Kodi Banja Yanu Ikukhunganyika Towera Ipulumuke?
1 Kukwanirisika kwa profesiya ya Biblya kusapereka cipangizo cakunyindirika ca kumala mwakucimbiza kwa dziko ino yakuipa. Ife tikukhala m’midzidzi yakunentsa yakulandana kakamwe na ikhaoneka Cigumula mbicisati kucitika. (Mat. 24:37-39) Noa apulumuka pa kufudzwa kwa dziko ineyi yakale thangwi yakuti iye ‘akhatawira’ peno akhacita pinthu mwakubverana na Mulungu wandimomwene. (Gen. 6:9) Mphyakukwanisika kuti Noa apfunzisa banja yace njira za Yahova thangwi iyombo yapulumuswa. Kodi ndi mu njira ipi tinakwanisa kusangizira Noa na kukhunganyika ninga banja towera kupulumuka pa kumala kwa makhaliro ano akuipa a pinthu?
2 Mpfunzisi Wa Udidi: Noa apirira m’piaka 40 mpaka 50 ninga ‘mpfunzisi wa udidi.’ (2 Ped. 2:5) Anyakuendekana ace, peno pantsi pa cikakamizo ca aanju akupanduka peno nkhabe, mphyakukwanisika kuti anseka thangwi ya kumwaza kwace mphangwa. Mu utumiki wathu kazinji kene tisagumanikana na anthu akukhonda kufuna kubva na akusingirira, kupangiza kuti makhaliro ano a pinthu ali duzi na kumala. (2 Ped. 3:3, 4) Mbwenye, mwakusiyana na anthu a mu ntsiku za Noa, azinji asatawira kuwangisira kwathu na ‘asabwera’ towera kulambira Yahova. (Iza. 2:2) Tingakhala akupirira, ‘tinadzapulumisika ife ene na ale anatibvera.’ (1 Tim. 4:16) Ndi pyakufunika tani kwa anyakubala kupfunzisa anawo m’mafala na mu citsanzo pya kufunika kwa kucita basa ya kumwaza mphangwa mwakucimbiza!—2 Tim. 4:2.
3 Noa Acita ‘Ninga Mudampangira Iye’: Kupulumuka kwa Noa na banja yace kwanyindira kutowezera kwawo mwacidikhodikho pitsogolero pya Yahova. (Gen. 6:22) Ndi pyakufunikambo kwa ife lero kukhala ‘akubvera’ citsogolero ca Biblya na ca mbandazi wakukhulupirika. (Tgo. 3:17) Mamunankulu unango m’banja ibodzi asakumbuka kuti babace aphatisira tani pitsogolero pyakubuluka ku gulu ya Yahova. Mwacitsanzo, iye akhacitisa pfunziro ya banja masumana onsene na akhaenda na banja mu utumiki m’masabudu na m’madimingu onsene ninga munafunikira ipyo. Iye akhawangisira towera kuenda na m’bodzi wa anace mu utumiki pa sumana ibodzi na ibodzi. Kuwangisira kwace kucita ‘ninga mudapangirwa’ iye kwakhala na maphindu adidi kwa anace, na onsene atanthatu akula mbadzakhala anzakazi akukhulupirika a Yahova.
4 Kumala kwa makhaliro ano a pinthu kunabwera mwakudzidzimusa. (Luka 12:40) Mu kusangizira Noa na kukhala na cikhulupiro towera kupulumuka, ife na banja yathu mwandimomwene tinadzakhala akukhunganyika!—Aheb. 11:7.