Mwana Adapikirwa

Mbuto mwakubwerera ku Nazareti, Zuze na Mariya apitiriza kukhala ku Bhetelehemu. Pikakhala Yezu na ntsiku zisere zakubalwa, iye asidzwa ninga mukhalongera Mwambo wa Mulungu kwa Aizraeli. (Levitiko 12:2, 3) Pontho nsambo wa anthu a ndzidzi uneule, ukhali wakupasa anapiana madzina pa ntsiku yacisere. Natenepa iwo athula mwanawo dzina ya Yezu, ninga mukhadalongera anju Gabhriyeli.

Pikhali Yezu na ntsiku 40 zakubalwa, kodi anyakubalace aenda naye kupi? Iwo aenda naye ku templo ku Yerusalemu, yakuti ikhali dhuzi na kukhali iwo. Mwambo ukhalonga kuti pakupita ntsiku 40 kutomera pa ntsiku yakubalwa kwa mwana wamamuna, mai wace akhafunika kuenda kapereka ntsembe ku templo toera aceneswe.—Levitiko 12:4-8.

Mariya acita pyenepi. Iye apereka ntsembe ya mbalame ziwiri zing’ono. Pyenepi pisapangiza kuti Zuze na Mariya akhali akutcerenga. Mwakubverana na Mwambo, munthu akhafunika kupereka mwanabira na mbalame. Mbwenye khala mai wace nkhabe mwanabira, iye mbadakwanisa kupereka nkhangaiwa ziwiri peno madjiwa mawiri. Pyenepi ndi pidacita Mariya mwakubverana na makhaliro ace.

Pa templo, mamuna m’bodzi wakugwesera afendedzera Zuze na Mariya. Dzinace ikhali Simeoni. Mulungu akhadampanga kuti mbadzati kufa, iye anaona Kristu, peno Mesiya wakupikirwa wa Yahova. Mukutsogolerwa na nzimu wakucena, Simeoni aenda ku templo, kudagumana iye Zuze na Mariya na mwanawo. Simeoni akwata khombwani m’manja mwace.

Pikhali iye na Yezu m’manja, Simeoni apereka takhuta kwa Mulungu mbalonga: ‘Mbuya Mulungu, cincino mukutawirisa ntumiki wanu kuenda mwantendere ninga mukhadalongera imwe. Thangwi maso anga aona njira idasasanya imwe toera kupulumusa anthu a madzindza onsene, nyale yakumwinika anthu na kupasa mbiri mbumba yanu ya Izraeli.’—Luka 2:29-32.

Zuze na Mariya adzumatirwa pidabva iwo pyenepi. Simeoni aapasa nkhombo, pontho alonga kuna Mariya kuti mwanace ‘atumwa toera kucitisa kuti anthu azinji aphiwe na anango azinji apulumuswe mu Izraeli.’ Kusiyapo pyenepi, kutsukwala kukulu ninga supada yakutwa kunadzakhala na iye.—Luka 2:34.

Pa ntsiku ineyi, Yana, mprofeta wacikazi wa pyaka 84 pyakubalwa akhalimbo penepo. Ndzidzi onsene iye akhagumanika pa templo. Pa ndzidzi unoyu, iye aenda kuna Zuze, Mariya na khombwani Yezu. Yana atoma kupereka takhuta kwa Mulungu na kulonga pya Yezu kwa onsene akhabvesera.

Zuze na Mariya atsandzaya kakamwe na pikhacitika pa templo. Thangwi pyonsene pikhapangiza kuti mwanawo ndi Ule Adapikirwa na Mulungu.