Pangizani Kutsalakana Kwanu Anango—M’kumwaza Mphangwa Mwakusowa Tsankhu
1 M’masomphenya, mpostolo Jwau aona anju mbodzi mbakamburuka pakati pa thambo mbakamwaza mphangwa zadidi za umaso okhonda mala kwa anthu a “mbumba zonsene na kuli madzindza onsene, kuli anthu a malongero onsene na kuli mitundu ya anthu onsene.” (Apok. 14:6) Kodi tikutowerera citsanzo ca anju m’kumwaza mphangwa mwakusowa tsankhu? Mokhonda funa, tingakwanise kukhala na makhaliro a tsankhu. Makhaliro athu kwa anthu anagumanikana na ife angakwanise kukhuya maperekero athu a mphangwa zadidi kwa iwo. Natenepa, tisafunika kupangiza citsalakano cakufuna candimomwene munapereka ife umboni kwa anthu a makuziro akusiyana-siyana.
2 Dingani Cisa Canu: Kodi asagumanika m’cisa canu anthu akudza peno akuthawa nkhondo? Mwakukhonda nensa iwo angakwanise kupwazwa. Sakani anthu anewa, na yeserani kuadziwa mwadidi. Kodi ndi pipi pyakusowa pyawo, pidzudzumiso pyawo, pinafuna iwo na pinakhonda funa iwo, pinaapswipisa ntima na manyerezero awo akuipa? Wangisirani kucinja uperekero wanu umboni wa mphangwa zadidi za Umambo kuti ubverane na iwo. (1 Akor. 9:19-23) Ninga mpostolo Paulu, tisafunika kupibva kuti tatongwa kumwaza mphangwa zadidi kwa anthu onsene a m’cisa cathu, kuphataniza ale akuti ndi a madziko akunja, ale akuti ali na miyambo yakusiyana, ale akuti asalonga cilongero cinango, peno ale akuti ndi akupfuma kakamwe.—Arom. 1:14, cidzindikiro capantsi.
3 Kodi munakwanisa tani mphapo kumwaza mphangwa kwa munthu analonga cilongero cinango? Phatisirani mwadidi kabukhu kakuti Boas Novas para Pessoas de Todas as Nações. Mungakwanisembo kukwata matsamba peno mabruxura mangasi anagumanika m’pilongero pinalongwa kakamwe m’cisa canu. (Onani Nosso Ministério do Reino de Julho wa 2003, tsa. 4, ndima 2-3.) Mwakuthimizira, amwazi mphangwa anango asawangisira kakamwe kupfunza mamwanyikiro na uperekero umboni okhonda nensa m’pilongero pinango. Kazinji kene anthu asadzumatirwa angabva munthu kuyesera kulonga m’cilongero cawo, ngakhale m’mafala akucepa kakamwe, na pyenepi pingaacitise kubvesera mphangwa zadidi.
4 Kusangizira Yahova: M’kufikira anthu a makuziro akusiyana-siyana, tikusangizira Mulungu wathu wakusowa tsankhu, Yahova, “anafuna kuti anthu onsene apulumuke, adziwembo mapfundisiro adidi.”—1 Tim. 2:3, 4.