Kodi Imwe Mukucita Khundu M’profesiya Yakupambulika Ya Biblya?

Biblya isalonga pya ndzidzi wakuti anthu ‘akulonga pilongero pyonsene pya madzinza,’ anadzabva mphangwa zadidi za Umambo wa Mulungu. (Zak. 8:​23, Tradução do Novo Mundo) Profesiya ineyi yakupambulika ya Biblya ikukwanirisika lero. Mu dziko ya Mosambiki pingasi pya pilongero pyenepi ndi: Cilomwe, Cimakuwa, Cindau Cisena, Citshwa, Cixona na Cixuabo. Inde, azinji analonga pilongero pyenepi asabva mphangwa zadidi za Umambo wa Mulungu kubulukira m’mabukhu anafokotoza Biblya anabuluswa m’pilongero pyawo.

Ife tingakwanise kucita khundu mwakukwana mu kukwanirisa Zakariya 8:​23 mu kuphatisira mabukhu a cilongero capacisa. Munamwaza ife mphangwa zadidi, tisafunika kugawira na kuphatisira mabukhu anafokotoza Biblya m’pilongero pinalongwa na anthu azinji pa cisa cathu. Pa misonkhano ya mpingo tisafunika kuphatisira mabukhu a cilongero capacisa khala alipo. Mu njira ineyi ife tisacita khundu mu kukwanirisa Zakariya 8:​23, NM.

Mbwenye, pana anthu azinji akuti nkhabe kuleri cilongero cawo. Kodi tinakwanisa tani kuphedza anthu anewa? Khala imwe nkhabe kwanisa kuleri cilongero canu, banzani mwai wa xikola yakupfunzisa kuleri na kulemba idakhunganywa na gulu ya Yahova, yakukhonda kulipa, pa mpingo wanu wapacisa. Towera kugumana mphangwa zakuti munacitisa tani xikola ineyi, dingani Nosso Ministério do Reino wa Janeiro de 2002, tsamba 7.

Citani khundu mwakukwana mu kuphedza anthu analonga cilongero capacisa canu. Mwazani mphangwa zadidi mu cilongero cawo cene. Lerini mabukhu anafokotoza Biblya mu cilongero cakuti angakwanise kucibva mwakukhonda nensa. Mu njira ineyi imwe munadzacita khundu mwakukwana m’profesiya yakupambulika ya Biblya yakuti ikukwanirisika lero.