Kubwerezera Kwa Xikola Ya Utumiki Wa Mulungu — BHIBHLIYOTEKA MU INTERNETI ya Torre de Vigia

Kubwerezera Kwa Xikola Ya Utumiki Wa Mulungu

Mabvunzo a kubwerezera pidapfunzwa akutowerera awa anadzadingwa pa Xikola Ya Utumiki Wa Mulungu nkati mwa sumana inatoma pa 25 ya nthanda ya Maindza ya 2006. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa m’nkhani za sumana ya 6 ya nthanda ya Bingu mpaka sumana ya 25 ya nthanda ya Maindza ya 2006. [Cidzindikiro: Pangasoweka pipangizo peno mabukhu adabuluswa nkhani kunkhomo kwa mbvunzo, imwe musafunika kudinga towera mugumane matawiro.—Onani Escola do Ministério, tsa. 36-7.]

LUSO YA KULONGA

1. Kodi ndi ninji pinafunika kutsogolera kutonga kwathu m’kusankhula nfokotozo wakuthema unathangira lemba? [be tsa. 148 ndima 4–tsa. 149 ndima 1] Cakutoma, ndi kupangiza cilemedzo kwa Yahova ninga ule adapepesera Biblya. Kubvesesa pinalongwa pa lemba, isalongwa kwa ani na mbani analonga, na ntsonga inalongwa ingakwanisembo kutiphedza kusankhula mafala akuthangira lemba.

2. Kodi ndi zipi njira zingasi zakuti tingakwanise kuziphatisira towera kuikha cigomezero cakuthema ku mafala na malongero athu? [be tsa. 151 ndima 4–tsa. 152 ndima 3] (1) Kugomezera fala: Kucinja fala kusacitisa kuti ntsonga nkati mwa fraze ibvekeswe mwadidi. (2) Kupuma: Kupuma kwakuthema mbamudzati kuleri khundu yakufunika ya lemba kusacitisa maba, na kupuma pakumala kuleri kusagomezera nyerezero. (3) Kubwerezera: Tingamala kuleri lemba, kubwerezera mafala akufunika peno malongero kusagomezera kakamwe ntsonga yakuthonyeka. (4) Majesto: Kulonga na manungo ene pabodzi na maonekero a nkhope kungakwanise kazinji kene kuthimizira nyerezero ya fala peno ya fraze.

3. Nakuti kupfunzisa anango Mafala a Mulungu si dzenda tayu, kodi ndi ninji cinafunika ife kucita towera ‘kudziwa kulonga na kulungama mafala a udidi [peno undimomwene]’? (2 Tim. 2:15) [be tsa. 153 ndima 1-3, bokosi; tsa. 154 ndima 1-2] Tisafunika kucita pyonsene towera kufokotoza kwathu lemba kukhale kwakubverana na pinalonga lemba, pinapfunzisa Biblya na pinagumanika m’mabukhu akubuluswa na “mbandazi wakukhulupirika na wanzeru.” (Mat. 24:45, Mphangwa Zadidi) Tisacalira kuthimizira nzeru zathu zene peno kuphatisira lemba towera kuphedzera maonero athu. (Yer. 23:16) Mwakuthimizira, tisawangisira kusangizira Yezu Kristu, ule adaphatisira Mafala a Mulungu towera kuwangisa tayu kuthusa. (Mat. 11:⁠28)

4. Kodi ndi m’njira zipi tingakwanise kuphatisira mwadidi malemba analeri ife? [be tsa. 154 ndima 4–tsa. 155 ndima 3] Njira ibodzi yakuti tingakwanise kuiphatisira mwadidi ndi kuikha pakhundu mafala akufunika anabverana na ntsonga inalongwa. Yezu agomezera mafala akuti “manungo mabodzi ene” m’kufokotoza kubveka kwa Genesi 2:24. (Mat. 19:3-⁠6) Tingakwanisembo kucita mabvunzo akuti anadzagomezera mafala akufunika m’lemba inafuna ife kuleri. Cifuno cathu ndi kupangiza khundu ya lemba inabverana na nkhani yathu towera anyakubvesera akwanise kuona mwadidi kubverana kunagumanika pa nkhani na malemba anaphatisira ife.

5. Thangwi yanji ndi pyadidi kupangiza mwapakweca phindu ya mphangwa zathu, na ndi zipi njira zingasi towera kukwanisa pyenepi? [be tsa. 157 ndima 1-4, bokosi; tsa. 158 ndima 1] Anthu angakhonda kuona phindu yadidi ya pinthu pinalonga ife, iwo angakwanise kunyerezera pinango mbakhonda phindula na mphangwa zinalongwa. Tisawangisa anango kunyerezera phindu yadidi m’kuaphedza kubvesesa kuti kugopa Yahova kusakhuya tani umaso wawo. (Sal. 111:10; 1 Tim. 4:⁠8) Tisacita nkhani zathu kukhala zakuphata basa m’kunyerezera anyakubvesera na kubvunzika, ‘kodi nkhani inafuna kamba ine inakwanisa tani kuphindulisa anyakubvesera’?

NKHANI N.° 1

6. Kodi ndi m’njira ipi Salomoni akhali nyakugumanya? [si tsa. 112 ndima 1-3] Salomoni akhali ntsogoleri wa anthu akuperekeka kwa Yahova. Ninga nyakugumanya, akhayesera kukwanirisa kupitawirira kwace m’kugumanya pabodzi anthu a Mulungu m’kukwanirisa kuperekeka kwawo. Kubulukira ku uphungu wanzeru wa Koelete [peno Mlaliki], Salomoni akhawangisira kugumanya anthu towera kukomerwa na mabasa adidi, mbaabulusa ku pinthu pyapezi na mabasa okhonda bala misapo a dziko. (Koel. 12:8-10)

7. Kodi Koelete asabverana tani na pipfunziso pya Yezu? [si tsa. 114 ndima 16] Pana kulandana kukulu pakati pa Koelete na pipfunziso pya Yezu. Mwacitsanzo, Yezu agomezera kukula kwa mabasa a Mulungu m’kulonga tenepa: “Babanga asaphata mabasa ache, ine pano ndisaphatambo mabasa anga.” (Jwau 5:17) Salomoni alongambo mabasa a Mulungu: ‘Ndaona mabasa onsene a Mulungu kuti munthu anachimwana kudziwa pyonsene pinachitika pantsi pano; maseze asake na phinga, chipo anadzapidziwa. Masezembo nyaudziwisi alonge kuti iye asadziwa pizinji, chipo anadzapiphola tayu.’ (Koel. 8:⁠17)

8. Kodi pana cipangizo canji ca kutawirika kwa Nyimbo Ikulo? [si tsa. 115 ndima 3-4] Nyimbo Ikulo yaphatanizwa mu “Septuaginta,” na Josefo aiphataniza m’ndandanda wa mabukhu ace akucena, kupangiza kuti ikhali yakutawirika mwakukwana m’midzidzi yakutoma. Kusiyapo pyenepi, malembero ace amphambvu akukuza nkhaliro ukulu wa kufunana unango na nzace ninga unagumanika pakati pa Kristu na “mankhadzi” wace m’njira yauzimu, kusacita Nyimbo Ikulo kukhala ku khundu ya kutawirika kwa Biblya. (Apok. 19:7, 8; 21:⁠9)

9. Kodi ndi m’njira ipi Mpukutu Wa Ku Bara Yakufa wa Izaiya usapangiza mwadidi kuti Biblya yathu yalero iri na mphangwa zakupepeserwa zakutoma? [si tsa. 118 ndima 6] Lemba ya Mpukutu Wa Ku Bara Yakufa wa Izaiya ndi yakale kakamwe cifupi na caka cikwi kupiringana pyakulembwa na manja pyakale pya lemba ya Massorético na nee ikhali yakusiyana m’pipfunziso pyayo na lemba ya Massorético tayu. Kulandanisa kwapangiza kuti pakhali kusiyana pang’ono basi kwa malembero na kusiyana kunango kwa mapambiro a gramatika.

10. Kodi ndi ninji cingakwanise kuphedza nkambi nkhani kumalisa kufuna kwace ntsonga zizinji? [be tsa. 42 ndima 1] Nkambi nkhani asafunika kundandalisa mphangwa zace m’ntsonga zakucepa zakufunika, mbabulusa ntsonga zakuti mwandimomwene nee zisaphedza nkhani, na kundandalisa manyerezero mwaluso.

KULERI BIBLYA KWA SUMANA NA SUMANA

11. Kodi ndi m’njira ipi “ale anasaka Mulungu asadziwa pyonsene”? (Mis. 28:5) “Pyonsene” kusabveka pinthu pyonsene pinafunika towera kutumikira Yahova mwakutawirika, kusaphataniza kudziwa midida ya makhaliro akulungama a Mulungu. Ale anasaka Yahova kubulukira m’phembero na kupfunza midida ya Biblya asadziwa pinafunika iwo kucita towera kutumikira Yahova mwakutawirika. Mwakusiyana na pyenepi, ale anacita pinthu pyakuipa nkhabe kudziwa pinthu pyadidi na asakhonda kukhala atumiki a Mulungu. [6 ya nthanda ya Bingu, w06 15/9 “A Palavra de Jeová É Viva—⁠Destaques do livro de Provérbios”; w87 15/5 tsa. 30]

12. Kodi ndi m’njira ipi “basa ya munthu wakusowa nzeru isannetesa pezi.”? (Koel. 10:15) ‘Anthu akusowa nzeru’ kazinji kene asalonga na asacita pyaupswiru, kubulukira m’manyerezero akuipa. (Koel. 10:12-14) Iwo asamalisira kuwangisira na m’kucita pinthu pang’ono towera kupangiza kuwangisira kwawo, asaneta. Iwo asacitisa okha umaso kukhala wakunensa kakamwe. [20 ya nthanda ya Bingu, w06 1/11 “A Palavra de Jeová É Viva—⁠Destaques do livro de Eclesiastes”; w78 tsa. 26]

13. Kodi ndi m’njira ipi ntsikana Sulamita apangiza kukhala ninga “munda wa maluwa” na ndi citsanzo cadidi tani kwa akazi Acikristu akuti adzati kusembwa? (Nyimbo. 4:12) Mabvero akufuna a ntsikana Sulamita akhali ninga munda wa maluwa wakubalika wakufungwa na mpanda peno malinga wakuti mbudapitwa basi na pa nsuwo wakufungwa na mphinga, nyakungwinira mbadacimwana kupita. Mabvero ace akufuna nee akhali kwa mamuna onsene tayu, mbwenye akhaakoyera basi mamunace wakuti mbadadzansemba. Ndi citsanzo cadidi tani ca mphambvu ya makhaliro adidi kwa akazi Acikristu akuti adzati kusembwa! [27 ya nthanda ya Bingu, w06 15/11 “A Palavra de Jeová É Viva—⁠Destaques do livro do Cântico de Salomão”]

14. M’kucemerera Aisraele towera ‘kugwanda milando,’ kodi Yahova akhapangiza kuti akhali dzololo towera kuceza mwakulinganira na mbumba yace? (Iza. 1:18a) Nkhabe. Vesi ineyi nee isalonga pya kuceza kwakuti munthu na munthu asakwewerera ku khundu kwace peno kuceza kwa anthu abodzi ene. Kucemererwa kukhali kwa kuenda ku mbuto yakutongera miseru towera kukhazikisa ulungami wa Yahova. Yahova akhacemerera Aisraele kuti atcinyuke ku pyakucita pyawo pyakudodoma towera akhale akucena m’makhaliro na m’uzimu. (Iza. 1:16, 17) Iye aapikira kuti iwo ‘angatonga milando,’ iye anadzaalekerera. [4 ya nthanda ya Maindza, ip-⁠1 tsa. 26-⁠9 ndima 9-⁠18]

15. Kodi Izaiya 11:6-9 akwaniriswa tani m’midzidzi yakale na kukwaniriswa kwace kukulu ndi kupi? Mwakubverana na mafala a Yahova, mukhakhala iwo m’njira ya kuenda ku dziko ya kwawo kubuluka ku ubitcu m’Babilonya na mukhakhala iwo ku dziko ya kwawo kutomera 537 A.E.C., Aisraele nee akhafunika kugopa pikala peno anthu a makhaliro ninga a pikala. Mwakulandana, kutomera 1919, ninga phindu ya kuwina “udziwisi wa Mulungu” na Mafala ace, anthu acinja makhaliro awo. (Akol. 3:9, 10) Mwacitsanzo, anthu a makhaliro auphanga adzakhala antendere na cincino akutsanzaya na paradizu yauzimu. M’dziko ipswa inafuna bwera, anthu a Mulungu nee anadzathuswambo na munthu peno na cikala tayu. [18 ya nthanda ya Maindza, ip-⁠1 tsa. 163-⁠4 ndima 12-⁠15]