Misolo ya Ncenjezi

Udziwisi unakhala wakuphindulisa basi ene tingauphatisira. Mbwenye tisafunika kukhala akucepeseka toera kuphatisira pinapfundza ife. Nsolo uno unatiphedza toera kukhala akucepeseka mukupangiza kuti tinatowezera tani pitsandzo pya m’Bhibhlya pya ale adamwaza mphangwa kuna anthu a ntundu onsene, adacita phembero thangwi ya anango, mbadikhira mwakupirira toera Yahova acite pinthu.

Ife tikukhala m’midzidzi yakunentsa, pontho ndi pyakukhonda nentsa kukhala akutsukwala na akusowa cidikhiro. Yahova na Yezu anatiphedza, mbwenye tisafunikambo kubalangazana unango na ndzace. Nsolo uno unatipfundzisa kuti tinawangisana tani unango na ndzace mwaufuni.

Yahova ndi ‘Mulungu wakutsandzaya,’ pontho asafuna kuti atumiki ace akhale akutsandzaya. Ninji cinafuna kutiphedza toera kukhala akutsandzaya maseze tithimbane na nyatwa n’dziko ino ya Sathani? Pa nkhani ya Paphiri, Yezu apfundzisa kuti tinakhala tani akutsandzaya cincino na kwenda na kwenda.

Lero, anthu akukhala aumbirimi kakamwe. Mbwenye Akristu andimomwene ndi akusiyana thangwi iwo asafuna anthu na ntima onsene. Njira ibodzi inapangiza iwo ufuni ndi kutsalakana anango. M’misolo ineyi miwiri, tinadinga kuti Yahova asakhala tani wacitsalakano kwa ife tonsene, pontho tinapfundza kuti tinantowezera tani.