Pitirizani Kuwangisa Uxamwali Wanu na Yahova

1. Yahova aticita na pifuno pipi? (Mateu 5:3)

YAHOVA asadziwa pinthu pyakufunika kuna anthu. Mwacitsandzo, toera tipitirize kukhala m’maso tisafunika kukhala na cakudya, cakubvala na pakugona. Tingasowa cibodzi mwa pinthu pyenepi maseze mu ndzidzi wakucepa, umaso wathu usakhala wakunentsa kakamwe. Kusiyapo pinthu pyakufunika toera tikhale m’maso, Yahova aticitambo na cifuno ca kundziwa na kun’nyindira toera atitsogolere. (Lerini Mateu 5:3.) Toera tikhale na kutsandzaya kwandimomwene, tisafunika kukhala na uxamwali wakuwanga na Yahova na kun’nyindira.

2. Ndi citsandzo cipi cinatiphedza kubvekesa mabvekero a mafala akuti ‘kudzindikira’ kuti tisafunika “kudziwa Mulungu”?

² Kodi mafala akuti ‘kudzindikira’ kuti tisafunika “kudziwa Mulungu,” asabvekanji? Mafala anewa asaticitisa kunyerezera munthu wakuti ndi ntcerengi peno nyakuphemba-phemba. Nyerezerani munthu wakuti abvala nguwo zakupswipa kakamwe, pontho nee ali na cakudya. Iye akhala padzuwa, pontho namasiku asathabuka kakamwe na mphepo. Anthu azinji asancalira thangwi ya makhaliro ace. Iye ali wakuneta, pontho ali wakutsukwala. Nyakuphemba-phemba unoyu asadziwa kuti toera akhale m’maso pasafunika munthu toera kumphedza. Munjira ibodzi ene, ale anadzindikira kuti asafuna ciphedzo ca Mulungu, asafunika kubvera pitsogolero pyace, kumphemba ciphedzo na kumbvera.

3. Tinapfundzanji mu nsolo uno?

³ Mu nsolo uno, pakutoma tinaona kuti tinapfundzanji na citsandzo ca nkazi wa ku Fenisya wakuti aphemba Yezu ciphedzo. Tinapfundzambo kuti tinatowezera tani nkazi wa ku Fenisya khala tisafuna kuti Yahova apitirize kutitsogolera. Buluka penepo, tinapfundza thangwi ya Paulu, Dhavidhi na Pedhru akuti anyindira ciphedzo ca Yahova.

TINAPFUNDZANJI NA NKAZI ADAPHEMBA CIPHEDZO?

4. Thangwi yanji nkazi wa ku Fenisya aenda kaonana na Yezu?

⁴ Paulendo unango, nkazi wa ku Fenisya aenda kuna Yezu. Mwanace ‘akhathabuswa kakamwe na dimonyo.’ (Mat. 15:21-28) Nkazi unoyu agodama, mbaphemba Yezu toera am’phedze. Tendeni tione makhaliro matatu adapangiza iye akuti tisafunika kuatowezera.

5. Ndi makhaliro api adapangiza nkazi wa ku Fenisya, pontho Yezu acitanji? (Onanimbo mafoto.)

⁵ Nkazi wa ku Fenisya apangiza kucepeseka. Thangwi yanji tisalonga tenepo? Thangwi iye nee atsukwala na njira idatawirwa iye. Yezu amulandanisa na mwanambwa wang’ono. Mbadakhala ndimwe mbamudacitanji? Mbamudatsukwala mbamukhonda kuphemba ciphedzo ca Yezu? Nkazi wa ku Fenisya nee acita pyenepi. Iye akhala wakucepeseka na wakupirira mbapitiriza kuphemba Yezu ciphedzo. Thangwi yanji? Thangwi akakhulupira Yezu. Pontho Yezu adzumatirwa kakamwe na cikhulupiro ca nkazi unoyu mbacita pinthu toera kumphedza. Iye akhadamala kulonga kuti ndatumwa basi ene “kuna mabira akutayika a Izraeli.” Ngakhale tenepo, Yezu abulusa dimonyo ikhathabusa mwana ninga pikhadaphemba nkazi unoyu.

6. Tisapfundzanji na nkazi wa ku Fenisya?

⁶ Toera tipangize kuti tisabvera pitsogolero pya Yahova, tisafunika kutowezera nkazi wa ku Fenisya. Mbatikhala akucepeseka, akupirira na acikhulupiro cakuwanga. Basi ene ndi munthu wakucepeseka anapitiriza kuphemba ciphedzo ca Yahova mwakupirira. Tisafunikambo kunyindira Yezu na ale anaphatisira iye toera kupereka pitsogolero kuna atowereri ace. (Mat. 24:45-47) Tingapangiza makhaliro anewa, Yahova na Mwanace anatsandzaya, pontho anatiphedza. (Onani Tiyago 1:5-7.) Tendeni tione kuti Yahova asatidyesa tani, pontho asatitsidzikiza tani. Kusiyapo pyenepi, tinaona kuti tinatowezera tani mpostolo Pedhru, Paulu na Mambo Dhavidhi.

PITIRIZANI KUPFUNDZA THANGWI YA YAHOVA NINGA PIDACITA PEDHRU

7. Ndi basa ipi idapaswa Pedhru, pontho iye akhafunika kucitanji? (Ahebheri 5:14–6:1)

⁷ Onani pidacitikira Pedhru. Iye ndi m’bodzi wa Ayuda adadzindikira kuti Yezu akhali Mesiya, wakuti akhaphatisirwa na Yahova toera kudyesa mbumba yace na “mafala anapasa umaso wakukhonda mala.” (Juw. 6:66-68) Mbadzati kuenda kudzulu, Yezu apanga Pedhru: “Dyesa anamabira anga.” (Juw. 21:17) Pedhru acita basa ineyi mwakukhulupirika, pontho Yahova am’phatisira toera kulemba matsamba mawiri akuti mukupita kwa ndzidzi acita khundu ya Bhibhlya. Ngakhale tenepo, iye akhafunikambo kupfundza Mafala a Mulungu. Mwacitsandzo, Pedhru akhapfundza mafala adalemba mpostolo Paulu. Iye adzindikira kuti mafala anango adalemba mpostolo Paulu akhali ‘akunentsa kubvesesa.’ (2 Ped. 3:15, 16) Mbwenye iye akhawangisira kupfundza. Pedhru akakhulupira kuti Yahova mbadamphedza kubvesesa na kuphatisira pidapfundza iye.—Lerini Ahebheri 5:14–6:1.

8. Pedhru acitanji pidapangwa iye mphangwa zipswa na anju?

⁸ Pedhru apangiza kuti akhakhulupira Yahova thangwi akhabvera pitsogolero pikhatambira iye. Mwacitsandzo, pikhali iye ku nzinda wa Jope, Pedhru aona masomphenya. M’masomphenya anewa, anju apanga Pedhru toera aphe na kudya pinyama pyakuti pikhali pyakukhonda cena mwakubverana na Mwambo wa Mose. Pitsogolero pyenepi pikhali pyakunentsa kakamwe. Pedhru pakutoma atawira: “Nyonyo pyanga Mbuya, thangwi ine cipo ndadya kale cinthu cakukhondeswa na cakupswipa mwakubverana na Mwambo.” Buluka penepo, anju ampanga: “Pinthu pidaceneswa na Mulungu, leka kupicemera pyakupswipa.” (Mabasa 10:9-15) Pedhru abvesesa cifuno ca Yahova, mbacinja manyerezero ace. Tisadziwa tani pyenepi? Pidamala iye kuona masomphenya anewa, amuna atatu abwera mbacemera Pedhru toera aende kunyumba kwa Kornelyo, wakuti nee akhali Muyuda. Mbadzati kuona masomphenya, Pedhru nee mbadatawira kuenda kunyumba kwa Kornelyo, thangwi Kornelyo nee akhali Muyuda. (Mabasa 10:28, 29) Pidamala Yahova kupangiza Pedhru kuti kutomera ndzidzi unoyu anthu onsene mbadakwanisa kupfundza mphangwa zadidi, Pedhru acinja manyerezero ace, mbatoma kubvera. (Mis. 4:18) Pedhru amwazira mphangwa Kornelyo na anthu onsene akhali panyumba pace. Anthu anewa onsene akhulupira Yezu, atambira nzimu wakucena, mbabatizwa.—Mabasa 10:44-48.

9. Ndi mathangwi api mawiri anaticitisa kukhala na cifuno cakuwanga ca kupfundza pinthu pyakunentsa kubvesesa pya m’Bhibhlya?

⁹ Ninga Pedhru, tisafunika kuleri Mafala a Mulungu ntsiku zonsene. Kazinji kene tisaleri pinthu pyakukhonda nentsa kubvesesa. Mbwenye tisafunikambo kupfundza kukomerwa na kuleri pinthu pyakuti ndi pyakunentsa kubvesesa. Tisafunika kukhala na ndzidzi wakuleri na kuwangisira toera kubvesesa mwadidi Mafala a Mulungu. Pyenepi pinatiphedza kakamwe. Thangwi yanji? Tendeni tione mathangwi mawiri: Yakutoma, tingapfundza thangwi ya Yahova, ufuni wathu kuna iye unathimizirika, pontho tinamulemedza. Yaciwiri, tingapfundza pinthu pipswa thangwi ya Yahova, ife tinakhala na cifuno cakuwanga ca kupangambo anthu anango thangwi ya iye. (Aroma 11:33; Apok. 4:11) Pidacita Pedhru pisatipfundzisa cinthu cinango: Kubvesesa kwathu undimomwene wa m’Bhibhlya kungacinja, tisafunika kucinja mwakucimbiza manyerezero athu, na pinthu pinacita ife. Tingacita pyenepi, Yahova anapitiriza kutitsogolera, mbatipitiriza kuntumikira mwakukhulupirika.

KULISANI MAKHALIRO ANATSADZAYISA YAHOVA NINGA PIDACITA PAULU

10. Mwakubverana na Akolose 3:8-10, tisafunika kucitanji toera titsandzayise Yahova?

¹⁰ Khala tisafuna kutsandzaya na kutsogolerwa na Yahova, tisafunika kukulisa makhaliro anan’tsandzayisa. Yahova asatipfundzisa kuti tinakulisa tani makhaliro anewa. (Lerini Akolose 3:8-10.) Tisafunika kuwangisira toera kucita pyenepi. Onani pidacitikira Paulu. Pikhali iye m’phale, akhawangisira kakamwe toera kutsandzayisa Mulungu. (Agal. 1:14; Afil. 3:4, 5) Paulu nee akhabvesesa mwadidi kuti mbadalambira tani Mulungu munjira yakutawirika. Kusiyapo kukhonda kudziwa pidapfunzisa Yezu, Paulu akhali wakudzikuza. Pyenepi pyancitisa kukhala na makhaliro anango akuipa na “waukali.”—1 Tim. 1:13.

11. Ndi nkhaliro upi wakuipa wakuti Paulu akhawangisira toera kuusiya? Fokotozani.

¹¹ Mbadzati kukhala Nkristu, Paulu akhaipirwa mwakucimbiza. Bukhu ya mabasa isapangiza kuti Paulu akhaipirwa kakamwe na anyakupfundza a Yezu, pontho “akhafuna kakamwe kuapha.” (Mabasa 9:1) Pidakhala Paulu Nkristu, awangisira kakamwe toera kudula uunthu wace wakale. (Aef. 4:22, 31) Ngakhale tenepo, pidaketesana iye na Bharnabhe, Paulu “aipirwa kakamwe.” (Mabasa 15:37-39) Mu ndzidzi unoyu, Paulu nee apangiza makhaliro anatsandzayisa Yahova. Mbwenye awangisira kakamwe toera kukulisa makhaliro adidi.—1 Akor. 9:27.

12. Ninji cidaphedza Paulu kucinja makhaliro ace?

¹² Paulu akwanisa kucinja makhaliro ace, thangwi iye akhali wakucepeseka, pontho nee akhanyindirika ekhene. (Afil. 4:13) Ninga Pedhru, Paulu akhanyindira “mphambvu za Mulungu.” (1 Ped. 4:11) Ngakhale tenepo, midzidzi inango iye akhacita madodo mbakhala wakutsukwala. Mu ndzidzi ukhatsukwala iye, Paulu akhanyerezera pinthu pyadidi pidancitira Pai wace wakudzulu. Pyenepi pikhancitisa kukhala na cifuno cakuwanga cakupitiriza kucita macinjo toera kutsandzayisa Mulungu.—Aroma 7:21-25.

13. Tinatowezera tani Paulu?

¹³ Ngakhale tiri na pyaka pizinji mbatikatumikira Yahova, tisafunika kupitiriza kucita pinatipfundzisa Yahova. Pyenepi pisaphataniza kudula uunthu wakale mbatibvala uunthu upswa. Tingacita pontho madodo, ninga kuipirwa mwakucimbiza na kulonga mwaukali, nee tisafunika kunyerezera kuti nee tinakwanisabve kutsandzayisa Yahova. M’mbuto mwace, tisafunika kupitiriza kuyesera kucinja njira yathu yakunyerezera na yakucita pinthu. (Aroma 12:1, 2; Aef. 4:24) Tisafunika kukumbuka kuti tingafuna kupitiriza kukulisa makhaliro athu adidi, tisafunika kutawira kupfundziswa na Yahova mbatindziwa mwadidi. Pyenepi ndi pyakufunika kakamwe.

TAWIRISANI KUTI YAHOVA AKUTSIDZIKIZENI NINGA PIDACITA DHAVIDHI

14-15. Yahova asatsidzikiza tani atumiki ace? (Masalmo 27:5) (Onanimbo foto .)

¹⁴ Toera tikhale na kutsandzaya kwandimomwene, tisafunikambo kutsidzikizwa na Yahova. Yahova anatitsidzikiza tani, pontho tinatawirisa tani kuti iye acite pyenepi?

¹⁵ Mambo Dhavidhi akhali na cinyindiro cakuti Yahova mbadantsidzikiza m’midzidzi yakunentsa. (Lerini Masalmo 27:5.) Yahova asatsidzikiza atumiki ace toera cinthu peno munthu akhonde kufudza cikhulupiro cawo. Iye apikira kuti cida cidasasanywa toera kutiphekesa nee cinapembera. (Mas. 34:7; Iza. 54:17) Ngakhale Sathani, madimonyo na ale anatitcinga ndi amphambvu, Yahova ndi wamphambvu kakamwe kupiringana iwo. Maseze iwo akwanise kutipha, Yahova anadzatilamusa muli akufa. (1 Akor. 15:55-57; Apok. 21:3, 4) Yahova asatiphedzambo tingakhala akudzudzumika, toera tipitirize kuntumikira. (Mis. 12:25; Mat. 6:27-29) Yahova atipasa abale na alongo toera kutiphedza na kutibalangaza m’midzidzi yakunentsa, pontho atipasa akulu a mpingo toera kutipfundzisa na kutiphedza kuti tipitirize kukhala na cikhulupiro cakuwanga. (Iza. 32:1, 2) Tingagumanika pa misonkhano, tisapfundza njira zinango zakutawirisa kuti Yahova atiphedze na kutitsidzikiza.—Aheb. 10:24, 25.

16. Yahova atsidzikiza tani Dhavidhi?

¹⁶ Mu ndzidzi ukhabvera Dhavidhi Yahova, iye akhaphedzwa toera kucita pisankhulo pyadidi, pyakuti pikhancitisa kukhala wakutsandzaya. (Onani Misangani 5:1, 2.) Mbwenye pikhakhonda Dhavidhi kubvera, iye athabuka. Yahova nee amalisa pinthu pyakuipa pidancitikira thangwi ya madawo ace. (2 Sam. 12:9, 10) Midzidzi inango, Dhavidhi athabukambo thangwi ya pinthu pyakuipa pikhacita anango. M’midzidzi ineyi, iye akhapanga Yahova pyonsene pikhandzudzumisa, pontho Yahova akhantsidzikiza. Yahova akhacita tani pyenepi? Iye akham’balangaza, akhapangiza kuti akhanfuna, pontho apikira kuti mbadantsidzikiza.—Mas. 23:1-6.

17. Tinatowezera tani Dhavidhi?

¹⁷ Tinatowezera Dhavidhi tingasaka pitsogolero pya Yahova mbatidzati kucita pisankhulo. Pontho tisabvesesa kuti midzidzi inango tisathabuka, tayu thangwi Yahova asiya kutitsidzikiza, mbwenye thangwi tacita pisankhulo pyakuipa. (Agal. 6:7, 8) Maseze tibvere Yahova, midzidzi inango ife tinathabuka thangwi ya pinthu pinango. M’midzidzi ineyi yakunentsa, tinakwanisa kupanga Yahova pyonsene pinatidzudzumisa na kum’phemba ciphedzo. Natenepa iye anatiwangisa na kutipasa cinyindiro cakuti asatifuna.—Afil. 4:6, 7.

PITIRIZANI KUNYINDIRA PITSOGOLERO PYA YAHOVA

18. Ndi nyatwa zipi zinatamba ife, pontho tinacitanji toera Yahova apitirize kutitsogolera? (Onanimbo mafoto.)

¹⁸ Lemba ya caka ca 2026 isalonga: “Anyakutsandzaya ndi ale anadzindikira kuti asafunika kudziwa Mulungu.” Kucita pidalonga Yezu na kunyindira Yahova toera atipase pitsogolero, ndi pyakufunika kakamwe mu ntsiku zino. M’mbuto zonsene zinaenda ife tisagumana anthu akutsukwala. Thangwi yanji? Thangwi anthu azinji nee asatawira kuti asafunika kudziwa Mulungu toera akhale akutsandzaya. Anango asakhulupira Mulungu, mbwenye nee asamulambira munjira yadidi. Anangombo asanyindira pitsogolero pinaperekwa na anthu. Mbwenye nee tisafunika kutowezera makhaliro a anthu anewa. Mphapo tinapitiriza tani kunyindira pitsogolero pya Yahova? Tisafunika kupitiriza kupfundza thangwi ya Yahova, kupitiriza kupangiza makhaliro anan’tsandzayisa, kumbvera na kuntawirisa kuti atitsidzikize.