Mibvundzo Inacitwa na Anyakuleri

Mpaka lini tinapitiriza kumwaza mphangwa?

Yezu alonga: “Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.” (Mat. 24:14) Fala Yacigerego idathumburuzwa kuti “kumala” pa vesi ineyi na pa vesi 6 na 13, isabveka kumala kwa dziko ino ya Sathani pa Armajedhoni. (Apok. 16:14, 16) Pyenepi pisabveka kuti tinapitiriza kumwaza mphangwa mpaka ndzidzi unafuna kutoma nkhondo ya Armajedhoni. Anewa ndi macinjo a njira ikhabvesesa ife kale.

Kale tikhabvesesa kuti mbatidasiya kumwaza mphangwa mu ndzidzi unafuna kutoma nyatwa ikulu, pa kufudzwa kwa Bhabhilonya Wankulu. (Apok. 17:3, 5, 15, 16) Tikhabvesesa kuti “ndzidzi unafuna Yahova kubvera ntsisi anthu” peno, ndzidzi wakuti Yahova mbadapasa anthu mwai wakutawira mphangwa zadidi, mbudamala pa kutoma kwa nyatwa ikulu. (Iza. 61:2) Ife tikhanyerezerambo kuti anthu akhafuna kupulumuka pa nyatwa ikulu basi ene ndi ale adakhala akukhulupirika kuna Yahova nyatwa ikulu mbidzati kutoma. Tikhanyerezera kuti anthu anewa akhafuna kupulumuka ndi ninga Ayuda adapulumuka pa kufudzwa kwa Yerusalemu mu caka 607 Kristu Mbadzati Kubalwa. Ayuda anewa akhalambira kale Yahova, pontho akhacita pinthu pyadidi, na thangwi ineyi akhadaikhwa cidzindikiro pa nkhope toera akhonde kufudzwa. (Ezek. 5:11; 9:4) Mbwenye pyenepi nee pikhabverana na mafala a Yezu anagumanika pa Mateu 24:14, anapangiza kuti anthu panango mbadakhala na mwai wakutawira mphangwa zadidi kumala mbakudzati kufika pa Armajedhoni.

Kubvesesa kwathu kupswa kwa Mateu 24:14, kwacinjambo njira ikhabvesesa ife mafala analonga pya kutongwa kunalandaniswa na miyala mikulu ya matalala inalongwa pa Apokalipse 16:21. Pidamala ife kupfundza mwadidi mavesi anewa, taona kuti iwo asabverana. Munjira ipi? Njira inatawira anthu mphangwa za Umambo isatiphedza toera kudziwa pyenepi. Mpostolo Paulu alemba kuti kuna “ale akuti ali kuenda kapulumuswa” mphangwa zenezi zinakhala ninga “khwema ya umaso.” Mbwenye kuna anyamalwa a Mulungu, mphangwa zenezi zinakhala ninga “khwema yakufa.” (2 Akor. 2:15, 16) Anyamalwa anewa akuti asakomerwa na dziko ino, asaida mphangwa za Umambo thangwi zisalonga kuti dziko ino ndi yakuipa, isatongwa na Sathani, pontho inafudzwa cincino.—Juw. 7:7; 1 Juw. 2:17; 5:19.

Bukhu ya Apokalipse 16:21 yalongambo kuti muliri unoyu wa miyala mikulu mbudakhala “ukulu kakamwe.” Pyenepi panango pisapangiza kuti ndzidzi wa nyatwa ikulu, basa yakumwaza mphangwa inakhala ya mphambvu kakamwe, peno dzina ya Yahova inadziwika kakamwe kupiringana kale. (Ezek. 39:7) Kodi pyenepi pisabveka kuti ndzidzi unoyu, Bhabhilonya angamala kufudzwa, anango anakomerwa na mphangwa za Umambo mbaziona ninga khwema yadidi? Pyenepi panango pinacitika. Panango iwo anakumbuka peno anabva kuti mu pyaka pizinji Mboni za Yahova zikhalonga pya kufudzwa kwa mauphemberi authambi.

Pyenepi pisatikumbusa pinthu pidacitika ku Ejitu, pidamala Yahova kubweresa miliri 10. Pidamala Yahova ‘kutonga alungu onsene a dziko ya Ejitu,’ “mwinji ukulu wa anthu akuti nee akhali Aizraeli” aenda pabodzi na mbumba ya Mulungu. (Eks. 12:12, 37, 38) Anthu anewa aenda pabodzi na Aizraeli, panango thangwi ya kuona kuti pinthu pyonsene pikhadalonga Mose thangwi ya Miliri Khumi pyacitikadi.

Onsene anafuna kusankhula kubvera Yahova pakumala kufudzwa kwa Bhabhilonya Wankulu, anakhala na mwai wakuphedzera Akristu akudzodzwa anafuna kugumanika pa dziko yapantsi mu ndzidzi unoyu. (Mat. 25:34-36, 40) Mbwenye mwai wakutongwa ninga mabira unamala Armajedhoni mbadzati kutoma, Akristu akudzodzwa onsene angamala kwenda kudzulu.

Kucinja kweneku kwa kubvesesa kwathu kusapangiza kuti Yahova ndi wantsisi kakamwe na waufuni. Mwandimomwene iye “nkhabe funa kuti munthu afudzwe, mbwenye asafuna kuti anthu onsene atcunyuke.”—2 Ped. 3:9.