Perekani Cidikhiro Kwa Acerengi
1 Yezu akhatsalakana kakamwe acerengi. M’midzidzi inango iye apereka ciphedzo cakumanungo mwacirengo na awangisa anyakuduwala, mbwenye basa yace ikulu ikhali kumwaza “mphangwa zadidi” kwa acerengi. (Mat. 11:5) Utumiki wa Akristu lero ukupitiriza kuphindulisa acerengi na anango.—Mat. 24:14; 28:19, 20.
2 Cidikhiro Candimomwene: Atsogoleri a cikristu caunthawatawa asapikira kuti acerengi anadzapfuma angapereka kobiri ku gereja mwakudzala manja. Mbwenye, Biblya isapfunzisa kuti Umambo wa Mulungu basi ndiwo unafuna kudzamalisa utcerengi na kumalisa nyatwa zonsene za anthu. (Sal. 9:18; 145:16; Iza. 65:21-23) Mukupangiza acerengi pinapfunzisadi Biblya, tisaapasa cidikhiro na tisaaphedza kudziwa na kutumikira Mulungu.—Mat. 5:3.
3 Afarisi a ntsiku za Yezu nee akhalemedza acerengi tayu, iwo akhaacemera ‘am-ha·’á·rets mwakuapwaza, peno “anthu a dziko yapantsi.” Mbwenye, Yezu akhaona ‘ciropa cawo,’ peno umaso wawo, ninga ‘wakufunika.’ (Sal. 72:13, 14) Ife tingakwanise kusangizira Yezu na ‘kubvera ntsisi’ acerengi mu kuatsalakana na kualemedza. (Mis. 14:31) Cipo tilekeni kulonga mwakuipa anyakuendekana athu akuti ndi acerengi peno kucalira kupereka umboni kwa iwo. Azinji anatawira mphangwa za Umambo ndi anthu akucerenga.
4 Phedzani Acerengi Cincino: Kupfunzisa kwathu midida ya Biblya kwa acerengi mu cisa kusaaphedzambo kupungula pinathimizira ucerengi cincino. Mwacitsanzo, Biblya isakhondesa kuledzera, masenzekero akufuna kuwina kobiri, kupolola, kufumali na pyakucita pinango pyakuti pisabweresa ucerengi. (Mis. 6:10, 11; 23:21; 2 Akor. 7:1; Aef. 5:5) Malemba asatiwangisa kuti tikhale akunyindirika na akuphata basa na “ntima wonsene,” makhaliro anasakiwa kwa anyabasa. (Akol. 3:22, 23; Aheb. 13:18) Inde, mwakubverana na kudinga kunango, mapatrau azinji pakusaka anyabasa, iwo asasaka anthu ale akuti ndi akunyindirika na akukhulupirika.
5 Yahova asatsalakana nyatwa za acerengi. Mwakukhonda dembuka Yezu Kristu anadzapulumusa acerengi “akusowa mbvunuliri.” (Sal. 72:12) Mpaka ndzidzi unoyu, tiri na mwai wakupambulika wa kuthontholesa anango, kuphataniza acerengi, na mphangwa za cidikhiro za m’Biblya.