Ninji Pinatikulumiza Toera Kumwaza Mphangwa?
1. Panakubverana kwanji pakati pa ufuni na utumiki wathu?
1 Kumwaza mphangwa zadidi za Umambo wa Mulungu ndi basa yakufunika kakamwe yakuti tinakwanisa kucita mu ntsiku zino. Mwandimomwene, na basa ineyi tisapangiza kubvera matongero mawiri makulu, kufuna Yahova na kufuna anyakuendekana athu. (Mko. 12:29-31) Kufuna kusatikulumiza toera kukhala atumiki aphinga.—1 Jwau 5:3.
2. Kumwaza kwathu mphangwa kusapangiza tani kufuna Yahova?
2 Kufuna Yahova: Kufuna Yahova ninga xamwali wa pantima kusaticitisa kulonga pinthu pya kuntsidzikiza. Cifupi na pyaka 6.000, Yahova asapambizirwa na Sathani. (2 Akor. 4:3, 4) Natenepa, anthu asatawira kuti Yahova asathabusa anyakudawa mu infernu, kuti iye ndi Utatu wakukhonda bveka, pontho kuti iye nee asatsalakana anthu. Azinji asafika pakulonga kuti iye nee alipo. Natenepa, tisafuna kakamwe kuti anthu adziwe undimomwene unalonga pya Yahova! Kuwangisira kwathu mu utumiki kusantsandzayisa kakamwe, pontho kusatsukwalisa Sathani.—Mis. 27:11; Aheb. 13:15, 16.
3. Ndi mu njira ipi utumiki usapangiza ufuni kwa anyakuendekana athu?
3 Kufuna Anyakuendekana Athu: Ndzidzi onsene unapereka ife umboni kwa munthu, tisapangiza ufuni kwa iye. Anthu akusowa cidikhiro asafuna kubva mphangwa zadidi m’midzidzi ino yakunentsa. Azinji ali ninga anthu a ku Ninive mu ndzidzi wa Yona akuti “akukhonda kusiyanisa pyadidi na pyakuipa.” (Yona 4:11) Utumiki wathu usapfundzisa anthu kuti anakhala tani mwadidi, pontho na umaso wakutsandzaya. (Iza. 48:17-19) Usaapasa cidikhiro. (Arom. 15:4) Iwo angabvesera, mbacita pinapfundza iwo, ‘anadzapulumuswa.’—Arom. 10:13, 14.
4. Kodi Yahova nee anadzaduwalanji?
4 Anapiana adidi nee asapangiza ufuni kwa anyakubalawo basi ene mu ndzidzi wakucepa. Iwo asaafuna mu ndzidzi onsene. Sawasawa, kufuna kakamwe Mulungu na anyakuendekana athu kunadzatikulumiza kubanza miyai toera kupereka umboni ndzidzi onsene, tayu mu ndzidzi wakucepa. Tinadzamwaza mphangwa nee kupuma. (Mach. 5:42) Yahova nee anadzaduwala ufuni wathu.—Aheb. 6:10.