Kubwerezera Kwa xikola Ya Utumiki Wa Mulungu
Mibvunzo ya kubwerezera pidapfunzwa inatowerera iyi inadzadingwa pa Xikola Ya Utumiki Wa Mulungu nkati mwa sumana 25 ya nthanda ya Malimwe ya 2008. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa mu nkhani za sumana 7 ya nthanda ya Maluwa mpaka sumana 25 ya nthanda ya Malimwe ya 2008.
Luso Yakulonga
1. Kodi tinakwanisa tani kupangiza ulinganiri munagawana ife undimomwene na anango? (Afil. 4:5) [be tsa. 251 ndima 3] Ife tisafunika kunyerezera pya makuziro, makhaliro na mabvero a anthu ale analonga na ife na kukhala akufunisisa kungonjera pingafunika. Kutsalakana anango mu njira ineyi kungakwanise kuaphedza kukhala akufuna kakamwe kubvesera munadinga ife nawo Malemba.
2. Kodi njira idaphatisira Paulu mukhalonga iye na Agrego ku Areopago inakwanisa tani kutiphedza munapereka ife umboni kwa ale akuti nkhabe lemedza Biblya? (Mach. 17:22, 23) [be tsa. 252 ndima 1-2] Mudapereka iye umboni kwa Agrego ku Areopago, Paulu hadatoma na kulonga Malemba tayu. Mbuto mwace, iye atoma kulonga pinthu pyakuti iwo akhapidziwa na akhapitawira, na iye aphatisira pinthu pyenepi towera kuacitisa kudinga Nciti na pifuniro Pyace. Nakuti anthu azinji asafuna makhaliro adidi, tingakwanise kupangiza citsalakano ku pinthu pinaadzudzumisa na buluka penepo kupangiza pinalonga Biblya.
3. Maseze tikhale na cinyindiro cakuti pinalonga munthu anacedza na ife ndi pyakudawika, kodi tinakwanisa tani kupangiza ulinganiri pakulonga naye? [be tsa. 253 ndima 1-2] M’midzidzi inango, pingakwanise kukhala pyadidi kupereka kwene basi takhuta kwa munthu thangwi ya maonero ace na kugomezera ntsonga inango yakuti inadzaphindulisa. Ife tisafunika kukumbuka kuti basa yathu ndi yakupereka ‘umboni,’ tayu kukakamiza anango kuti akhulupire ninga pinacita ife. (Mat. 24:14) Anthu asafunika kusankhula okhene pinafuna iwo kukhulupira, na nee tisafunika kuakhondesa.
4. Munawangisira ife kulonga mu njira yakutundusa, kodi tisafunika kukumbukanji? [be tsa. 255 ndima 3, bokosi] Anthu nee anadzakhulupira peno kucita macinjo angakhonda kudzindikira kuti pinalonga ife ndi undimomwene. Pinalonga ife pinakhala pyakuphata ntima khala pisabverana na Mafala a Nciti wa kudzulu na pantsi. Towera kudinga pipangizo pya Malemba pya pikhulupiro pyathu, ife tisaphedzwa kakamwe na mabukhu a mbandazi wakukhulupirika na wanzeru.
5. Kodi tinakwanisa tani kuphatisira nzeru towera kukhuya ntima wa nyakubvesera? (Mis. 20:5) [be tsa. 258-9 ndima 1] Munthu wa nzeru asatsalakana mabvero na pidacitisa nyakubvesera wace kunyerezera tenepo. Kukulisa luso yathu ya kudinga mwadidi pinthu kunadzatiphedzambo. Munadinga ife ntsonga inango, tisafunika kuona macinjo onsene a nkhope na malongero a nyakubvesera wathu.
Nkhani n.° 1
6. Kodi alongo asafunika kukumbukanji angapaswa nkhani? [be tsa. 44 ndima 5-6] Angapaswa nkhani, alongo asafunika kudinga ntsonga ya nkhani yawo, munthu anafuna kulonga na iwo, na ntsonga ya luso yakulonga idapaswa iwo kuti aidinge.
7. Kodi abale asafunika kukhala na cifuno cipi munakamba iwo nkhani ya kuleri Biblya kwa sumana na sumana? (Neh. 8:8) [be tsa. 47 ndima 2-3] Cifuno ca nkhani ya kuleri Biblya kwa sumana na sumana ndi ca kufokotoza Mafala a Mulungu, kupangiza mabvekero awo, na kupereka mafokotozero adidi. Asafunika kupangiza kuti mphangwa zenezi zisatikhuya tani lero. Pa kukhunganyika, abale asafunika kudinga m’phembero pyakufuna pya mpingo na kulonga pyakufuna pyenepi mu kugomezera midida ya Biblya kubulukira m’makapitulu a sumana ineyi.
8. Kodi asafunika kucita tani m’bale adapaswa nkhani pa Nsonkhano Wa Basa yakuti iri na cipangizo peno mibvunzo na matawiro? [be tsa. 50 ndima 1] Nakuti pipangizo pisapereka citsanzo kwa mpingo towera kusangizira, ipyo pisafunika kukhunganywa mwadidi. Abale anapaswa nkhani zakuti ziri na pipangizo peno mibvunzo na matawiro asafunika kuwangisira towera kuyesera na anthu anafuna kupicita mbisati fika ntsiku ya nsonkhano.
9. Kodi bukhu ya Machitiro isagomezera tani njira inafuna kuperekwa umboni na isapangiza kuti unaperekwa mpaka kupi? (Mach. 20:20, 21; 28:23) [bsi08-1 tsa. 16 ndima 35] Paulu apereka citsanzo cakuti iye ‘hadakhonda’ tayu ‘kupfunzisa pa nsonkhano na m’midzi.’ Ntsonga ineyi ya ‘kupereka umboni mwakukwana’ isalongwa m’bukhu yonsene ya Machitiro.
10. Kodi nyakukamba nkhani yapakweca asafunika kucitanji towera kukhala na cinyindiro cakuti Biblya ndi phata ya nkhani yace? (Mach. 17:2, 3) [be tsa. 52 ndima 6–tsa. 53 ndima 2] M’bale anaphembwa kuti acite nkhani yapakweca nee asafunika kunyerezera kakamwe pya mafala anafuna kuphatisira iye towera kufokotoza ntsonga zinagumanika mu tsamba ya nkhani tayu. Mbuto mwace, iye asafunika kunyerezera kuti ntsonga zenezi zisabverana tani na Malemba. Iye asafunika kubvunga ndzidzi towera kuleri, kufokotoza, kupangiza na kuphatisira malemba adasankhula iye mbuto mwa kuphatisira tsamba ya nkhani basi.
Kuleri Biblya Kwa Sumana
Na Sumana
11. Thangwi yanji nyakuonera kalaboxo akhafuna “kupheka ekha”? (Mach. 16:25-27) [w90 15/5 tsa. 25, bokosi] Citeketeke cikhadafungula misuwo ya kalaboxo na casudzula cimangiro ca ale akhali n’kalaboxo. Mwambo wa ku Roma ukhalonga kuti munthu angathawa nyakuonera kalaboxo ndiye akhafunika kucitwa pire pikhafuna kucitwa nyakuthawa. Pisaoneka ninga nyakuonera kalaboxo akhafuna pyace kufa mu kupheka, kwakuti panango ndi kukhadikhira anango a ale akhali n’kalaboxo.
12. Kodi Aristarko na Gayo acita tani mu ndzidzi ukhatcingwa iwo? (Mach. 19:29; 20:4, 5) [w08 15/2 tsa. 10 ndima 16-17] Mu ndzidzi ukhakwekwetwa iwo kuenda ku nthando ya pisango na mwinji wa anthu akuipirwa wakuti panango cilengeso cawo cikhali pikwi pizinji, mphyakukwanisika kuti Aristarko na Gayo akhadikhira kuti afe. Mbwenye, nkhabepo cipangizo cakuti iwo akhala akusowa cipapo. Nthanda zingasi patsogolo pace amuna anewa awiri aperekera Paulu pa ulendo wace wacitatu wa umisionaryo mwakukhonda tsalakana makhaliro anewa akugopswa.
13. Kodi kulonga kuti Saulu ‘akhathusa na mapfena’ pisabvekanji? (Mach. 26:14) [w03 1/10 tsa. 32] Fala yakuti ‘kuthusa na mapfena’ isafokotoza pikhacitikira cinyama cakuti caphekeka cokhene mukhathawa ico utale wakusongoka wakuti ukhacitwa towera kupitisa na kutsogolera cinyama. Saulu mbadaphekeseka ekhene mu kuthabusa Akristu, thangwi mu kucita tenepo iye mwandimomwene akhathimbana na Mulungu. Saulu aphatisira uphungu wa Yezu, acinja n’khaliro wace na adzakhala Nkristu wakufunika mpostolo Paulu. Pa Koelete 12:11, uphungu waumulungu usalandaniswa na mbirira zinafambisa mabira thangwi izo zingakwanise kutiwangisa na kutitsogolera mu njira yadidi tingapifuna.
14. Kodi anakwanisa tani “madawo” kutambira citsogolero kubulukira ku matongero a Mulungu kwa Israele? (Arom. 7:8, 11) [w08 15/6 “A Palavra de Jeová É Viva — Destaques da carta aos romanos”] Mwambo waphedza anthu kudziwa kukula, peno kuinjipa, kwa madawo, mbipiacitisa kudziwa mwadidi kuti kukhala anyakudawa pisabvekanji. Natenepa, iwo adzindikira okhene kuti ndi anyakudawa mu njira zizinji, na anthu azinji akhapangizika ninga anyakudawa.
15. Kodi tisaikha tani “makala a moto” pa nsolo wa nyamalwa onsene? (Arom. 12:20) [w08 15/6 “A Palavra de Jeová É Viva — Destaques da carta aos romanos”] M’midzidzi ya Biblya, miyala yakucita nayo utale ikhaikhwa mu ubvuni wakukhala na makala a moto padzulu na pantsi. Kupisa kwakuthimizirika kwapadzulu kukhacitisa utale kunyunguluka na kuusiyanisa na pinthu pyakukhonda funika. Mu njira ibodzibodzi, ife tisaikha makala a moto pa nsolo wa nyamalwa onsene mu kuncitira pinthu pyadidi towera n’khaliro wace wakuipa unyunguluke na makhaliro adidi aonekere.