‘Pitirizani Kulemedza Anthu Ninga Anewa’

KUTOMERA mu caka 1992, Mathubo Akutonga asakhazikisa akulu a mpingo aluso na akukola mwauzimu toera kuphedzera basa m’makomiti awo.a Abale anewa ndi a “mabira anango,” iwo asapereka ciphedzo cadidi kakamwe kuna Mathubo Akutonga. (Jwau 10:16) Iwo asagumanikambo pa nsonkhano wa komiti inaphedzera iwo, mbapereka mphangwa zakufunika kakamwe na maonero awo. Mathubo Akutonga ndiwo anacita cisankhulo cakumalisa, mbwenye anyakuphedza ndiwo anacita pidasankhulwa na Mathubo Akutonga m’makomiti awo mbacita mabasa onsene anapaswa iwo. Anyakuphedza anewa asaperekera Mathubo Akutonga angaenda katumikira m’misonkhano yakupambulika na ya dziko yonsene. Iwo asatumwambo toera kucedzera maofesi a filiali ninga aimiriri a ofesi ikulu.

M’bodzi wa anyakuphedza wakuti asatumikira kubulukira padakhazikiswa masasanyiro anewa alonga: “Ndingatsalakana mabasa anapaswa ine, Mathubo Akutonga anakwanisa kuikha manyerezero awo ku pinthu pyauzimu.” M’bale unango asatumikira ninga nyakuphedza mu pyaka pyakupiringana 20, iye alonga: “Ndi mwai wakuti usapiringana pinthu pyonsene pikhadikhira ine.”

Mathubo Akutonga asapasa mabasa mazinji anyakuphedza awo, pontho asapereka takhuta kakamwe na mabasa adidi anacitwa mwaphinga na abale anewa akukhulupirika. Tendeni tonsene ‘tipitirize kulemedza anthu ninga anewa.’​—Afil. 2:29.