Kubwerezera Kwa Xikola Ya Utumiki Wa Mulungu
Mabvunzo a kubwerezera pidapfunzwa akutowerera awa anadzadingwa pa Xikola Ya Utumiki Wa Mulungu nkati mwa sumana 25 ya nthanda ya Khoni ya 2007. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa mu nkhani za sumana 7 ya nthanda ya Gonkho mpaka sumana 25 ya nthanda ya Khoni ya 2007. [Cidzindikiro: Pangasoweka pipangizo peno mabukhu adabuluswa nkhani kunkhomo kwa mbvunzo, imwe musafunika kusaka-saka m’mabukhu towera mugumane matawiro.—Onani Escola do Ministério, tsa. 36-7.]
Luso Yakulonga
1. Munalonga ife, kodi tinakwanisa tani kupungula kupswipa ntima towera kulungamisa mwadidi fala yathu? [be tsa. 184 ndima 3-tsa. 185 ndima 2]
Cakutoma, tisafunika kukhala na maonero adidi a anyakubvesera athu. Khala ndi anthu anagumana ife m’munda, tisafunika kukumbukira kuti iwo asafunika kubva undimomwene wakufunika unadziwa ife wa cifuniro ca Yahova, khala asacidzindikira peno nkhabe. Khala tiri kukamba nkhani pa Nyumba ya Umambo, tisafunika kukumbukira kuti tiri kulonga kwa axamwali, na iwo asafuna kuti ticite mwadidi. Caciwiri, nkhaliro wadidi wa fala yathu unakwanisa kulungama tingasudzula khosi yathu, kholongo na mapewa.
2. Kodi tinakwanisa tani ‘kucitika munthu wa onsene’ mu utumiki wathu? (1 Akor. 9:20-23) [be tsa. 186 ndima 2-4]
Njira ibodzi ndi kuyang’ana cipangizo ca pinafuna anthu, pikhulupiro pya uphemberi, peno makhaliro a banja mbatisati kulonga nawo. Tsalakanani mwadidi kuti munafikira tani anthu na upereki umboni wakuti unadzakhala wakuaphedza kakamwe. Tisafunika kucicita kukhala cifuno cathu ca kukhunganya ntsonga za m’Malemba zakuti zinaphata basa kwa anthu akusiyana-siyana anafuna kudzagumanikana na ife m’munda. (1 Tim. 2:4)
3. Kodi tinasangizira tani citsanzo ca Yahova ca kubvesera anango? (Gen. 18:23-33; 1 Am. 22:19-22) [be tsa. 187 ndima 1-2, 5]
Tisacita pyenepi mu kuwangisa anango kulonga okhene na kuabvesera mwandimomwene munalonga iwo. Pakumala kucita mbvunzo wakuthema, tisafunika kulimira mu nzidzi wakukwana towera iwo atawire. Kukhala kwathu “wakuchimbiza na kubva” kunapasa cidzindikiro kuti tisalemedza manyerezero na mabvero a anango. (Tgo. 1:19; Arom. 12:10)
4. Kodi ndi mu njira zipi zakuphata basa zakuti tinakwanisa kuphedza anango kuenda kutsogolo mwauzimu? [be tsa. 187 ndima 6–tsa. 188 ndima 3]
Kulonga anango m’maphembero athu kunadzatikulumiza kupitiriza kuanyerezera na cifuno ca kugawana nawo undimomwene wa Biblya wakukwanirisa mwadidi pifuno pyawo. Tisafunika kuphedza anyakupfunza Biblya kudinga m’mabukhu mwathu towera kuaphedza kuthimbana na pinthu pinayang’anisana na iwo. Mu nzidzi onsene cifuno cathu ndi kutawirisa Mafala a Mulungu na nzimu towera kuakulumiza, thangwi Yahova asafuna anthu akuntumikira na ntima wakufuna. (Sal. 110:3)
5. Thangwi yanji tisafunika kudzudzumika na kupangiza cilemedzo kwa anango? [be tsa. 190 ndima 3, bokosi]
Kupangiza cilemedzo kwa anango ndi ntemo kwa Akristu wakuti usakulisa nkhaliro wadidi na anango ali na cipendamiro ca kutawira mphangwa zinamwaza ife. Kulemedza anango kunakwanisa kubulusa mipingizo ya kudziwisa kwathu mphangwa zadidi.
Nkhani N.° 1
6. Thangwi yanji tisafunika kuwangisira kukhuya mitima ya anthu anapfunzisa ife? [be tsa. 59 ndima 1]
Pyenepi ndi pyadidi thangwi ulambiri wandimomwene si kuikha ntsonga zingasi basi mu nsolo na kutawira mitemo mingasi tayu. Iwo usanyindira uxamwali wadidi na Yahova na kupereka takhuta ku njira zace. (Deut. 10:12, 13; Luka 10:25-27)
7. Kodi citsanzo cathu cinakhuya tani anthu anapfunzisa ife? [be tsa. 61 ndima 1]
Pyakucita pyathu pisapasa citsanzo cakuphata basa cakuti tisaphatisira tani pinthu pinapfunzisa ife. Anapiana anasangizira anyakubala awo asafuna kudziwa kuti anyakubala awo asapibva tani mu kucitambo pinacita iwo. Mu njira ibodzibodzi, anthu anapfunzisa ife ‘angatisangizira ninga ife tisasangizirambo Kristu,’ iwo anatoma kutambira nkhombo za kufamba mu njira za Yahova. (1 Akor. 11:1)
8. Kodi tinalungamisa tani luso yathu ya kuceza panyumba? [be tsa. 62 ndima 3]
Thanyo yakufunika kakamwe towera kulungamisa luso yathu ya kuceza panyumba ndi kunyerezerana unango na nzace kubulukira mu ntima. (Deut. 6:6, 7; Mis. 4:1-4) Cinthu cinango cakufunika ndi kukhala na cinthu cakuphindulisa towera kulonga. Ntsonga za ndandanda wathu wakukhonda phonya wa kuleri Biblya na pfunziro, pyakugumana napyo pyakukomeresa pya utumiki wa m’munda na nkhani zinango zakuwangisa zinakwanisa kutitsogolera ku makani adidi pa banja.
9. Kodi ndi citsanzo cipi caphinga ya cipapo cinagumana ife kwa mprofeta Yeremiya? [si tsa. 129 ndima 36]
Yeremiya akhali wakukhonda gopa mu kumwaza mphangwa zakukhonda dziwika kwa mbumba yakuipa. Iye akhonda kufambirana na anthu akuipa. Iye akhadziwa kucimbiza kwa mphangwa za Yahova, mbacita basa ya Yahova na ntima wace onsene mbakhonda kusiya. Iye adzindikira kuti mafala a Mulungu akhali ninga moto m’magogodo mwace, na akhali wakukomerwa na wakutsanzaya mu ntima mwace. (Yer. 15:16, 17; 20:9)
10. Kodi ndi cinyindiro cipi cinalonga Nyimbo ya chiriro, na thangwi yanji ndi cakuphindulisa mu kupangiza kutonga kwakuwanga kwa Mulungu nyakuipa? [si tsa. 132 ndima 13]
Bukhu ya Nyimbo ya chiriro isalonga cinyindiro cakukwana ca Yeremiya kwa Mulungu. Ceneci cisafunika kucitisa mulambiri wandimomwene onsene kukhala wakubvera na wamumphu, mu nzidzi ubodzi ene mbacenjeza mwakukhonda gopa ale anapwaza dzina ikulu na pinabveka iyo. Mwandimomwene bukhu ineyi ndi yakuphindulisa mu kufokotoza kuti Mulungu anadzalanga tani anthu anapitiriza kukhala akupanduka, aupoka na akukhonda kutcinyuka.
Kuleri Biblya Kwa Sumana Na Sumana
11. Mwakubverana na pidacitikira Yeremiya ninga pisafokotozwa pa Yeremiya 37:21, kodi tinakwanisa kukhala na cibaso cipi?
Mwakubverana na pidacitikira Yeremiya ninga pinafokotozwa pa Yeremiya 37:21, kodi tinakwanisa kukhala na cibaso cipi? Yahova atsalakana Yeremiya mu nzidzi udakatirwa Yerusalemu, ‘anthu mbaona nyatwa na kuwanzira pyakudya na pyakumwa’ mu nzidzi wakuti akazi anango akhadya anawo ene. (Ezek. 4:16; Chiriro. 2:20) Pidacitikira Yeremiya pisapasa cibaso anzakazi akukhulupirika a Yahova ngakhale mu makhaliro akuoneka ninga akusowa cidikhiro. Iye anakwanisa kutitsalakana mwapakweca mu ntsiku zakumalisa mpaka pa Harmagedoni. [7 za nthanda ya Gonkho, w97 15/9 tsa. 3-4; w77 tsa. 117]
12. Thangwi yanji Baruki alonga kuti Yahova ‘anyanyisa kumuonesa nyatwa,’ mbizincitisa ‘kutsukwala,’ na Baruki acitanji pakutoma na nyatwa zenezi? (Yer. 45:1-5)
Kutsukwala na kuneta kwa Baruki panango kukhali kwakuphatana na kukhonda tawira kwa Ayuda, akuti akhapwaza piaka pya macenjezo akubwerezabwereza na akhapitiriza na upanduki wawo. Natenepa, Baruki akhatoma “kusaka pya utumbe [‘pinthu pizinji,’ NM]” panango pinthu pya mpfuma ya kumanungo na citsidzikizo peno mbuto yapadzulu. Mwakufuna Yahova ankumbusa kuti mwandimomwene nyatwa ikhali n’njira; natenepa, unoyu nee ukhali nzidzi wa kusaka pinthu pinadzudzumisa mabasa auzimu tayu. [21 za nthanda ya Gonkho, w06 15/8 tsa. 17-18; w97 15/8 tsa. 21]
13. Kodi nzinda wa Babilonya wasiya lini kukhaliwa, mbukhala “madembe basi”? (Yer. 50:13)
Pakupita caka ca 140 M.N.W. (Mbudzatifika Nzidzi Wathu), mataka a n’khundu-n’khundu mwa Babilonya akhala akuneta mu kubvungazirika na munyu pabodzi na soda, mbakhala akucimwanika kucita munda. Mudapita cifupi na piaka 200, nzinda wa Babilonya wapitiriza kukhala wakudzala na anthu, mbwenye pyenepi pidapitiriza mu nzidzi uzinji tayu. (1 Ped. 5:13) Cifupi na piaka dzana yacitatu N.W. (Nzidzi Wathu), nyakulonga pyakucitika Dio Cássio (c. 150-235 N.W.) alonga pya mulendo adaenda kaona Babilonya wakuti hadagumana pinthu tayu kusiyapo “makuku, miyala na madembe.” [28 za nthanda ya Gonkho, ct tsa. 106-7]
14. Kodi ndi n’dida upi wa phembero udalongwa mwakubveka mu Nyimbo ya chiriro 3:8, 9, 42-45?
Yahova hadabvesera tayu maphembero a Ayuda akupanduka mu caka ca 607 M.N.W. Towera maphembero anthu atawirwe, tisafunika kubvera Mulungu na kupangiza kutcinyuka kwandimomwene. (Mis. 28:9) [18 za nthanda ya Khoni, w06 1/9 tsa. 22, ndima 4]
15. Kodi ndi ninji cinaphipiriswa na gareta inafokotozwa mu Ezekyele kapitulu 1?
Motokala unoyu wakuyetimira usaphipirisa khundu yakukhonda kuoneka ya gulu ya Yahova, yakuti isapambwa na pyakucitwa pyonsene pyauzimu pyakukhulupirika pya Mulungu. Yahova asafambisa gareta ineyi mu njira ya kuiphatisira towera kukwanirisa cifuniro cace. (Sal. 103:20; Ezek. 1:22, 25, 26, 28) Iyo isakwanirisa mwakucimbiza cifuno ca Mulungu na kuigwinyira konsene kwene na konsene kwene kunaigwinyira nzimu wa Mulungu. (Ezek. 1:12, 14) [25 za nthanda ya Khoni, od tsa. 9; w91 15/3 ndima 10-11]