Pangizani Kukhala Ana A Baba Wanu—Mphangwa izi zabuluswa mu Anuário das Testemunhas de Jeová de 2013
Tsamba 89 ndima 3, mpaka tsamba 90 ndima 1—Myanmar
Apainiya Acipapo
Fred Paton alonga: “Mu pyaka pinai pikakhala ine mu dziko ya Birmânia, ndamwaza mphangwa m’mbuto zizinji za dziko ineyi. Mu ndzidzi unoyu ndaphatwa na utenda wa malaria, kuphandza, na nyatwa zinango za ungumi. Pakumala kwa ntsiku m’basa ya m’munda, kazinji kene nee ndikhali na mbuto toera kugona. Mbwenye, ndzidzi onsene Yahova akhatsalakana pifuno pyanga, pontho andikoya kubulukira mwa mphambvu yace.” Frank Dewar, mamuna wakupirira wa ku Zelandiya alonga: “Ndathimbana na maphanga, anthu akupanduka na anyakutonga akudzikuza. Mbwenye kazinji kene ndadzindikira kuti ndinakwanisa kuthimbana na mipingizo ndingakhala na makhaliro adidi ninga kucepeseka, kulekerera na kukoma ntima. Azinji akhaona kuti Mboni za Yahova ndi anthu adidi.”
Apainiya enewa akhali akusiyana na alendo anango akhali mu dziko ineyi akuti kazinji kene akhapwaza anthu a pa cisa. Apainiya apangiza cilemedzo na ufuni. Makhaliro awo adidi na kucepeseka kwakhuya mitima ya anthu a ku Birmanes akuti akhatawira mphangwa na cilemedzo tayu mwacipwazo. Kubulukira m’mafala na macitiro awo, apainiya enewa apangiza kuti Mboni za Yahova ndi Akristu andimomwene.—Jwau 13:35.
Tsamba 164 ndima 1
Conzi ca Nargis
Tobias Lund m’bodzi wa nsoka wa basa yakuphedza alonga: “Ine na nkazanga Sofia tagumana May Sin Oo, ntsikana wa pyaka 16 wakuti akhali ekhene ninga m’mwazi mphangwa pa banja yawo mbakaumisa Bhibhlya yace pa dzuwa pakati pa magolomondo a nyumba yawo. Mudationa iye, atoma mwetulira, mbwenye misozi ikhabuluka m’maso mwace. Mwakucimbiza nsoka wakumanga nyumba wafika na pyapeu, mafaramento toera kumanga nyumba ya banja ineyi. Anyakuendekana awo akhali akudzumatirwa. Pontho anthu akhala ntsiku zingasi mbakaona kumangwa kwa nyumba ineyi, yakuti yadzakhala yakubalika kakamwe pa cisa. Pyenepi pyakhuya kakamwe anthu a cisa ceneci mbalonga kuti: ‘Ife cipo taona pinthu ninga pyenepi! Gulu yanu ndi yakubverana na ya ufuni. Tisafunambo kukhala Mboni za Yahova.’ Anyakubala a May Sin Oo na abale ace ang’ono asagumanika pa misonkhano, pontho banja yawo yonsene ikukula mwauzimu.”