10 Kukhala Wakunyindirika

PYENEPI PISABVEKANJI

Anthu akunyindirika asabvera mitemo, asacita pinapikira iwo, pontho ndzidzi onsene asalonga undimomwene. Na thangwi ineyi, iwo asanyindirwa na anyakubalawo, axamwali awo, peno ale anaphatira iwo basa.

THANGWI YANJI NDI PYAKUFUNIKA KUKHALA WAKUNYINDIRIKA?

Kazinji kene, anthu akunyindirika asakhalambo na ufulu kakamwe.

“Toera kunyindirwa na anyakubala, mwana asafunika kucita pinthu mwandzeru, mbapangiza kuti ndi wakunyindirika, tayu basi anyakubalace angakhala dhuzi.”—Sarahi.

PINALONGA BHIBHLYA: ‘Pitirizani kudingika mwekhene toera mudziwe kuti ndimwe munthu wa ntundu wanji.’—2 Akorinto 13:5.

PINAFUNIKA IMWE KUCITA

Makhaliro anatowera anakuphedzani toera anthu akunyindireni peno mutome pontho kunyindirwa na ale akhadasiya kukunyindirani.

Longani undimomwene. Kulonga uthambi kunacitisa anthu kusiya kukunyindirani mwakucimbiza kakamwe, mbwenye mungalonga undimomwene ndzidzi onsene makamaka mungadodoma, anthu anakunyindirani.

“Ndi pyakukhonda nentsa kulonga undimomwene khala pinthu piri kufamba mwadidi. Mbwenye munthu angalonga undimomwene thangwi ya cinthu cakuipa cidacita iye, pinaphedza anthu toera kuona kuti iye athema kunyindirwa.”—Caiman.

PINALONGA BHIBHLYA: “Tisafuna kupangiza makhaliro akulungama mu pinthu pyonsene.”—Ahebheri 13:18.

Khalani wakunyindirika. Ku Estados Unidos abvundziswa anthu angasi akuti basa yawo ndi yakupitisa anthu basa, mwa ale adabvundza iwo, mapurusentu 78 alonga kuti pana makhaliro matatu akufunika kakamwe anasaka iwo kuna ale anafuna kupitiswa basa; nkhaliro ubodzi ndi kukhala wakunyindirika. Mungapfundza kukhala wakunyindirika cincino, pinakuphedzani mungakula.

“Anyakubalanga asaona ndingakhala wakunyindirika, mbandiphata mabasa anga nee dikhira kupangwa. Ndingacita pinthu pinapangiza kuti ndine wakunyindirika, iwo asandinyindirambo kakamwe.”—Sarah.

PINALONGA BHIBHLYA: “Ndisanyindira kuti iwe unacita pidakuphemba ine . . . ndisadziwa kuti iwe unacita pizinji kupiringana pidalonga ine.”—Filimoni 21.

Khalani wakupirira. Mwana angakula mbakhala na cimo cakulapha, onsene asakwanisa kuona kuti cincino iye ndi wathunga. Mbwenye kazinji kene, pasapita ndzidzi toera anthu akwanise kudzindikira kuti iye ndi wakunyindirika, pontho asacita pinthu mwandzeru.

“Anyakubalanu na anthu anango nee anakunyindirani basi ene thangwi mwapangiza kabodzi kuti ndimwe wakunyindirika. Mbwenye mwapang’ono pang’ono imwe munakwanisa kuaphedza toera akunyindireni mungakhala wakunyindirika ndzidzi onsene.”—Brandon.

PINALONGA BHIBHLYA: ‘Khalani akupirira.’—Akolose 3:12.