Kubwerezera Kwa Xikola Ya Utumiki Wa Mulungu — BHIBHLIYOTEKA MU INTERNETI ya Torre de Vigia

Kubwerezera Kwa Xikola Ya Utumiki Wa Mulungu

Mabvunzo a kubwerezera pidapfunzwa akutowerera awa anadzadingwa pa Xikola Ya Utumiki Wa Mulungu nkati mwa sumana inatoma pa 26 za nthanda ya Madzalo ya 2007. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa m’nkhani za sumana ya 1 ya nthanda ya Thongwe mpaka sumana 26 za nthanda ya Madzalo ya 2007. [Cidzindikiro: Pangasoweka pipangizo peno mabukhu adabuluswa nkhani kunkhomo kwa mbvunzo, imwe musafunika kudinga towera mugumane matawiro.—Onani Escola do Ministério, tsa. 36-7.]

LUSO YA KULONGA

1. Kodi maphatisiro a ntsonga za nkhani asafunika kulongwa m’nzidzi upi na asafunika kucitwa tani? [be tsa. 158 ndima 1-4] Maphatisiro a ntsonga asafunika kuoneka pakweca m’nkhani yonsene mbakhonda kusiyirwa basi kunkhomo kwa nkhani. Kubulukira pakutoma, tisafunika kucitisa kufuna na kuwangisira kuphataniza anyakubvesera. Munapangiza ife maphatisiro a ntsonga, tisafunika kucita pyenepi m’njira yadidi yakupangiza ‘kubvera ntsisi.’ (1 Ped. 3:8) Mbuto mwa kulonga na anango ninga acita mulando, tisafunika kuakulumizira ku mabasa adidi na kufuna pabodzi na kuawangisa ‘kubvera na kukhulupira.’ (Rom. 16:26, Chiverano Chachinchino)

2. Thangwi yanji ndi pyakufunika kuphedza anango kuona ntengo wakuphatisira mphangwa zinapangiza ife, na tinakwanisa tani kucita pyenepi? [be tsa. 159 ndima 3-4] Khala anthu nkhabe kukhuyiwa na pinalonga ife, iwo angagwande makani mwakucimbiza. Tisaphedza anango kuona ntengo wakuphatisira mphangwa zathu m’kugomezera maphindu anatambirwa m’kufamba m’njira za Yahova na luso ya kuphatisira midida ya Malemba m’umaso wawo. Kucita pyenepi kunadzakulumiza anango kucita macinjiro akufunika towera kukuza Yahova. (Iza. 48:17, 18)

3. Thangwi yanji kusankhula kwathu mafala ndi kwakufunika? [be tsa. 160] Munasankhula ife mafala athu mwacidikhodikho, tisapangiza cilemedzo ku mphangwa zinamwaza ife na kuli anthu analonga na ife. (1 Ped. 2:17) Mafala ndi maferamentu a mphambvu kakamwe a kuceza akuti angakwanisembo ‘kusosa ukali [‘kuphesa ntima,’ Tradução do Novo Mundo]’ peno kuwangisa. (Mis. 12:25; 15:1) Kugumana mafala akuthema m’nzidzi wawo kusaphemba kuwangisira, mbwenye pyenepi ndi pyadidi, nakuti mafala anthu asakhuya njira inatambira anango pinalonga ife. (Koel. 12:10)

4. Kodi ndi ninji pinafuna kudzatiphedza kuphatisira mafala akusiyana-siyana mwakulinganira? [be tsa. 161 ndima 5-6; tsa. 162 ndima 1, 4] Munagumana ife mafala akuti nkhabe kuabvesesa mwadidi, mphyadidi kuasaka m’disionaryo na kuwangisira kakamwe kuaphatisira mwadidi. Pyenepi pisaphedza kusankhula mafala adidi na kuthimizira kudziwa mafala, mbukucitisa kulonga kwathu kukhala kwakukomeresa na kwakuwangisa. (Mis. 15:2)

5. Kodi ndi maphindu api anagumanika pa kukamba nkhani m’kuphatisira tsamba ya nkhani peno ya m’nsolo? [be tsa. 166 ndima 1-3] Munalonga ife m’kuphatisira tsamba ya nkhani mbuto mwa kukhunganya nkhani ya kuleri, tisaikha manyerezero anthu kwa anyakubvesera, mbuto mwa pidalemba ife. Kuphatisira tsamba ya nkhani kusacitisa kukhala kwakukhonda nensa kuceza na kulonga kubulukira m’ntima, kwakuti kusatiphedza kukhuya mitima ya anyakubvesera athu. Nyakukamba nkhani angaphatisira tsamba ya nkhani mbaibveranisa na makhaliro a anyakubvesera, iwo anabva kuti nkhani ineyi yacitirwa iwo.

NKHANI N.° 1

6. Kodi ndi ninji pinaphatanizwa m’kukhunganya nkhani ya kuleri? [be tsa. 43 ndima 2, 4] Kukhunganya nkhani ya kuleri pamaso pa anthu kusaphataniza kuyesera mwakugaluza na kuwangisira towera kubvesesa mwadidi mphangwa zinafunika kulerwi. Pyenepi pisabveka kuyesera kudzindikira ntsonga inagumanika pa fraze ibodzi na ibodzi na nyerezero inalongwa m’ndima ibodzi na ibodzi towera kulonga mwadidi manyerezero m’njira yakulungama na mabvero akuthema. Panakwanisika ipyo, ndi pyadidi pontho kuona disionaryo towera kulonga mwadidi mafala anakhonda imwe kudziwa.

7. Kodi ndi ninji pinafunika towera kusakulira kufuna kwa Yahova pa cadidi na kuida cakuipa? (Aheb. 5:14) [w05 1/1 tsa. 9 ndima 11] Tisafunika kubvesesa mwadidi cinthu cadidi na cakuipa m’maonero a Yahova. Kubvesesa kweneku kunakwanisika basi m’kupfunza Mafala a Mulungu, Biblya. Kuphembera, kunyerezera mwacidikhodikho, na kubvera uphungu wa “mbandazi wakukhulupirika na wanzeru” kunadzatiphedzambo kukula mwauzimu. (Mat. 24:45-47, Mphangwa Zadidi)

8. Kodi tisafunika kunyerezeranji tingaleri pinthu m’Biblya pinaticitisa kubvunza khala Mulungu acita pinthu m’njira yakusowa tsankhu peno yakulungama? [w05 1/2 tsa. 24 ndima 7] Yahova apereka ntsembe ikulu mwakubverana na midida yace ya udidi na ulungami. Iye hadatsidzikiza mwanace kukhonda kutamba kufa kwakupasa lidzodzo tayu. Tenepa tiri na thangwi ikulu ya kukhulupira kuti m’nzidzi onsene Yahova asacita pinthu pyadidi na cipo asaswa midida yace yakulungama. (Yob. 37:23)

9. Kodi tisafunika kucitanji pangaoneka kuphonyana pakati pa mwambo wa Mulungu na mitemo ya anthu? [w05 15/4 tsa. 12 ndima 9] Kufuna kwathu mafala a Mulungu kunadzatiphedza kupitiriza kukhala akukhulupirika kwa Yahova. (Sal. 119:18, 20, 24) Ninga apostolo a Yezu Kristu adatcingwa, tinadzalonga kuti: “Ife pano tinatongwa kutawira maka Mulungu, kupita kutawira anthu.” (Mach. 5:29)

10. Kodi ndi m’njira ipi Yesaya agomezera Umambo Waumesiya na ntsogoleri, Jwau Mbatizi? [si tsa. 123 ndima 35] M’kukwanirisika kwa Izaiya 7:14, Yezu abalwa na mwali na kudzindikirwa ninga “Emanwele.” (Mat. 1:22, 23) Izaiya 9:6, 7 yakwaniriswa m’kutambira kwa Yezu mpando wa umambo wa Davide, ninga pikhadalongerwatu m’cidziwiso ca anju kwa Mariya. (Luka 1:32, 33) Maevanjeliyu onsene manai alemba mafala a Izaiya 40:3 towera kupangiza kuti Jwau Mbatizi ndi ule ‘akhakhuwa m’thando.’ (Mat. 3:1-3; Mko. 1:2-4; Luka 3:3-6; Jwau 1:23) M’kubatizwa kwace, Yezu adzakhala Mesiya—Wakudzodzwa na Yahova, nthawi ipswa peno ntcitci wa Yese—towera kutonga madziko. Mwa iye anthu onsene anadzaikha cidikhiro cawo, m’kukwaniriswa kwa Izaiya 11:1, 10. (Arom. 15:8, 12)

KULERI BIBLYA KWA SUMANA NA SUMANA

11. Kodi ‘nguwo yakugudumira’ inalongwa m’Izaiya 25:7 ndi ninji? M’vesi yakutowerera, Izaiya asalonga kuti Yahova “anadzafudza kufa pa kukhalirathu!” Ninga ntolo, nguwo yakulemera, kudawa na kufa kusaphimbira na kulemeresa anthu. Maphindu a ntsembe yakuombola ya Yezu angadzabwereswa kubulukira kudzulu na kuphatisirwa mwakukwana kwa anthu akubvera na akukhulupirika, pyenepi pinadzabuluswa. Izaiya 25:8 isalonga: “Mbuya Mulungu anadzafudza kufa pa kukhalirathu! Anadzapukuta misozi ya m’maso mwonsene.” [1 ya nthanda ya Thongwe, w06 1/12 “A Palavra de Jeová É Viva—Destaques do livro de Isaías—I”]

12. Kodi anthu asakwanisa tani kubva Yahova kulonga: ‘Iyi ndi njira, ndokoni nayo’? (Iza. 30:20, 21) Yahova asapangizika kubulukira kwa aprofeta ace, tenepa ninga Izaiya na anango, akuti mafala awo alembwa m’Biblya. Lero, Yahova asalonga kwa ife kubulukira ku mafala ace akulembwa, Biblya, idalembwa kale kakamwe. Iye asacitambo pyenepi kubulukira ku njira yace yakulonga, “mbandazi wakukhulupirika na wanzeru,” anatipasa cakudya na “kweru” caka na caka. (Mat. 24:45, MZ) M’kucita pinthu mwakubverana na cidziwiso ceneci, tikufamba m’njira yakutitsogolera ku kutawirika kwa Yahova. [8 ya nthanda ya Thongwe, ip-1 tsa. 310 ndima 18]

13. Ndimomwene peno Unthawatawa: Phembero ya Ezekiya inagumanika pa Izaiya 38:2, 3 yakulumizwa na kufuna kwace kupitiriza kukhala maso. Unthawatawa. Pantsi pa kuthuswa na Asirya, Ezekiya pakutoma adzudzumika na kuxolwa kwa dzina ya Yahova kukhafuna kubwereswa na kukundwa kwa Yerusalemu. Pakumala kudziwa kuti anafa na utenda wace, Ezekiya anyerezera kuti kufa kwace m’kukhonda kusiya wakutambira unthaka mbukudabvekanji ku nzera wa umambo wa Davide. Iye anyerezerambo kuti mbani akhafuna kutsogolera nkhondo ya kumenyana na Aasirya. (Iza. 37:20; 39:7) Natenepa, Yahova aona kuti kukhali kwadidi kusudzula Ezekiya na Yerusalemu m’manja mwa Aasirya na kuthimizira umaso wa Ezekiya piaka 15, kumpasa mwai wa kubala nyakutambira unthaka wa mpando wa umambo. (Iza. 38:5, 6) [22 ya nthanda ya Thongwe, “A Palavra de Jeová É Viva—Destaques do livro de Isaías—II”]

14. Kodi ndi m’njira ipi Aisraele atumikira ninga mboni za Yahova, na tinakwanisa kuasangizira tani? (Iza. 43:10) Aisraele atumikira ninga mboni mu ‘kubvekesa mbiri’ ya Yahova. (Iza. 43:21) Mudakwaniriswa kusudzulwa kwawo kubuluka ku Babilonya, Aisraele akwanisa kupasa mbiri Yahova na kupereka umboni kuti iye ndi Mulungu wa maprofesiya andimomwene na kuti alungu a Babilonya na pang’ono pene akhali alungu. (Iza. 43:14) Lero, tingakwanise kupangiza kukwaniriswa kwa profesiya ya Biblya, kwakuti kusatipasa cibaso ca kunyindira pidalongeratu Yahova pya ntsogolo. [29 ya nthanda ya Thongwe, w95 1/9 tsa. 12 ndima 17-18]

15. Mwakubverana na cipangizo caciprofesiya cidalembwa pa Izaiya 52:11, 12, kodi ndi ninji pikhafunika towera “[kukwata] pyombo pya n’nyumba ya Mulungu”? Tenepa ninga Aisraele akhafunika kusiya Babilonya na kukhala akucena mwauzimu na m’manyerezero towera kukwata pyombo pya Yahova pidabuluka ku templo m’Yerusalemu, Akristu lero asafunikambo kuthawa “Babilonya wankulu,” utongi wa dziko yonsene wa uphemberi waunthawatawa. (Apok. 18:2-4) Cikhulupiro, kutcinyuka kwandimomwene, kucena mwauzimu na m’manyerezero pyakubuluswa m’cidziwiso cadidi ca Mafala a Mulungu ndi pyakufunikambo. Ule anakwanirisa pinthu pyenepi angakwate “pyombo pya n’nyumba ya Mulungu”—masasanyiro a Mulungu a basa yakucena—na cinyindiro cikulu ku ciphedzo na nkhombo za Yahova. [12 ya nthanda ya Madzalo, ip-2 tsa. 191 ndima 21–tsa. 193 ndima 24]