Aanju A Mulungu Asatiphedza

ANTHU anango asalonga kuti asakhulupira pinthu pinaona iwo basi. Mbwenye manyerezero anewa nee ndi adidi. Pali na pinthu pizinji pinadziwa ife pyakuti piripo, mbwenye cipo tapiona kale. Unakwanisa kulonga cibodzi mwa pinthu pyenepi?—

Ndiye tani muya unapuma ife? Tisakwanisa kuubva?— Thukula manja ako, apepese. Ciripo cidabva iwe?— Wabva, mphapo wakwanisa kuuona?—

Tapfundza kale kuti anthu auzimu nkhabe kuoneka. Taona kuti anango ndi adidi, mbwenye anango ndi akuipa. Unakwanisa kulonga madzina a anthu angasi auzimu akuti nee tisakwanisa kuaona?— Inde, pali na Yahova Mulungu, Yezu na aanju anango adidi. Mphapo aanju akuipa alipombo?— Bhibhlya isalonga kuti alipo. Ndipange pidapfundza iwe thangwi ya iwo.—

Pinadziwa ife ndi pyakuti aanju onsene adidi na akuipa ene, ali na mphambvu kupiringana ife. Mpfundzisi Wankulu akhadziwa pizinji thangwi ya aanju. Mbadzati kubalwa ninga mwana pa dziko yapantsi iye akhali anju. Iye akakhala pabodzi na aanju anango kudzulu. Pontho akhadziwa azinji a iwo. Kodi aanju anewa onsene ali na madzina?—

Tapfundza kuti Mulungu apasa nyenyezi madzina. Pyenepi pisatipasa cinyindiro cakuti aanju onsene alimbo na madzina. Pontho tisadziwa kuti iwo asacedza pabodzi, thangwi Bhibhlya isalonga kuti pali na ‘cilongero ca aanju.’ (1 Akorinto 13:1) Usanyerezera kuti aanju asacedzanji? Kodi iwo asacedza thangwi ya ife pa dziko yapantsi?—

Tisadziwa kuti aanju a Sathani akuti ndi madimonyo, asayesera kuticitisa kukhonda bvera Yahova. Natenepa, iwo angacedza asalonga kuti anacita tani pyenepi. Iwo asafuna kuti tikhale ninga iwo, toera Yahova akhonde kutifuna. Mphapo ndiye tani aanju akukhulupirika a Mulungu? Usanyerezera kuti iwo asalongambo thangwi ya ife?— Inde, iwo asalonga. Iwo asafuna kutiphedza. Tende tione kuti aanju a Mulungu aphedza tani anthu akuti akhafuna Yahova na kuntumikira.

Mwacitsandzo, pakhali na mamuna m’bodzi akhacemerwa Dhanyeli akakhala ku Bhabhilonya. Anthu azinji a mu nzinda unoyu nee akhafuna Yahova. Iwo akhazikisa ntemo wakuti munthu onsene anacita phembero kuna Yahova Mulungu, akhafunika kutcunyuswa. Mbwenye Dhanyeli nee asiya kucita phembero kuna Yahova. Mphapo usadziwa kuti iwo acitanji kuna Dhanyeli?—

Inde, anthu anewa akuipa aponya Dhanyeli n’djenje ya nkhalamu. Dhanyeli akhali ekhene n’djenje ineyi ya nkhalamu zakuti zikhali na njala. Usadziwa kuti ninji pidacitika?— Dhanyeli alonga: “Mulungu wanga atumiza anju wace mbafunga milomo ya nkhalamu.” Nkhalamu nee zamphekesa nee pang’ono pene! Aanju anakwanisa kuphedzambo ale anatumikira Yahova.—Dhanyeli 6:18-22.

Ntsiku inango Pedhru akhali nkaidi. Panango usakumbuka kuti Pedhru akhali xamwali wa Mpfundzisi Wankulu, Yezu Kristu. Anthu anango nee akomerwa pidalonga Pedhru kuti Yezu akhali Mwana wa Mulungu. Ndi thangwi yace iwo amuikha nkaidi. Anyankhondo akhaonera Pedhru toera akhonde kuthawa. Kodi pakhali na munthu unango wakuti mbadamphedza?—

Pedhru akhagona pakati pa anyakuonera kaidi awiri, pontho mikono yace ikhadamangwa na makorenti. Mbwenye Bhibhlya isalonga: ‘Penepo pene afika anju wa Yahova, ceza mbacigaka pa mbuto ikhali Pedhru. Anju aphata Pedhru pakhundu pace amulamusa, mbampanga: “Lamuka mwakucimbiza!”’

Penepo makorenti akhadamangwa na iye m’mikono yace asudzuka! Buluka penepo anju ampanga: ‘Bvala nguwo zako na masandalya ako unditowere.’ Anyakuonera nee akwanisa kupingiza pyenepi thangwi ndi anju akhaphedza Pedhru. Pidafika iwo pa nsuwo ukulu wa utale, pacitika cinthu cakudzumatirisa. Nsuwo unoyu wafunguka okhene! Anju unoyu asiya Pedhru toera apitirize kumwaza mphangwa.—Mabasa 12:3-11.

Usaona kuti aanju a Mulungu anakwanisambo kutiphedza?— Inde, iwo anakwanisa. Pyenepi pisabveka kuti iwo anatitsidzikiza toera tikhonde kuphekeka?— Nkhabe, thangwi tingacita pinthu mbatidziwa kuti pinatiphekesa aanju nee anatitsidzikiza. Mbwenye maseze tikhonde kucita pinthu pyenepi, panango ife tinaphekeka. Aanju nee apangwa toera atitsidzikize mu pinthu pyonsene pinacitika mu umaso wathu. M’mbuto mwace, Mulungu aapasa basa yakupambulika toera aicite.

Bhibhlya isalonga pya anju m’bodzi wakuti asapanga anthu a madziko onsene toera alambire Mulungu. (Apokalipse 14:6, 7) Anju unoyu asacita tani pyenepi? Kodi iye asakhuwa kudzulu toera anthu onsene am’bvesere?— Nkhabe, ndi atowereri a Yezu pa dziko yapantsi anapanga anthu thangwi ya Mulungu, pontho aanju asaatsogolera m’basa yawo. Aanju angaona kuti pali na munthu anafuna kudziwa pya Mulungu, iwo asacita pyonsene pinakwanisa iwo toera kumpasa mwai wakudziwa thangwi ya Mulungu. Ife tinakwanisa kucita basa ineyi yakumwaza mphangwa, pontho aanju anatiphedza.

Mphapo ndiye tani anthu akuti nee asafuna Mulungu angatithabusa mbatiendesa nkaidi? Kodi aanju anatibulusa?— Aanju ali nayo mphambvu yakutibulusa nkaidi, mbwenye iwo nee asacita pyenepi ndzidzi onsene.

Paulu wakuti akhali m’bodzi wa anyakupfundza a Yezu akhali nyankaidi mu ndzidzi udacita iye ulendo na bote. Mu ndzidzi unoyu kwacitika condzi cikulu kakamwe. Nakuti m’bote ineyi mukhali na anthu akuti akhafuna kubva pya Mulungu, aanju nee abulusa Paulu mwenemu. Anju m’bodzi alonga: “Paulu, leka kugopa. Iwe usafunika ulimire pamaso pa Sezari.” Inde, Paulu akhafunika kuendeswa kuna Sezari, ntongi wankulu kakamwe wa mu ndzidzi unoyu, pontho akhafunika kum’mwazira mphangwa. Ndzidzi onsene aanju akhadziwa kukhali Paulu, pontho iwo akham’phedza. Natenepa, iwo anatiphedzambo tingatumikira Yahova na ntima onsene.—Mabasa 27:23-25.

Pali na basa inango ikulu yakuti mwakukhonda dembuka aanju anadzaicita. Thimize pano, Mulungu anadzafudza anthu akuipa. Onsene anakhonda kulambira Mulungu wandimomwene anadzafudzwambo. Ale analonga kuti nee asakhulupira aanju thangwi nee asaaona, anadzadzindikira kuti akhali akuphonyeka.—2 Atesalonika 1:6-8.

Pyenepi pisabvekanji kuna ife?— Tingakhala kukhundu ibodzi ene na aanju a Mulungu, iwo anatiphedza. Kodi ife tiri kukhundu yawo?— Ife tinakhala kukhundu yawo tingatumikira Yahova. Pontho tingatumikira Yahova, tinapangambo anango toera antumikirembo.