Kodi Imwe Mukhapidziwa?

Kodi moto ukhakwatwa tani pakucita ulendo mu ntsiku za Abhrahamu?

PA Genesi kapitulu 22, Bhibhlya isalonga kuti Mulungu apanga Abhrahamu toera kuenda kutali kakamwe na kunyumba kwace toera kapereka ntsembe. Natenepa, ‘Abhrahamu akwata nkhuni zakupisa nazo ntsembe mbazithukisa Izaki. Iye akwata moto na mpeni, mbaenda uwiri wawo.’—Genesi 22:6.

Bhibhlya nee isafokotoza kuti anthu a mu ntsiku za Abhrahamu akhakwata tani moto. Kodi Abhrahamu na Izaki akhadakwata moto wakugaka kale? Nyakufokotoza pya Bhibhlya unango alonga kuti panango nee mbadakwanisa kukwata moto wakugaka toera “kucita nawo ulendo mpaka kufika nawo.” Mbwenye ’mbuto mwace, Abhrahamu na mwanace panango akwata pinthu pinaphatisirwa toera kugasa moto.

Mbwenye anango asalonga kuti pikhali pyakunentsa kakamwe toera kuphatisa moto. Pikhali pyakukhonda nentsa kuphemba moto kuna nyakuendekana, m’mbuto mwa kuphatisa moto. Anyakupfundza kakamwe asalonga kuti Abhrahamu akwata cikalango mbacimangira na unyolo toera kuikha makala a moto udaphatisira iwo mbadzati kacita ulendo. (Izaiya 30:14) Natenepa, munthu akhakwata moto munjira ineyi mbadakwanisa kuuphatisira ndzidzi onsene ukhafuna iye.