Kodi Imwe Mukhapidziwa?

Anyantsembe akhacitanji na ciropa ca pinyama pikhaperekwa ninga ntsembe mu templo?

PYAKA pyonsene, anyantsembe mu Izraeli wakale akhapereka ninga ntsembe pinyama pizinji kakamwe pa guwa ya templo. Nyakulemba unango anacemerwa Josefo wa mu ndzidzi wa apostolo, alonga kuti mabira akupiringana 250.000 akhaperekwa ninga ntsembe pa Paskwa. (Lev. 1:10, 11; Num. 28:16, 19) Ninji pikhacitwa na ciropa ceneci?

Asiyentista akumba n’khundu-n’khundu mwa templo idamangwa na Herodhi. Iwo agumana djendje ikhapita na ciropa cikhataiwa pakumala kupereka pinyama ninga ntsembe.

Onani pinthu piwiri pikhaphedza toera guwa ipitirize kukhala yakucena:

• Djenje pantsi pa guwa: Bukhu inango inacemerwa Mishnah ya mu ndzidzi wakale inalonga pya misambo na mitemo Yaciyuda yakuti yalembwa pakumala kwa caka 200 yalonga thangwi ya djenje ikhaphatisirwa toera madzi apite. Iyo isalonga: “Pantsi pa guwa pakhali na madjendje mawiri. Ciropa cikhataiwa cikhabvungazikana na madzi mbacipita na m’madjendje anewa mpaka kufika ku gowa ya Sidhroni.

  Anyakufufudza pya m’madembe asatawirambo kuti madjendje akhaphatisirwa toera kutaya ciropa mbacipita mpaka ku gowa ya Sidhroni. Bukhu inango inalonga pya Ayuda isafokotoza kuti anyakufufudza agumana madjendje akuti panango akhaphatisirwa toera kutaya ciropa kuti cipite pabodzi na madzi.

• Madzi mazinji kakamwe: Toera guwa na djenje ikhapita na ciropa ipitirize kukhala yakucena, anyantsembe akhafuna madzi mazinji kakamwe. Madzi akhaphatisira iwo toera kutsalakana mabasa akufunika akhabuluka mu nzinda mbapita mu templo mukuphatisira mbuto zinapita na madzi, micera na matanki. Nyakufufudza anacemerwa Joseph Patrich alonga kuti nee pakhali na templo inango mu ndzidzi unoyu yakuti ikhali na njira yadidi kakamwe ya kufikisa madzi mu templo na yakubulusa madzi akupswipa kupiringana ineyi.