asu tene na ndo lo mveni na ya buku ti nzo tene ti lo pepee.

Lango oko na pekoni, Jésus atingbi Philippe, ti kodoro ti Bethsaïda, so ayeke nga ngbele kodoro ti André na Pierre, na Lo tisa lo: “Ga na peko ti mbi.”

Philippe ague na Nathanaël, so mbeni iri ti lo ayeke Barthélemy, na lo tene na lo: “E wara awe lo so Moïse asala tene ti lo, na mbeti ti Ndia, na aProphète nga asala tene ti lo na mbeti, Jésus ti Nazareth, molenge ti Joseph.” Me Nathanaël ama na be na tene so hio pepee, lo hunda: “Mbeni ye oko ti nzoni alingbi ti sigigi na Nazareth?”

Philippe awa lo: “Mo ga na mo baa.” Tongana ala ga ndulu na Jésus, Jésus asala tene ti Nathanaël tongaso: “Baa, biani mbeni zo ti Israël, so handa ayeke na ya lo pepee.”

Nathanaël ahunda: “A sala tongana nyen si mo hinga mbi?”

Jésus atene: “Kozoni si Philippe ahiri mo, tongana mo yeke na gbe ti keke ti fige, mbi baa mo.”

Na dongo be, Nathanaël akiri tene: “Rabbi [so aye ti tene Wafango ye], mo yeke Molenge ti Nzapa, mo yeke Gbia ti Israël.”

Jésus ahunda: “Teti mbi tene na mo, mbi baa mo na gbe ti keke ti fige, mo ma na be? Fade mo baa ye kota ahon so.” Na pekoni, lo mu zendo so: “Biani, biani mbi tene na mo: Fade mo baa yayu alungula, na a-ange ti Nzapa ayeke ma na ayeke zu na ndo Molenge ti zo.”

Na peko ti kete ngoi, Jésus, na afini kozo disciple ti lo, azia popo-hoto ti Jourdain na ala gue na Galilée. Jean 1:29-51.

▪ Azo wa si ayeke akozo disciple ti Jésus?

▪ Pierre, na nga peut-être Jacques, afa ala na Jésus tongana nyen?

▪ Ye nyen asala si Nathanaël ahinga biani na be ti lo so Jésus ayeke Molenge ti Nzapa?