Bvesesani Misangani ya m’Bhibhlya

M’Bhibhlya musagumanika misangani mizinji, mbwenye anthu azinji asanentseka toera kuibvesesa. (Mat. 13:13) Munacitanji toera mubvesese mwadidi misangani inagumanika m’Bhibhlya? Yeserani kucita ipi:

• Dzindikirani pinthu pinalandaniswa m’misangani ineyi. Misangani isalandanisa cinthu cibodzi na cinango. Mwacitsandzo, bukhu ya Apokalipse 3:3 isalonga kuti Yezu anabwera ninga mbava.

• Nyerezerani kulandana kwa pinthu. Onani kuti pinthu pinalandaniswa pisabverana tani.

• Khalani na cinyindiro cakuti mwabvesesa mwadidi. Midzidzi inango anthu nee asabvesesa mwadidi pinalonga misangani. Mwacitsandzo, nsangani udalongwa mu nsolo uno, nee usabveka kuti Yezu anabwera kudzaba cinthu. Mbwenye vesi ineyi isapangiza kuti ninga mbava, Yezu anabwera mu ndzidzi wakuti anthu nee asaudikhira.