Cisankhulo cakufunika kakamwe cakuti munthu anakwanisa kucicita ndi kuperekeka kuna Yahova na kuntumikira pabodzi na abale na alongo athu. Yahova asafuna kuti anthu onsene acite pyenepi. Thangwi yanji? Thangwi iye asafuna kuti iwo akhale na uxamwali wakuwanga na iye mbakhala m’maso kwenda na kwenda. (Dheu. 30:19, 20; Agal. 6:7, 8) Ngakhale tenepo, Yahova nee asakakamiza anthu toera kuntumikira. Yahova asatawirisa kuti m’bodzi na m’bodzi asankhule ekhene pinafuna iye kucita. Akulu a mpingo asafunika kucitanji Nkristu wakubatizwa angacita madawo? Iye angakhonda kutcunyuka, asafunika kubuluswa mu mpingo. (1 Akor. 5:13) Ngakhale tenepo, Yahova asafuna kuti munthu unoyu adacita madawo abwerere kuna Iye. Mwandimomwene, Yahova acita masasanyiro a ciomboli toera kulekerera ale anatcunyuka madawo awo. Yahova ndi waufuni kakamwe, pontho asapanga ale adacita madawo toera atcunyuke.—Zak. 1:3; Aroma 2:4; Tiya. 4:8. w24.08 tsa. 14 ndima 1-2

Mu ndzidzi udalemba mpostolo Juwau tsamba yace yacitatu, anthu anango akhapfundzisa pinthu pyauthambi mbabweresa nyatwa mu mpingo. Mbwenye mwakutsandzayisa anango akhapitiriza “kufamba mu undimomwene.” Iwo akhabvera Yahova, pontho akhapitiriza “kufamba mwakubverana na matongero ace.” (2 Juw. 4, 6) Akristu anewa akukhulupirika atsandzayisa kakamwe Juwau, kuphatanizambo Yahova. (Mis. 27:11) Tisapfundzanji? Kukhala akhulupirika kusaticitisa kukhala akutsandzaya. (1 Juw. 5:3) Mwacitsandzo, ife tisatsandzaya kakamwe thangwi yakudziwa kuti tisakomeresa ntima wa Yahova. Iye asatsandzaya angaona kuti tisakwanisa kucalira mayesero a dziko ino mbatibvera matongero ace. Aanju asatsandzayambo tingacita pyenepi. (Luka 15:10) Pontho ife tisatsandzaya tingaona kuti abale na alongo athu ali kupitiriza kukhala akukhulupirika. (2 Ates. 1:4) Dziko ino ya Sathani ingafudzwa, ife tinatsandzaya kakamwe thangwi yakupitiriza kukhala akukhulupirika kuna Yahova mpaka kunkhomo. w24.11 tsa. 12 ndima 17-18

Mphapo musafunika kukhala ndzidzi ungasi mbamukaona makhaliro a munthu anafuna imwe mbamudzati kumpanga kuti musanfuna? Mungampanga mwakucimbiza kakamwe, panango iye ananyerezera kuti imwe nee musanyerezera mwadidi mbamudzati kucita pisankhulo. (Mis. 29:20) Pontho mungadembuka kakamwe, iye ananyerezera kuti nee musadziwa pinafuna imwe, makamaka khala adzindikira kuti imwe musanfuna. (Ekle. 11:4) Kumbukani kuti imwe nee musafunika kukhala na cinyindiro cakuti munamanga banja na munthu unoyu, mbwenye musafunika kukhala na cinyindiro cakuti muli wakukhunganyika toera kumanga banja, pontho kuti munthu unoyu ali na makhaliro anafuna imwe. Munacitanji mungadzindikira kuti munthu asakufunani? Khala imwe nee musanfunambo, pangizani pyenepi munjira inacita imwe pinthu. Nee ndi pyadidi kucitisa munthu kunyerezera kuti musafuna kubanyirana naye khala imwe nee musafuna kucita pyenepi.—Aef. 4:25. w24.05 tsa. 22-23 ndima 9-10