Mibvundzo Inacitwa na Anyakuleri

Bukhu ya Misangani 30:18, 19 isalonga kuti “njira ya mamuna angakhala pabodzi na ntsikana” ‘ndi yakukhonda kubveseseka.’ Pyenepi pisabvekanji?

Anthu azinji, kuphatanizambo ale anadziwa pizinji thangwi ya Bhibhlya, nee asadziwa mabvekero a mafala anewa. Mavesi anewa athumburuzwa tenepa m‘Bhibhlya ya dziko ipswa: “Pana pinthu pitatu pyakuti pisandinentsa kupibvesesa, pinthu pinai pyakuti ine nkhabe kupibvesesa: Njira ya capungu kudzulu, njira ya nyoka pamwala, njira ya bote mʼbara, na njira ya mamuna angakhala pabodzi na ntsikana.”— Mis. 30:18, 19.

Kale, mafala akuti “njira ya mamuna angakhala pabodzi na ntsikana” tikhaabvesesa kuti ndi pinthu pyakuipa. Thangwi yanji? Thangwi mavesi anango a kapitulu ineyi asalonga pinthu pyakuipa na pyakuti nee pisalonga kuti “ndakwana.” (Mis. 30:15, 16) Kusiyapo pyenepi, vesi 20 isalonga pya “nkazi waupombo” wakuti asalonga kuti nee acita pinthu pyakuipa. Natenepa ife tikhanyerezera kuti ninga capungu cisamburuka kudzulu kakamwe, nyoka isafamba padzulu pa mwala, pontho bote isafamba m’bara yakuzika kakamwe, anthu mbakhonda dzindikira kuti papita pinthu, mamuna anakwanisa kucita pinthu, munthu mbakhonda dzindikira. Munjira ineyi, tikhabvesesa kuti mafala akuti “njira ya mamuna angakhala pabodzi na ntsikana” asalonga pinthu pyakuipa. Tikhabvesesa kuti m’phale anakwanisa kupeusa ntsikana mbakhonda dzindikira pifuno pya m’phale unoyu.

Tiri na mathangwi adidi akulonga kuti mavesi anewa asalonga pinthu pyadidi. Mwandimomwene nyakulemba mavesi anewa akhali wakudzumatirwa na pinthu pidalemba iye.

Mabukhu Acihebheri asapangizambo kuti mavesi anewa asalonga pinthu pyadidi. Mwakubverana na bukhu inango inalonga pya malemba Acihebheri, fala Yacihebheri idathumburuzwa kuti “pisandinentsa kupibvesesa” anagumanika pa Misangani 30:18 “asalonga pinthu pyakuti munthu asapiona ninga pyakudzumatirisa, pyakukhonda kwanisika na pyakutsandzayisa.”

Mpfundzisi wa universidhadhe ya Harvard ku Estados Unidos anacemerwa Crawford Howell Toy, alongambo kuti mavesi anewa a m’Bhibhlya nee asalonga pinthu pyakuipa. Iye alonga: “Mwandimomwene, mavesi anewa alembwa munjira inapangiza kuti pinthu pyenepi pikhali pyakutsandzayisa.”

Natenepa ndi pyakubveka kulonga kuti mafala anagumanika pa Misangani 30:18, 19 asalonga pinthu pyakutsandzayisa, pyakuti mwandimomwene pisanentsa kupibvesesa. Ninga nyakulemba wa mavesi anewa, ife tisadzumatirwambo tingaona capungu mbakamburuka kudzulu kakamwe, nyoka mbikafamba padzulu pa miyala, pontho bote yakulemera kakamwe mbikafamba m’bara na m’phale angasirirana na ntsikana, angamanga banja mbakhala pabodzi mwakutsandzaya.