Bokosi Ya Mibvunzo

◼ Asafunika anyakubala awiri ene kulemba n’dzidzi unaphatisira iwo towera kucita pfunziro ya banja yakukhonda phonya?

Maseze ndi ababa anafunika kuti apfunzise pakutoma anawo towera ‘aakuze ninga munafunira Mbuya,’ anyakubala awiri ene asafunika kucita khundu mu kupfunzisa anawo. (Aef. 6:4) Bhibhlya isawangisa anapiana: “Mwananga, bvesera malangiro a babako mbuleka kupwaza pinakupanga mako.” (Mis. 1:8) Khundu ibodzi yakufunika kakamwe ya kupfunzisa kwa anyakubala ndi pfunziro ya Bhibhlya ya pabanja.

Kalene, akhalemba n’dzidzi ndi nyakubala basi akhacitisa pfunziro ya pabanja na anapiana akukhonda kubatizwa, ngakhale kuti anyakubala awiri ene acita khundu m’pfunziro. Natenepa, pyenepi piri kucinjwa. Khala pakucita pfunziro ya banja anyakubala awiri ene acita khundu mu kupfunzisa anapiana, uwiri wawo anakwanisa kulemba n’dzidzi ubodzi pa sumana ninga basa ya utumiki wa m’munda. Ndimomwene kuti kazinji kene anyakubala asaphatisira n’dzidzi wakupiringana ubodzi pa sumana pakupfunzisa anawo. Towera kupfunzisa anapiana, anyakubala asafunika kuti awangisire kakamwe. (Deut. 6:6-9) Mbwenye, lipoti ya nthanda zonsene ya basa ya m’munda isafunika kupangiza makamaka pinacitwa mu utumiki wa m’munda. Na thangwi ineyi, nkhabe funika kulemba n’dzidzi wakupiringana ubodzi pa sumana, ngakhale kuti pfunziro yapiringana n’dzidzi ubodzi, isacitwa kazinji kene pa sumana, peno mapfunziro akusiyana-siyana asacitwa na anapiana. Ndi nyakubala m’bodzi basi anafuna kulemba pfunziro ya Bhibhlya ya pabanja na ndi ulendo ubodzi basi wakubwereza unafuna kulembwa pa sumana inacitwa pfunziro ineyi.