Mulungu Ali Na Dzina

UNGAGUMANIKANA na munthu paulendo wakutoma ninji cinambvundzisa iwe?— Ndimodi, usambvundzisa dzina yace. Anthu onsene ali na madzina. Mulungu apasa dzina mamuna wakutoma pa dziko. Iye ancemera Adhamu, pontho nkazace ancemera Eva.

Mbwenye, nee ndi anthu basi ali na madzina. Nyerezerambo pinthu pinango pyakuti piri na madzina. Munthu angakupasa bhoneka peno cinyama, nee usacipasa dzina?— Usacita pyenepi thangwi kukhala na dzina ndi kwakufunika kakamwe.

Yang’ana kudzulu namasiku, pontho ona kuti kuli na nyenyezi zingasi. Kodi izo ziri na dzina?— Inde, Mulungu apasa dzina nyenyezi ibodzi na ibodzi kudzulu. Bhibhlya isalonga: “Iye asadziwa kuti nyenyezi ziripo zingasi; iye asacemera ibodzi na ibodzi na dzina yace.”—Masalmo 147:4.

M’maonero ako, mbani wakufunika kakamwe kudzulu na pa dziko yapantsi?— Ndimodi, ndi Mulungu. Kodi iye ali na dzina?— Inde, Yezu alonga kuti Mulungu ali na dzina. Ntsiku inango Yezu pikhacita iye phembero alonga: ‘Ine ndadziwisa dzina yanu kuna anyakupfundza anga.’ (Juwau 17:26) Usaidziwa dzina ya Mulungu?— Iye ene Mulungu alonga dzina yace. Iye alonga: “Ine ndine Yahova. Ineyi ndi dzina yanga.” Natenepa dzina ya Mulungu ndi YAHOVA.—Izaiya 42:8.

Nee usakomerwa anthu angakucemera na dzina yako?— Yahova asafunambo kuti anthu adziwe dzina yace. Na thangwi ineyi, tisafunika kuphatisira dzina ya Yahova tingalonga thangwi ya Mulungu. Mpfundzisi Wankulu pikhalonga iye na anthu, akhaphatisira dzina ya Mulungu, Yahova. Ntsiku inango Yezu alonga: “Funa Yahova Mulungu wako na ntima wako onsene.”—Marko 12:30.

Yezu akhadziwa kuti dzina ya “Yahova” ndi yakufunika kakamwe. Na thangwi ineyi, iye apfundzisa atowereri ace toera aphatisire dzina ya Mulungu. Aapfundzisambo kuphatisira dzina ya Mulungu pakucita phembero. Yezu akhadziwa kuti Mulungu asafuna kuti anthu onsene adziwe dzina Yace, Yahova.

Kale kakamwe Mulungu apangiza Mose wakuti akhali m’bodzi wa ana a Izraeli, kuti dzina yace ndi yakufunika kakamwe. Aizraeli akakhala mu dziko ya Ejitu. Anthu akakhala mu dziko ineyi akhacemerwa Aejitu. Iwo akhatsalakana mwakuipa kakamwe Aizraeli, pontho akhali mabitcu awo. Pidakula Mose ayesera kuphedza mamuna m’bodzi wa dzindza yace. Pyenepi pyacitisa Farau, mambo wa ku Ejitu kuipirwa kakamwe mbafuna kupha Mose. Na thangwi ineyi, Mose athawa ku Ejitu.

Mose aenda ku dziko ikhacemerwa Midhiyani. Kweneko iye asemba mbabala ana. Pontho akhali nkumbizi wa mabira. Ntsiku inango, Mose pikhatsalakana iye mabira dhuzi na phiri, aona cinthu cakudzumisa kakamwe. Thendere ya minga ikhagaka moto, mbwenye nee ikhapya! Natenepa Mose afendedzera dhuzi toera aonesese mwadidi pikhacitika.

Usadziwa kuti ninji pidacitika?— Mose abva fala mbikancemera pakati pa thendere mbilonga: “Mose! Mose!” Mbani akhancemera?— Akhali Mulungu! Mulungu akhali na basa ikulu toera kupasa Mose kuti aicite. Iye alonga: “Ine ndinakutuma, toera uende kuna Farau, pontho iwe unadzabulusa mbumba yanga ya Izraeli mu Ejitu.” Mulungu apikira kuti mbadaphedza Mose kucita pyenepi.

Mbwenye Mose apanga Mulungu: ‘Ndingaenda kuna Aizraeli ku Ejitu mbandiapanga: Mulungu andituma kuna imwe, iwo angandibvundza: “Dzina yace mbani?” Ndinaatawira tani?’ Penepo Mulungu apanga Mose toera apange Aizraeli kuti: ‘Yahova andituma kuna imwe. Yahova ndi dzina yanga kwenda na kwenda.’ (Eksodho 3:1-15) Pyenepi pisapangiza kuti Mulungu mbadapitiriza kuphatisira dzinace yakuti Yahova. Iye nee mbadaicinja. Mulungu akhafuna kuti ndzidzi onsene anthu andziwe na dzina yace, yakuti Yahova.

Pidabwerera Mose ku Ejitu, Aejitu akhanyerezera kuti Yahova ndi Mulungu wakusowa basa kuna Aizraeli. Iwo nee akhakhulupira kuti iye ndi Mulungu wa dziko yonsene. Na thangwi ineyi, Mulungu apanga mambo wa ku Ejitu: ‘Ndinacitisa kuti dzina yanga idziwike pa dziko yonsene.’ (Eksodho 9:16) Mwandimomwene Yahova acitisa kuti dzina yace idziwike. Usadziwa kuti acita tani pyenepi?—

Iye apanga Mose toera atsogolere Aizraeli pikhabuluka iwo ku Ejitu. Pidafika iwo pa Bara Yakufira, Yahova afungula njira pakati pa bara, Aizraeli mbapita na pa mataka akuuma. Farau na anyankhondo ace aatowera mbapitambo pakati pa bara, pa ndzidzi unoyu, Yahova acitisa kuti madzi alimire makhundu mawiri ene, buluka penepo acitisa kuti madzi aphatane pontho, Aejitu onsene mbafa.

Pinthu pidacita Yahova pa Bara Yakufira, pyadziwika kuna anthu onsene, mu ndzidzi wakucepa. Tisadziwa tani pyenepi?— Pidapita pyaka 40, Aizraeli afika ku Kanani, dziko ikhadapikira Yahova toera kuapasa. Pidafika iwo kweneko, nkazi m’bodzi akhacemerwa Raabhe alonga tenepa kuna Aizraeli awiri: ‘Ife tabva kuti Yahova aumisa madzi a Bara Yakufira pamaso panu pikhabuluka imwe ku Ejitu.’—Yoswa 2:10.

Lero anthu azinji ndi ninga Aejitu anewa. Iwo nee asatawira kuti Yahova ndi Mulungu wa dziko yonsene. Na thangwi ineyi, Yahova asafuna kuti atumiki ace apange anango thangwi ya iye. Ndi pyenepi pidacita Yezu. Mu ndzidzi ukhafuna iye kufa, apanga Yahova mu phembero: “Ine ndaadziwisa dzina yanu.”—Juwau 17:26.

Usafunambo kukhala ninga Yezu? Natenepa panga anango kuti dzina ya Mulungu ndi Yahova. Pana anthu azinji akuti nkhabe dziwa dzina ya Mulungu. Pingakwanisika, apangize lemba ya Masalmo 83:18. Tende tifungule Bhibhlya toera tileri lemba ineyi pabodzi. Iyo isalonga: “Anthu mbadziwe kuti imwe dzina yanu ndi Yahova, ndimwe basi Wankulu Kakamwe pa dziko yonsene yapantsi.”

Lemba ineyi isatipfundzisanji?— Isatipfundzisa kuti dzina ya Yahova ndi yakufunika kakamwe kupiringana madzina anango onsene. Ineyi ndi dzina ya Mulungu Wamphambvu Zonsene, Pai wace Yezu Wakuti acita pinthu pyonsene. Kumbuka kuti Yezu alonga kuti tisafunika kufuna Yahova Mulungu na ntimathu onsene. Mphapo iwe usafuna Yahova?—

Tinapangiza tani kuti tisafuna Yahova?— Njira ibodzi, ndi kundziwa mwadidi ninga Xamwali wathu. Njira inango ndi kupanga anango thangwi ya dzina yace. Tinakwanisa kuapangiza kubulukira m’Bhibhlya kuti dzina yace ndi Yahova. Pontho tinakwanisambo kuapanga pinthu pyadidi pidacita iye. Pyenepi pisatsandzayisa kakamwe Yahova, thangwi iye asafuna kuti anthu andziwe. Ife tinakwanisambo kucita pyenepi, usaona tani?—

Nee ndi anthu onsene anafuna kutibvesera tingalonga thangwi ya Yahova. Anthu azinji nee akhabvesera pikhalonga Yezu, wakuti akhali Mpfundzisi Wankulu thangwi ya Mulungu. Ngakhale tenepo, Yezu nee asiya kulonga thangwi ya Yahova.

Tisafunika kukhala ninga Yezu, pontho tisafunika kupitiriza kulonga thangwi ya Yahova. Tingacita pyenepi, tinatsandzayisa Yahova thangwi tisapangiza kuti tisafuna dzina yace.