Tsamba Ya Mathubo Akutonga

Anyabasa Andzathu Akufunika:

Tiri akutsandzaya kakamwe kukulemberani pa kutoma kwa caka cino cakufunika kakamwe! Mpaka kunkhomo kwa caka 2014, Mambo wathu wakufunika, Yezu Kristu anadzakwanirisa pyaka dzana kubulukira pa ndzidzi udatoma iye kutonga pakati pa anyamalwa ace.​—Sal. 110:1, 2.

Pakutoma kwene kwa caka cino ca basa, pa nsonkhano wa caka wa Sociedade Torre de Vigia de Bíblias e Tratados de Pensilvânia, Komiti ya Bhibhlya ya Tradução do Novo Mundo yabulusa Bhibhlya idasasanyirwa papswa mbithumburuzwa mwadidi kakamwe n’Cingerezi, yakuti isagumanika kwa anthu onsene. Yahova aphatisira anace adabalwa na nzimu toera kulemba Bhibhlya yakutoma ya Tradução do Novo Mundo. (Arom. 8:15, 16) Ntsonga ineyi basi, isacitisa Bhibhlya ineyi kukhala yakupambulika, nee musatawira pyenepi?

Mu pyaka pizinji, Komiti Yakulemba ya Mathubo Akutonga isaikha pa mbuto yakutoma basa yakuthumburuza Bhibhlya. Lero, Bhibhlya ya Tradução do Novo Mundo yonsene peno khundu ibodzi isagumanika mu pilongero pyakukwana 121. Tisakuwangisani toera kupangiza kuna Yahova kuti musapasa ntengo kakamwe Bhibhlya iri na imwe. Ilerini mbamunyerezera mwacidikhodikho ntsiku zonsene. Natenepa, munadzafendedzera cifupi Mwanaciro, Yahova Mulungu.​—Tgo. 4:8.

Tisakhuyiwa kakamwe tingabva pya nyatwa zinagwerwa na abale na alongo athu akufunika. Mwandimomwene, midzidzi inango pisakhala pyakunentsa kwa iwo kutsandzaya pabodzi na abale awo. Mwacitsandzo, ku Azya, umaso wa banja inango wacinja kakamwe pa ndzidzi wakuti mama wa banja nkhabe kwanisabve kucita cinthu. Anyakudziwa pya ungumi ayesera pyonsene, mbwenye acimwana kucinja makhaliro. Ndi pyakutsukwalisa kakamwe! Cincino, mamuna asatsalakana nkazace masiku na masikati. Mwanawo wamamuna na anango awiri acikazi asapangiza citsandzo cadidi kakamwe ninga Akristu mu kutsalakana anyakubala awo mwaufuni. Banja yadidi ineyi na imwe monsene akuti musapembera pakuthimbana na nyatwa zakusiyana-siyana munakwanisa kukhala akukomerwa kubulukira mu kupirira mayesero a cikhulupiro canu. (Tgo. 1:2-4) Yahova asapasa cinyindiro Akristu akudzodzwa na mabira anango kuti tinadzakomerwa na kudziwa kuti tapitiriza kupirira nyatwa, thangwi tinadzapaswa nkhombo ya umaso wakukhonda mala!​—Tgo. 1:12.

Caka cidamala, anthu akukwana 19.241.252 agumanika pa Cikumbuso. Mphyakuwangisa kakamwe kuona anthu azinji mbakuza Yahova na Yezu Kristu mu kugumanika pa nsonkhano unoyu wakufunika kakamwe pacaka kwa atumiki a Mulungu! Mu ndzidzi wa Cikumbuso, yabveka fala ikulu yakusimba Yahova mu ndzidzi wakuti pikwi na pikwi pya anthu atumikira ninga apainiya akuphedza mu nthanda ya Murope na Bwinja. Mphyakuwangisa kakamwe! Kodi nee mwakomerwa kudziwa kuti ale anatumikira ninga apainiya akuphedza mu ndzidzi wa kucedzerwa na muyang’aniri wa cisa anakwanisa kugumanika pa nsonkhano onsene unacita iye na apainiya a ndzidzi onsene, ngakhale kuti kucedzerwa kweneku nee kunacitwa mu nthanda ya Murope na Bwinja? Anthu a maonero auzimu asadzindikira ntengo wakupitiriza kukhala akuwanga m’basa yakumwaza mphangwa na mabasa anango m’mpingo. Kukhala na basa izinji toera kucita kusatiphedza toera kupitiriza kukhala akuwanga nee kufewa, mbatipingiza mayesero a Dyabo toera kufewesa cikhulupiro cathu na kutipeusa.​—1 Akor. 15:58.

Ndi pyakuwangisa tani kudziwa kuti mu caka ca basa cidamala, anthu akukwana 277.344 apangiza kuperekeka kwawo mu kubatizwa m’madzi, akuti lero ali munjira ya ku umaso wakukhonda mala pabodzi na abale awo a dziko yonsene! (Mat. 7:13, 14) Anthu apswa anewa asafuna ciphedzo cathu toera akhale ‘akuwanga mu cikhulupiro.’ (Akol. 2:7) Pitirizani kuwangisana unango na ndzace toera kupirira mpaka kumala kwa pyonsene. (Mat. 24:13) ‘Longani mwakuwangisa kwa ale akuti ali akutsukwala, balangazani ale akuti ndi akufewa, phedzani ale anasowa mphambvu, khalani akukhurudzika kuli anthu onsene.’ (1 Ates. 5:14) Pakumalisira, tendeni tonsene ‘ticite phembero mwakukhonda phonya’ mbatilonga: “Umambo wanu mbudze.”​—1 Ates. 5:17; Mat. 6:10, Tradução do Novo Mundo.

Taphata miyendo, komerwani na kuleri bukhu iyi, pontho dziwani kuti tisafuna m’bodzi na m’bodzi wa imwe akuti musafuna Yahova!

Abale anu,

Mathubo Akutonga a Mboni za Yahova