Longani “Mphangwa Za Mulungu Nee Kugopa”
1 Kodi m’midzidzi inango musanyinyirika kulonga pya cikhulupiro canu m’nzidzi unakhala imwe na mwai wakucita pyenepi kuxikola peno kubasa? Kodi ndi pyakunensa kwa imwe kupereka umboni mwantsusukano kwa acibale na anyakuendekana peno panango kwa anthu anakhonda imwe dziwa? Kodi ndi ninji cinafuna kutiphedza ife tonsene kubanza midzidzi yakuthema towera kulonga “mphangwa za Mulungu nee kugopa”?—Afil. 1:14, Mphangwa Zadidi.
2 Lekani Kunyinyirika: Kodi mbumudanyinyirika kutsidzikiza xamwali wapantima peno wacibale wanu wakuti akhapumphwa mwaunthawatawa? Yahova, Xamwali wathu wapantima, apambizirwa pikulu pyene m’madzana a piaka. Ife tiri na mwai wakupambulika wakupereka umboni m’kuphedza Mulungu wathu wankulu! (Iza. 43:10-12) Kufuna kukulu Yahova kungakwanise kutiphedza kumalisa mabvero a manyadzo peno kugopa na kungakwanise kutikulumiza kulonga, tayu kunyinyirika kupereka umboni wa undimomwene mwacipapo.—Mach. 4:26, 29, 31.
3 Kumbukani kuti mphangwa zathu ndi mphangwa zadidi. Zinadzabweresa maphindu a kwenda na kwenda kwa anthu ale anazibvesera. Kunyerezera kufunika kwa basa yakumwaza mphangwa mbuto mwa ife ene peno kunyerezera apingizi athu kunadzatiphedza kumwaza mphangwa mwacipapo.
4 Pitsanzo Pya Anango: Ife tingakwanise kukhala na mphambvu kubulukira ku nkhaliro wakukhulupirika wa anthu anango adalonga mafala a Mulungu nee kugopa. Mwacitsanzo, mwacipapo Enoki amwaza mphangwa za kutongwa kwa anyakudawa akukhonda bvera na Yahova. (Yuda 14, 15) Mwakukhulupirika Noa amwaza mphangwa kwa anthu akuti akhali akukhonda funa kubva. (Mat. 24:37-39) Akristu a piaka dzana yakutoma akuti “hadapfundibswa tayu pya mabukhu na pya xikola” apitiriza kumwaza mphangwa ngakhale pantsi pa mitcingo mikulu. (Mach. 4:13, 18-20) Kazinji kene mu A Sentinela na Despertai! musagumanika mbiri ya umaso wa anthu a ntsiku zino akuti m’kukhulupira Yahova akwanisa kusiya kugopa anthu na adzakhala amwazi mphangwa a phinga.
5 Ife tinakwanisa kukhala acipapo m’kudinga nkhaliro wa umaso wa anzakazi akukhulupirika a m’nzidzi wakale akuti athimbana na makhaliro akunensa. (1 Am. 19:2, 3; Mko. 14:66-71) Iwo ‘akhala a chipapo mbakhulupira Mulungu’ mbalonga mokhonda gopa. Ife tingakwanisembo kucita pyenepi!—1 Ates. 2:2.